ފްލެޓުތަކާ ގުޅިގެން ހުރި ޝަކުވާތަކަށް އެކަށީގެންވާ ވަރަށް ފްލެޓު ކޮމިޓީން ޖަވާބުދާރީއެއް ނުވޭ: މަޖިލިސް ކޮމިޓީ
ސިވިލް ސަރވިސް އަދި ބައެއް އެހެން ކެޓަގަރީތަކުގެ ދިރިއުޅުމުގެ ހާލަތު ރަނގަޅަށް ބަލާފައެއް ނުވޭ
ހިޔާ ފްލެޓްތައް
ރައީސް ޔާމީންގެ ސަރުކާރުގައި ކުރިއަށް ގެންދިޔަ ހިޔާ މަޝްރޫޢު ފްލެޓުތަކުގެ ވަގުތީ ލިސްޓު މި ސަރުކާރުން އާންމުކުރުމުން އެ ލިސްޓަށް ހުށަހެޅި ޝަކުވާތަކަށް އެންމެ އެކަށީގެންވާ ޖަވާބެއް ފްލެޓު ކޮމިޓީން ދީފައި ނުވާ ކަމަށް ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީން އާންމުކުރި ރިޕޯޓުގައި ބުނެފިއެވެ.
ހިޔާ މަޝްރޫޢުގެ ފްލެޓުތައް ލިބޭ މީހުންގެ ދާއިމީ ލިސްޓު އާންމުކުރުމާ އެކީ އެ ލިސްޓާ މެދު ހިތްހަމަނުޖެހުން ފާޅުކޮށް އާންމުންގެ ގިނަ ޝަކުވާތަކެއް ފެންމަތިވެފައިވާއިރު، އެމައްސަލަތައް ރައްޔިތުންގެ މަޖިލީހުގެ ގައުމީ ތަރައްގީ ކޮމިޓީން ބަލާފައި ވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އެދިލެއްވުމުގެ މަތިންނެވެ.
އެކަން ބަލައި ކޮމިޓީން އާންމުކުރި ރިޕޯޓުގައި ޖުމުލަ ހަ ކަމެއް ފާހަގަކޮށްފައިވާއިރު، ކޮމިޓީން ބުނީ ވަގުތީ ލިސްޓު އާންމުކުރުމުން އެ ލިސްޓަށް ހުށަހަޅާފައިވާ ޝަކުވާތަކަށް ފްލެޓު ކޮމިޓީން އެކަށީގެންވާ ގޮތަކަށް ޖަވާބުދީފައި ނުވާކަމަށެވެ. އެހެންވެ އެކަން ބަލައި އެ އެންމެނަށް ފުރިހަމައަށް ޖަވާބު ދިނުމަށް ކޮމިޓީން ވަނީ ހުށަހަޅާފައެވެ.
މީގެ އިތުރަށް ދާއިމީ ލިސްޓާ ގުޅިގެން ފެންމަތިވެފައިވާ ކަންބޮޑުވުންތަކުގެ ތެރެއިން ފްލެޓަށް އެދި ހުށަހެޅުމަށް ފަހު ފުރިހަމައަށް ޕޮއިންޓު ލިބިފައިވާ މީހުންނަށް ވެސް ފްލެޓު ލިބިފައިނުވާ ކަމަށާއި، ކޮމިޓީން ދިރިއުޅުމުގެ ހާލަތު އެންމެ ރަނގަޅަށް ބަލާފައި ނުވާކަމުގެ ޝަކުވާ ވެސް ހުށަހަޅާފައިވާކަން މަޖިލިސް ކޮމިޓީގެ ރިޕޯޓުގައި ފާހަގަކޮށްފައިވެއެވެ. އެކަންކަން ވެސް އަލުން ބަލައި، އެއީ ފެލްޓު ލިބުން ހައްގު ބައެއްތޯ ކަށަވަރުކުރުމަށް ކޮމިޓީން ހުށަހަޅާފައިވެއެވެ. މީގެ އިތުރަށް ސިވިލް ސަރވިސް ކެޓެގަރީގެ ފްލެޓުތައް ވެސް ދޫކޮށްފައިވަނީ ދިރިއުޅުމުގެ ހާލަތު ރަނގަޅަށް ނުބަލާކަން ފާހަގަކޮށް އެކަން ވެސް މުރާޖަޢާ ކުރުމަށް ކޮމިޓީގެ ރިޕޯޓުގައިވެއެވެ.
