ޝަކުވާތަކަށް ހައްލުހޯދަން ރެސްޓޯރަންޓުތަކުން އެއްވުމަކަށް
26 ޖޫން 2021 | ހޮނިހިރު 17:42އެއްވުން ބާއްވަން ނިންމާފައިވަނީ 28 ޖޫން ވާ ހޯމަ ދުވަހު
ކެފޭ ރެސްޓޯރެންޓް
ކޮވިޑް-19އާ ގުޅިގެން އަޅާފައިވާ ފިޔަވަޅުތަކުގެ ސަބަބުން ރެސްޓޯރަންޓުތަކަށް ދިމާވެފައިވާ ދަތިތަކުގެ ޝަކުވާތަކާއެކު ރެސްޓޯރަންޓު އެސޯސިއޭޝަނުން ސުލްހަވެރި އެއްވުމެއް ބާއްވަން ނިންމައިފިއެވެ.
އެ އެސޯސިއޭޝަނުން ބުނީ އެއްވުން ބާއްވަން ނިންމާފައިވަނީ 28 ޖޫން ވާ ހޯމަ ދުވަހުގެ ހަވީރު ހަތަރެއް ޖަހާއިރު ކާނިވަލް ސްޓޭޖް ސަރަހައްދުގައި ކަމަށެވެ. "ކާންދޭ އަތުގައި ދަތް ނާޅާ" މި ނަމުގައި އެއްވުން ބާއްވަން ޖެހުނީ ރެސްޓޯރަންޓުތަކަށް ދިމާވެފައިވާ ދަތިތަކުގެ ޝަކުވާތަކަށް ކަމާބެހޭ އެއްވެސް އިދާރާއަކުން އެހީތެރިކަން ދީފައި ނުވާތީ ކަމަށް އެ އެސޯސިއޭޝަނުން ބުންޏެވެ.
ދާދި ފަހުން އެ އެސޯސިއޭޝަނުގެ ރައީސް ހާމިދު އަފީފް ރާއްޖެ ޓީވީއަށް ވިދާޅުވީ ފިޔަވަޅުތައް އަޅާއިރު އެންމެ ފުރަތަމަ ބަންދުކުރާ އަދި އެންމެ ފަހުން ލުއިދޭ ތަނަކީ ރެސްޓޯރަންޓުތައް ކަމަށެވެ. އެކަމަކު އެއަށްވުރެ ހަރުދަނާކޮށް އެކަންކުރެވޭނެ ގޮތްގޮތް ހުންނާނެ ކަމަށާއި މި ހާލަތުގައި އާންމުން ނިކުމެ އުޅެން ދީފައިވާ ލުއިތަކަށް ބަލާއިރު ރެސްޓޯރަންޓުތަކުން ޚިދުމަތް ނުހޯދޭންވީ ސަބަބެއް އޮތް ކަމަށް ގަބޫލުނުކުރައްވާ ކަމަށްވެސް ވިދާޅުވިއެވެ.
ހާމިދު ވިދާޅުވީ ޝަކުވާތަކާއެކު ކަމާބެހޭ ހުރިހާ އިދާރާއަކަށް ގޮސްފައިވާ ކަމަށެވެ. އެގޮތުން ބިލްތަކާ ގުޅިގެން އެކަމާ ބެހޭ އިދާރާތަކަށް ވެސް އަދި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހާ ވެސް ބައްދަލުކުރައްވާފައިވާ ކަމަށެވެ. އެކަމަކު އެއްވެސް ގޮތަކުން ލުޔެއް ލިބޭނެ އަލިމަގެއް ފެނިފައި ނުވާ ކަމަށް ހާމިދު ވިދާޅުވިއެވެ
ކޮވިޑް-19ގެ މި ހާލަތު ދެމި އޮންނަތާ ދޮޅު އަހަރުވާން ގާތްވެފައިވާއިރު ރެސްޓޯރަންޓު, ކެފޭތަކާއި އެފަދަ ކުދި ވިޔަފާރިތަކަކީ މިކަމުގެ ނޭދެވޭ އަސަރު އެންމެ ބޮޑަށް ކުރާ ދެ ބައެވެ.
