ބ އަތޮޅު ބަޔޯސްފިއަރ ރިޒަރވްގެ ގޮތުގައި ކަނޑައެޅުމާއެކު ރާއްޖޭގެ އިޤްތިޞާދަށް ގިނަ ފައިދާތަކެއް
ބ.އަތޮޅަށް އައި ފަތުރުވެރިންގެ އަދަދާއި، އިންވެސްޓްކޮށްފައިވާ މިންވަރު ވަރަށް ބޮޑުތަން އިތުރު
ހަނިފަރު ސަރަހައްދު
ބ އަތޮޅު ބަޔޯސްފިއަރ ރިޒަރވްގެ ގޮތުގައި ކަނޑައެޅުމާއެކު ރާއްޖޭގެ އިޤްތިޞާދަށް ގިނަ ފައިދާތަކެއް ލިބިއްޖެއެވެ.
އަންގާރަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް އިބްރާހިމް މުޙައްމަދު ޞާލިޙު ވިދާޅުވީ، ބަޔޯސްފިޔަރ ރިޒަރވްގެ ގޮތުގައި ޔުނެސްކޯއިން ބ އަތޮޅު ކަނޑައެޅިތާ 10 އަހަރު ފުރިފައިވާ ކަމަށެވެ. މިކަމުގެ ސަބަބުން ފާއިތުވި އަހަރުގެ ތެރޭގައި އިޤްތިޞާދީ ގިނަ ނަފާތަކެއް ލިބިފައިވާ ކަމަށެވެ. އަދި ބ.އަތޮޅަށް އައި ފަތުރުވެރިންގެ އަދަދާއި، އިންވެސްޓްކޮށްފައިވާ މިންވަރު ވަރަށް ބޮޑުތަނުން އިތުރުވެފައިވާ ކަމަށެވެ.
ބަޔޯސްފިއަރ ރިޒާވެއްގެ ގޮތުގައި ބ.އަތޮޅު އެންމެ ފުރަތަމަ ކަނޑައެޅީ 28 ޖޫން 2011ގައެވެ.
ބ.އަތޮޅުގައި 10 ސަރަހައްދެއް ބަޔޮސްފިއަރ ރިޒާވްގެ "ކޯއޭރިއާ"ގެ ގޮތުގައި ކަނޑައަޅާފައި އެބައޮތެވެ. އެއީ ހަނިފަރު، ގޮއިދޫ ކޯރު ސަރަހައްދު، މަތިފަރު ހުރާ، މާހުރުވަޅި، ބަތަލާހުރާއާއި އެތަނުގެ ވަށައިގެންވާ ފަރު، ކޯބިން ނައު އަޑިއަށް ގޮސްފައިވާ ސަރަހައްދު، މެންދޫ ސަރަހައްދު، އަނގަފަރު، ދިގަލި ހާ، އަދި އޮޅަގިރިއެވެ.
މިސަރަހައްދުތަކުގެ ތެރެއިން އެންމެބޮޑު އާމްދަނީއެއް ލިބޭ އެއްތަނަކީ ހަނިފަރު ބޭއެވެ. އަދި ފަތުރުވެރިންގެ މެދުގައި މިސަރަހައްދުގެ މަގުބޫލުކަން ދަނީ އެއް ދުވަހުން އަނެއް ދުވަހަށް އިތުރުވަމުންނެވެ. އެއީ މިސަރަހައްދަކީ ގިނަ އަދަދަކަށް އެންމަޑި ފެންނަ ސަރަހައްދަކަށް ވާތީއެވެ. ވޭތުވެދިޔަ 10 އަހަރު ދުވަހުގެ ތެރޭގައި އެތަނަށް 40،000ށްވުރެ ގިނަ ފަތުރުވެރިން ޒިޔާރަތްކޮށްފައިވެއެވެ.
ބަޔޯސްފިއަރ ރިޒާވެއްގެ ގޮތުގައި ކަނޑައެޅިތާ 10 އަހަރުވުމާއެކު، އިތުރަށް މިގޮތުގައި އެއަތޮޅު ދެމެހެއްޓުމަށް ޔުނެސްކޯއަށް ބޭނުންވާ މައުލޫމާތު އެއްކުރުމުގެ މަސައްކަތް މިއަހަރުވަނީ ފަށާފައެވެ. އަދި އެމަސައްކަތް ނިންމައި މިއަހަރުގެ ސެޕްޓެމްބަރު މަހު ޔުނެސްކޯއަށް ހުށަހަޅާނެއެވެ.
