އެސްޓްރަޒެނިކާ ވެކްސިން ފުރަތަމަ ޑޯޒު ޖަހާފައި ފައިޒާ ވެކްސިންގެ ދެވަނަ ޑޯޒު ޖެހިދާނެ!
28 ޖޫން 2021 | ހޯމަ 17:48މިގޮތަށް ވެކްސިން ޖެހުމަކީ އާންމުކޮށް މިހާރު ޖަހާގޮތަށް އަޅާބަލާއިރު، ހަށިގަނޑުގައި އެންޓިބޮޑީސް އިތުރުކޮށްދޭ ކަމެއް
އެސްޓްރަޒެނިކާ ވެކްސިން
ކޮވިޑް-19އިން ދިފާއުވުމަށް އެސްޓްރަޒެނިކާ ވެކްސިން ޖަހާފައި، ފައިޒާ ވެކްސިންގެ ދެވަނަ ޑޯޒު ޖެހިދާނެ ކަމަށް ދިރާސާތަކުން ދައްކައިފިއެވެ.
އޮކްސްފޯރޑް ޔުނިވަރސިޓީގެ ޕްރޮފެސަރ މެތިއު ސްނޭޕް ހެދި ދިރާސާއެއް ދައްކާގޮތުން އެސްޓްރަޒެނިކާ ވެކްސިނާއި ފައިޒާ ވެކްސިންގެ ޑޯޒުތައް "އެއްކުރެވިދާނެ"އެވެ. އެގޮތުން އެސްޓްރަޒެނިކާގެ ފުރަތަމަ ޑޯޒު ޖަހާފައި ފައިޒާގެ ދެވަނަ ޑޯޒު ޖެހިދާނެ ކަމަށާއި، ފައިޒާގެ ފުރަތަމަ ޑޯޒު ޖަހާފައި އެސްޓްރަޒެނެކާގެ ދެވަނަ ޑޯޒު ޖެހިދާނެ ކަމަށް ދިރާސާތަކުން ދައްކައެވެ. އަދި މިގޮތަށް ވެކްސިން ޖެހޭނީ ފުރަތަމަ ޑޯޒު ޖަހާތާ ހަތަރު ހަފުތާގެ ތެރޭގައި ކަމަށް ވެސް ރިޕޯޓުތައް ބުނެއެވެ.
ދިރާސާތައް ދައްކާގޮތުން މިގޮތަށް ވެކްސިން ޖެހުމަކީ އާންމުކޮށް މިހާރު ޖަހާގޮތަށް އަޅާބަލާއިރު، ހަށިގަނޑުގައި އެންޓިބޮޑީސް އިތުރުކޮށްދޭ ކަމެކެވެ. އެގޮތުން އެސްޓްރަޒެނިކާ ވެކްސިންގެ ދެ ޑޯޒު ޖެހުމަށްވުރެ، އެސްޓްރަޒެނެކާގެ އެއް ޑޯޒު އަދި ފައިޒާގެ އެއް ޑޯޒު ޖެހުމުން ހަށިގަނޑުގައި އެންޓިބޮޑީ އިތުރުކޮށްދެއެވެ. ނަމަވެސް ފައިޒާގެ ދެ ޑޯޒު ޖެހުމުން އެއަށް ވުރެ އެންޓިބޮޑީ ގިނަވާ ކަމަށް ދިރާސާތަކުން ދައްކައެވެ.
މި ދިރާސާއަކީ އުމުރުން 50 އަހަރުން މަތީގެ އަދި އެކި ކަހަލަ ބަލިތައް ތަހައްމަލުކުރަމުންދާ 830 މީހުން ބޭނުންކޮށްގެން ހަދާފައިވާ ދިރާސާއެކެވެ. އޭގެ ތެރެއިން 463 މީހުންނަށް ދީފައިވަނީ މިކްސްޑް ޑޯޒު ކަމަށާއި 367 މީހުންނަށް ދިނީ އެއް ވެކްސިނެއްގެ ދެ ޑޯޒު ކަމަށް ރިޕޯޓުގައިވެއެވެ.
ދިރާސާގައި ބުނާގޮތުން މިގޮތަށް ވެކްސިން އިފެކްޓިވް ވަނީ ދެ ޑޯޒު ދެމެދުގައި ހަތަރު ހަފުތާ ވާނަމައެވެ. އާންމުގޮތެއްގައި ވެކްސިންގެ ދެޑޯޒު ދެމެދުގައި 12 ހަފްތާ ހޭދަކުރާއިރު، 12 ހަފްތާއިން އެގޮތަށް ޖަހާ ނަމަ އަސަރުކުޑަވާ ކަމަށް ވެސް ދިރާސާގައިވެއެވެ.