ފްލެޓަށް ހުޅުވާލި ކެޓެގަރީތަކުގެ ތެރޭގައި ޑޮކްޓަރުންނާއި ނަރުހުން ފަދަ ރަނގަޅު މަގާމުތަކުގައި އެކަށީގެންވާ މުސާރައެއް ލިބޭނެ ފަދަ މީހުންނަށް ހާއްސަ ކެޓެގަރީއެއް ހިމަނާފައިވާތީ އެކަން ފާހަގަކޮށް އެއީ އިޖްތިމާއީ ގެދޮރުވެރިކަން އެންމެ އެކަށީގެންވާ ގޮތެއްގައި ދޫކުރެވޭނެ ގޮތެއް ނޫން ކަމަށް ރިޕޯޓުގައި ވެއެވެ. އެހެންކަމުން އެ ކެޓަގަރީ އުވާލައި އެ ކެޓަގަރީ އަށް ކަނޑައަޅާފައި ހުރި ފްލެޓުތައް ވެސް ފްލެޓަށް ހުށަހަޅާފައިވާ ފްލެޓު ހައްގު އާންމުންނަށް ދޫކުރުމަށް ރިޕޯޓުގައި ހުށަހަޅާފައިވެއެވެ.
ހިޔާ ފްލެޓު ޓަވަރުތަކުގެ އެންމެ ތިރީ ފްލޯތައް ކޮމާޝަލް ބޭނުމަށް ދޫކޮށްފައިވާއިރު އެތަނުން 280 ފްލެޓު މަދުވެއެވެ. ކޮމިޓީން ބުނީ އޭގެ ސަބަބުން ފްލެޓު ގެއްލިފައިވާ މީހުން ތިބި ނަމަ ސަރުކާރުން ދެން އެންމެ އަވަހަށް ހިންގާ ގެދޮރުވެރިކަމުގެ މަޝްރޫއެއްގައި އެމީހުންނަށް ފްލެޓު ދިނުމަށް ވެސް ކޮމިޓީ ރިޕޯޓުގައި ހުށަހަޅާފައިވެއެވެ.
ރައީސް ޔާމީންގެ ސަރުކާރުގައި 2017 ވަނަ އަހަރު މަސައްކަތް ފެށި ހިޔާ މަޝްރޫގެ ފްލެޓުތަކުގައި ހުރީ 6720 ފްލެޓެވެ. ރައީސް ޔާމީން ސަރުކާރުގެ އެންމެ ފަހު ދުވަހު އެ ފްލެޓުތަކަށް ލިޔުން ދޫކޮށްފައިވާއިރު 9،000 ލިޔުން ދޫކޮށްފައިވާ ކަމަށް ފްލެޓު ކޮމިޓީން ބުނެފައިވެއެވެ. މި ސަރުކާރުން ވެރިކަމާ ހަވާލުވި އިރު ނިމިފައިވަނީ އެ ފްލެޓުތަކުގެ 44 އިންސައްތަ މަސައްކަތް ކަމަށާއި ފްލެޓުތައް ދޫކުރުމަށް ދާއިމީ ލިސްޓު ހަދާ އާންމުކޮށްފައި ވަނީ ފްލެޓާ ގުޅުން ހުރި ހުރިހާ ކަމެއް އަލުން ދިރާސާކުރުމަށް ފަހު ކަމަށް ވެސް ކޮމިޓީން ބުނެފައިވެއެވެ.
