ކިމް ޖޮންގ ނަމްގެ މަރު: މެލޭޝިއާގައި ހައްޔަރުކޮށްފައި ހުރި ވިއެޓްނާމް މީހާ ދޫކޮށްލަން އެދެފި

އުތުރުކޮރެއާގެ ލީޑަރު ކިމް ޖޮންގ އުންގެ އެއްބަފާ ބޭބެ، ކިމް ޖޮންގ ނަމްގެ މަރުގެ މައްސަލައިގައި ދައުވާ ލިބޭ ވިއެޓްނާމްގެ އަންހެނެއް ކަމަށްވާ ޑޮއާން ތީ ހުއޮންގ މިނިވަން ކުރުމަށް ވިއެޓްނާމުން މެލޭޝިއާއަށް ގޮވާލައިފިއެވެ.

ވިއެޓްނާމުން މިކަމަށް އެދިފައިމިވަނީ މި މައްސަލައިގައި ދައުވާ ލިބޭ އިންޑޮނީޝިއާގެ އަންހެނެއް ކަމަށްވާ އުމުރުން 25 އަހަރުގެ ސިއްތީ އައިސިއާ މިނިވަން ކުރިކަން ހޯމަ ދުވަހު ފަނޑިޔާރު އިއުލާނު ކުރެއްވުމާއެކުއެވެ.

ސިއްތީ މިނިވަންވީ އޭނާގެ މައްޗަށް ކުރެވުނު ދައުވާ ޕްރޮސިކިއުޓަރުން އަނބުރާ ގެންދިއުމުންނެވެ.

ވިއެޓްނާމްގެ ފޮރިން މިނިސްޓަރ ޕަމް ބިން ބިން ވަނީ މެލޭޝިއާގެ ފޮރިން މިނިސްޓަރ ސައިފުއްދީން އަބްދުﷲއަށް ފޯނުން ގުޅުއްވައި "ވިއެޓްނާމްގެ ރައްޔިތެއް ކަމަށްވާ ޑޮއާން ތީ ހުއޮންގއަށް ހިންގެނީ މިނިވަން އިންސާފުވެރި ޝަރީއަތެއްކަން ކަށަވަރު ކުރުމަށް އެދިވަޑައިގެންފައި"ކަމަށް ވިއެޓްނާމް ސަރުކާރުން ނެރުނު ބަޔާނެއްގައި ބުނެއެވެ.

ވިއެޓްނާމް ސަރުކާރުން ބުދަ ދުވަހު ނެރުނު އިތުރު ބަޔާނެއްގައި ޖަސްޓިސް މިނިސްޓަރ ލީ ތަން ލޮންގ މެލޭޝިއާގެ ޖަސްޓިސް މިނިސްޓަރ ޓޮމީ ތޯމަސްއަށް ޑޮއާން ތީ ހުއޮންގ ދޫކޮށްލުމަށް އެދިވަޑައިގެން ސިޓީ ފޮނުއްވާފައިވާ ކަމަށެވެ.

ކިމް ޖޮންގ ނަމް މަރާލާފައިވަނީ ޗައިނާގެ ބާރުގެ ދަށުގައި އޮންނަ މަކާއޫ އިން އެނބުރި މެލޭޝިއާ އަށް އައިތަނުން، 2017ވަނަ އަހަރުގެ ފެބްރުއަރީ މަހުގެ 13ވަނަ ދުވަހު، ކުއަލަ ލަމްޕޫރު އިންޓަރނޭޝަނަލް އެއަރޕޯޓުގެ ތެރޭގައެވެ.

މެލޭޝިއާގެ ކަމާއިގުޅޭ އިދާރާތަކުން ވަނީ، ވިހަގަދަ ނާރވް އޭޖެންޓެއް ކަމަށްވާ 'ވީއެކްސް' ކިމް ޖޮންގ ނަމްގެ މޫނުގައި އުނގުޅުމަށް އެ ދެއަންހެނުން ތަމްރީންކޮށްފައިވަނީ އުތުރު ކޮރެއާގެ އޭޖެންޓުން ކަމަށް ތުޙުމަތުކޮށްފަ އެވެ.

މި ދައުވާ ސާބިތުވެއްޖެނަމަ މަރުގެ ހުކުމް އަންނާނެއެވެ.