ގުދުސްގެ މައްސަލަ: މެލޭޝިއާގައި ހުންނަ އެމެރިކާގެ އެމްބަސީގެ ކުރިމަތީ މުޒާހަރާ ފަށައިފި
8 ޑިސެމްބަރު 2017 | ހުކުރު 07:31މުޒާހަރާތަކުގައި އިސްކޮށް ހަރަކާތްތެރިވަނީ އެ ގައުމުގެ ދެ ސިޔާސީ ޕާޓީއެއް
މެލޭޝިއާގައި ހުންނަ އެމެރިކާގެ އެމްބަސީގެ ކުރިމަތީގައި މުޒާހަރާ ކުރަނީ
ގުދުސްއަކީ އިޒްރާއިލްގެ ވެރިރަށް ގޮތުގައި ބަލައިގަންނަން އެމެރިކާގެ ރައީސް ޑޮނަލްޑް ޓްރަމްޕް ނިންމެވުމާއި ގުޅިގެން، މެލޭޝިއާގައި ހުންނަ އެމެރިކާގެ އެމްބަސީގެ ކުރިމަތީގައި މުޒާހަރާ ކުރަން ފަށައިފިއެވެ.
މެލޭޝިއާގެ ސަރުކާރުން ބުނެފައިވަނީ ގުދުސްގެ މައްސަލައަކީ މެދުއިރުމަތީގެ ހަމަޖެހުމަށް ހައްލެއް ހޯދަން ޖެހިފައިވާ މައްސަލައެއް ކަމަށާއި 1967 ވަނަ އަހަރުން ގުދުސް ހިމެނޭ ސަރަހައްދުގެ ބޯޑަރުތަކަށް ގެނެސްފައިވާ ބަދަލުތައް ބަލައި ނުގަތުމަށް އދ. ގެ ހުރިހާ ގައުމުތަކަށް ގޮވާލާ ކަމަށެވެ. ހަމައެހެންމެ ޓްރަމްޕްގެ މި ނިންމުމަކީ ބައިނަލްލަގްވާމީ ގާނޫނުތަކާއި އަދި އދ.ގެ ސެކިއުރިޓީ ކައުންސިލްގެ އެތަކެއް ގަރާރުތަކާއި ހިލާފު ނިންމުމެއް ކަމަށް މެލޭޝިއާ ސަރުކާރުން ވަނީ ބުނެފައެވެ. އަދި ޓްރަމްޕްގެ މި ނިންމުން އަނބުރާ ގެންދެވުމަށް ވެސް މެލޭޝިއާގެ ސަރުކާރުން ވަނީ ގޮވާލާފައެވެ.
މެލޭޝިއާގައި ހުންނަ އެމެރިކާގެ އެމްބަސީ ކުރިމަތީގައި ފަށާފައިވާ މުޒާހަރާތަކުގައި އިސްކޮށް ހަރަކާތްތެރިވަނީ އެ ގައުމުގެ ދެ ސިޔާސީ ޕާޓީއެކެވެ. އެގޮތުން މެލޭޝިއަން އިސްލާމިކް ޕާޓީ (ޕީއޭއެސް) އަދި ވެރިކަންކުރާ ޕާޓީ ކަމަށްވާ ޔުނައިޓެޑް މެލޭސް ނެޝަނަލް އޯގަނައިޒޭޝަން (ޔޫއެމްއެންއޯ) ގެ އިތުރުން އެ ގައުމުގެ އެކިއެކި ސިޔާސީ ޕާޓީތަކުން މި ހަރަކާތުގައި ބައިވެރިވެއެވެ.
ޗެނަަލް ނިއުސް އޭޝިއާއިން ރިޕޯޓުކޮށްފަައިވާ ގޮތުގައި ޓްރަމްޕްގެ މި ނިންމުމާއި ދެކޮޅު ހެދުމުގެ ގޮތުން މެލޭޝިއާގެ އެކި ސަރަހައްދުތަކުގައި ނުވަ ލައްކައަށްވުރެ ގިނަ މީހުންދަނީ ނުރުހުން ފާޅުކުރަމުންނެވެ.
ފަލަސްތީނުން މެލޭޝިއާއަށް ކަނޑައަޅުއްވާފައިވާ ސަފީރު އަންވަރު އަލް އަގްހާ ނެރުއްވި ބަޔާނެއްގައި ވަނީ ފަލަަސްތީނާއި އެ ގައުމުގެ ރައްޔިތުންނާއެކު ތިބިކަން ހާމަކޮށްދިނުމަށް މެލޭޝިއާގެ ރައްޔިތުން ދައްކަވަމުން ގެންދަވާ ކަންކަަމަށް ޝުކުރު އަދާ ކުރައްވާ ކަމަށާއި އަދި އެ ގައުމުގެ ސަރުކާރާއި ބޮޑުވަޒީރު ނަޖީބް ރަޒަކް ދެއްވަމުން ގެންދަވާ އެއްބާރުލެއްވުމަށް ޝުުކުރު އަދާ ކުރައްވާ ކަމަށް ވިދާޅުވެފައެވެ.
މި ނިންމެވުމުގެ ކުރިން ފަލަސްތީނުގެ ރައީސް މަހްމޫދު އައްބާސްގެ ތަރުޖަމާނު ވަނީ އެ ނިންމެވުމުގެ ސަބަބުން ސަރަހައްދަށް ނުބައި ނަތީޖާއެއް ނުކުމެދާނެ ކަމުގެ އިންޒާރު ދެއްވާފައެވެ. އައްބާސް ވިދާޅުވެފައި ވަނީ މެދުއިރުމައްޗަށް ސުލްހަ ގެނައުމަށް ބާއްވާ ސުލްހައިގެ ވާހަކަތަކުގައި މެދުވެރިއެއްގެ ރޯލު އެމެރިކާއަށް އަދާނުކުރެވޭނެ ކަމަށެވެ.
މި މައްސަލައިގައި މެލޭޝިއާގެ އިތުރުން ތުރުކީއާއި އުރުދުންގައި ހުންނަ އެމެރިކާގެ އެމްބަސީތަކުގެ ކުރިމަތީގައި ވެސް ދަނީ މުޒާހަރާ ކުރަމުންނެވެ.
