ފުވައްމުލަކު ދެ ސްކޫލެއްގެ މަރާމާތުގެ މަސައްކަތް އިނޯކާ ކުންފުންޏާ ހަވާލުކޮށްފި
ހަވާލުކޮށްފައިވަނީ މުޙައްމަދު ޖަމާލުއްދީން ސްކޫލް އަދި ފުވައްމުލަކު ސްކޫލްގެ މަސައްކަތް
ސްކޫލްތައް މަރާމާތުކުރުމަށް އެއްބަސްވުމުގައި ސޮއިކުރުމުގެ ތެރެއިން
ފުވައްމުލަކު ދެ ސްކޫލެއްގެ މަރާމާތުގެ މަސައްކަތް އަމިއްލަ ކުންފުންޏަކާ ހަވާލުކޮށްފިއެވެ.
އެކަމަށްޓަކާ އެޑިއުކޭޝަން މިނިސްޓްރީގައި ބޭއްވި ޚާއްސަ ރަސްމިއްޔަތެއްގައި މި މަސައްކަތް ހަވާލުކޮށްފައިވަނީ އިނޯކާ ޕްރައިވެޓް ލިމިޓެޑާއެވެ. އެގޮތުން އެ ސިޓީގެ މުޙައްމަދު ޖަމާލުއްދީން ސްކޫލްގައި 16 ކްލާސްރޫމާއި ކޮމްޕިއުޓަރ ލެބްގެ އިމާރާތުގެ މަސައްކަތާއި، ފުވައްމުލަކު ސްކޫލްގެ މަލްޓި ޕަރޕަސް ހޯލް ޢިމާރާތުގެ މަރާމާތުގެ މަސައްކަތްކުރުމަށް ވަނީ ހަވާލުކޮށްފައެވެ.
މި ދެ މަޝްރޫޢަކީ ވެސް މި އަހަރުގެ ޕީ.އެސް.އައި.ޕީގެ ތެރެއިން ކުރިއަށްގެންދާ ދެ މަޝްރޫޢެއްކަމަށް އެޑިއުކޭޝަން މިނިސްޓްރީން ބުނެއެވެ. އެގޮތުން މުޙައްމަދު ޖަމާލުއްދީން ސްކޫލްގައި 16 ކްލާސްރޫމް އަދި ކޮމްޕިއުޓަރ ލެބް އިމާރާތުގެ މަސައްކަތަށް 12 މިލިއަނަށްވުރެ ގިނަ ރުފިޔާ ޚަރަދުވާނެކަމަށް އެޑިއުކޭޝަން މިނިސްޓްރީން ހާމަކުރިއެވެ. އަދި މި މަސައްކަތް ކުރުމަށް އެކުންފުންޏާ ޙަވާލުކޮށްފައިވަނީ އެއް އަހަރު ދުވަހުގެ ތެރޭގައި އެއްކޮށް ނިންމާގޮތަށެވެ.
ފުވައްމުލަކު ސްކޫލްގެ މަލްޓި ޕަރޕަސް ހޯލް އިމާރާތުގެ މަސައްކަތަށް 8.2 މިލިއަން ޚަރަދުވާއިރު، މި މަސައްކަތް ނިންމުމަށް އެކުންފުންޏާ ޙަވާލުކޮށްފައިވަނީ 330 ދުވަހުގެ ތެރޭގައި ނިންމާގޮތަށެވެ.
