ކެމްޕެއިންގެ ޖަޒުބާތުގައި މަޖިލީހުގެ މެމްބަރުން މުޒާހަރާކުރިއަސް އެއީ މަޖިލީސް ހިންގުމުގެ އުސޫލެއް ނޫން ކަމަށް ވިދާޅުވެ މަޖިލީހުގެ ރައީސް މުހައްމަދު ނަޝީދު ރައްޔިތުންގެ މަޖިލީހުގެ މެމްބަރުންނަށް ވަރަށް ބޮޑަށް ފާޑު ވިދާޅުވެއްޖެއެވެ.
ހޯމަ ދުވަހުގެ ޖަލްސާ އަށް ރައްޔިތުންގެ މަޖިލީހުގެ ދާއިމީ ކޮމިޓީތަކުގައި ހިމެނިވަޑައިގަންނަވާ ސިޔާސީ ޕާޓީތަކަށް ނިސްބަތްވެވަޑައިގަންނަވާ މެންބަރުންނާއި، ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުން ތަމްސީލުކުރާނެ ގޮތަށް ގެނެވޭ ބަދަލާގުޅޭ މައްސަލަ އެޖެންޑާކޮށްފައިވެއެވެ. ނަމަވެސް އެކަން ކުރައްވާފައި ނުވާތީ މެމްބަރުން ވަނީ ނަޝީދަށް ވަަރަށް ބޮޑަށް ފާޑުވިދާޅުވެފައެވެ. މެމްބަރުން ނުރުހުން ފާޅުކުރައްވަން ފެއްޓެވުމުން ނަޝީދު ވަނީ ދާންދޫ ދާއިރާގެ މެމްބަރު ޔައުގޫބު އަބްދުﷲ (ދާންދޫ)، ކެލާ ދާއިރާގެ މެމްބަރު އިބްރާހިމް ޝަރީފް، ތިނަދޫ އުތުރު ދާއިރާގެ މެމްބަރު އަބްދުލްމުގުނީގެ ނަން އިއްވަވާ އެ ބޭފުޅުން މަޖިލީހުން ނެރެދެއްވުމަށް ސަރޖަންސްޓް އެޓް އާރމްސްގެ ކިބައިން އެދިވަޑައިގެންފައެވެ.
އޭގެ ފަހުން މަޖިލީހުގެ ކެޔޮދޫ ދާއިރާގެ މެމްބަރު ހުސައިން ގާސިމް މަޖިލީހުން ބޭރަށް ނުކުންނަވަން އުޅުމުން އެކަމާއި ހިތްހަމަޖެހިވަޑައި ނުގެން ދެއްކެވި ވާހަކަފުޅުގައި ކެޔޮދޫ ދާއިރާގެ މެމްބަރަށް ތަޅުން ދޫކޮށް ވަޑައި ނުގެންނެވޭނެ ކަމަށް ވެސް ނަޝީދު ވިދާޅުވިއެވެ. ނަޝީދު ވަނީ އެމްޑީޕީން ރާއްޖޭގެ ރަށްރަށަށް ދިއުމުން ހަމަނުޖެހުން އުފެދޭ ކަމަށް ވިދާޅުވެފައެވެ. އަދި މަޖިލީހުގައި ވެސް މެމްބަރުން ދައްކަވަނީ އެ މަންޒަރު ކަމަށާއި އެއީ ރާއްޖޭގެ ރައްޔިތުން އެދޭ ގޮތް ނޫން ކަމަށް ނަޝީދު ވިދާޅުވިއެވެ. ސުލްހަވެރި ސިޔާސީ ހަރަކާތް ހިންގުމަށް ޤާނޫނު އަސާސީން ފުރުސަތު ލިބިފައިވާއިރު އެ ފުރުސަތު ދޫކޮށްލާފައިވާ ކަމަށް ނަޝީދު ސިފަކުރެއްވިއެވެ. މީގެ އިތުރުން މަޖިލީހަށް ޕެޕަރ ސްޕްރޭ ޖަހާ، ދަގަނޑު މުގުރާއި ކަރަންޓު މުގުރު ނުގެނެވޭނެ ކަމަށް ނަޝީދު ވިދާޅުވިއެވެ. އަދި މެމްބަރުން ރަށްރަށަށް ވަޑައިގެން ބައެއް ފަހަރު ދައްކަވާ މަންޒަރު މަޖިލީހުގެ ތެރޭގައި ނުދެއްކެވުމަށް އިލްތިމާސްކުރައްވާ ކަމަށް ނަޝީދު ވިދާޅުވިއެވެ.
އެމްޑީޕީން ރަށްރަށުގައި ވެސް ދައްކަނީ ހުތުރު މަންޒަރުކަމަށް ވިދާޅުވެ ނަޝީދު ވަނީ އެމްޑީޕީ އަށް ވަރަށް ބޮޑަށް ފާޑު ވިދާޅުވެފައެވެ. އަދި މެމްބަރުން ގަވާއިދަށް ހުރުމަތްތެރިކޮށް ނުހިތްތަވާ ކަމަށް ވިދާޅުވެ ޖަލްސާ ވަނީ މެދުކަނޑާލައްވާފައެވެ.
މެމްބަރުން ނުރުހުން ފާޅުކުރެއްވީ މަޖިލީސް ކުރިއަށް ގެންދަން ޖެހޭގޮތަށް ކުރިޔަށް ނުގެންދަވާ އުސޫލާއި ޚިލާފަށް ކަންކަން ކުރައްވާތީ ކަމަށް ވިދާޅުވެއެވެ. މަޖިލީހުގެ ރައީސް އާއި ނައިބު ރައީސްގެ އިތުބާރު ނެތްކަމުގެ މައްސަލަ ވެސް މި ސަބަބާއި ހުރެ ދަނީ ލަސްވަމުންކަމަސް މެމްބަރުން ވިދާޅުވިއެވެ. އަދި މިނިވަން މުއައްސަސާތަކަށް މެމްބަރުން އައްޔަންކުރުން ފަދަ މުހިންމު މަސައްކަތްތައް މަޖިލީހުގައި ނުކުރެވި އެބަހުއްޓެވެ. މުހިންމު ޤާނޫނުތައް ވެސް މަޖިލީހުގައި ކުރިއަށް ނުގޮސް އެބަހުއްޓެވެ.
