ކޮވިޑް-19 އާ ގުޅިގެން މެލޭޝިއާގައި އިއުލާންކޮށްފައި އޮތް ލޮކްޑައުން ދިގުދަންމާލަން ނިންމައިފިއެވެ.
ރިޕޯޓްތައް ބުނާ ގޮތުން ހޯމަ ދުވަހު ނިމުމަކަށް އަންނަ ގޮތަށް މެލޭޝިއާގައި އިއުލާންކޮށްފައި އޮތް ލޮކްޑައުން ދިގުދަންމާލަން ނިންމާފައި ވަނީ އެގައުމުގެ ބޮޑުވަޒީރު މުހިއްޔިއްދީން ޔާސިން އެވެ. އެގޮތުން އެގައުމުގައި އެއް ދުވަހެއްގައި ބައްޔަށް ޕޮޒިޓިވްވާ މީހުންގެ އަދަދު ހަތަރު ހާހުން ދަށަށް ދިއުމުން ނޫނީ މިވަގުތު އިއުލާންކޮށްފައިވާ ލޮކްޑައުން އުވާނުލާނެ ކަމަށް ބޮޑުވަޒީރު ވަނީ ވިދާޅުވެފައެވެ.
ހޮނިހިރު ދުވަހު އެކަނިވެސް މެލޭޝިއާ އިން 5,803 މީހުން ވަނީ ކޮވިޑަށް ޕޮޒިޓިވްވެފައެވެ.
މެލޭޝިއާ ދެ ހަފްތާގެ ލޮކްޑައުނަކަށް ގޮސްފައި ވަނީ ޖޫން އެއް ވަނަ ދުވަހުއެވެ. މި ލޮކްޑައުން އިއުލާން ކޮށްފައިވަނީ ވިޔަފާރިތަކާއި އެހެނިހެން ޚިދުމަތްދޭ ތަންތަން ވެސް ބަންދު ކުރާ ގޮތަށެވެ.
މެލޭޝިއާގައި ފުލް ލޮކްޑައުން އިއުލާންކުރައްވާ ވާހަކަދައްކަވަމުން އެގައުމުގެ ބޮޑުވަޒީރު ވަނީ ލޮކްޑައުންގެ ފުރަތަމަ މަރުހަލާގެ 14 ދުވަހުގެ ތެރޭގައި ކޭސްތައް ދަށަށް ދާނަމަ، ދެވަނަ މަރުހަލާގައި އިތުރު ވިޔަފާރިތައް ހުޅުވައިގެން ޚިދުމަތް ދިނުމަށް ފުރުސަތު ދެއްވާނެ ކަމަށް ވިދާޅުވެފައެވެ. ލޮކްޑައުންގެ ދެވަނަ މަރުހަލާ 4 ހަފްތާއަށް ދިގު ދެމިގެންދާނެއެވެ.
ދެވަނަ މަރުހަލާ ނިމި ތިންްވަނަ މަރުހަލާއަށް ދާއިރު ވިޔަފާރިތަކާއި އާންމު އެއްވުންތަކަށް ފުރުސަތުދޭނެ ކަމަށް ބޮޑުވަޒީރު ވިދާޅުވިއެވެ. އެއް މަރުހަލާއިން އަނެއް މަރުހަލާއަށް ދާނީ، ހެލްތް މިނިސްޓްރީގެ ލަފަޔާއެކު، ކޭސްތައް އިތުރުވަމުންނުދާނަމަ ކަމަށްވެސް ވިދާޅުވެފައި ވެއެވެ.
މެލޭޝިއާގެ ސިއްހީ ނިޒާމް މިކަމަށް ތައްޔާރުވެފައި އޮތްކަމުގެ ޔަގީންކަން ދެއްވަމުން ބޮޑުވަޒީރު އިތުރަށް ވިދާޅުވީ، އިތުރު ވެކްސިން ހޯދުމުގެ މަސައްކަތް މިހާރު ވެސް ކުރައްވަމުން ގެންދަވާ ކަމަށެވެ.
