އިންތިހާބީ ޝަކުވާތަކަށް ހޮނިހިރު ދުވަހާއި އާދިއްތަ ދުވަހު ހައިކޯޓު ހުޅުވަން ނިންމައިފި
20 ސެޕްޓެމްބަރު 2018 | ބުރާސްފަތި 16:23އިންތިޚާބީ ޝަކުވާގެ މައްސަލަތައް ބެލުމުގެ އިޚްތިޞާޞް ލިބިދީފައިވަނީ ދިވެހިރާއްޖޭގެ ހައިކޯޓަށް
ދިވެހިރާއްޖޭގެ ހައިކޯޓު
މިއަންނަ އާދިއްތަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބާ ގުޅޭ އިންތިޚާބީ ޝަކުވާގެ މައްސަލަތައް ހުށަހެޅުމަށް ބޭނުންވާ ފަރާތްތަކަށް އެކަން ފަސޭހައިން ކުރެވޭނެ އިންތިޒާމު ހަމަޖެއްސުމަށް ހޮނިހިރު ދުވަހާއި އާދިއްތަ ދުވަހު ރާއްޖޭގެ ހައިކޯޓުގެ ރެޖިސްޓްރޭޝަން ހުޅުވާފައި ހުންނާނެ ކަމަށް އެކޯޓުން ބުނެފިއެވެ.
ހައިކޯޓުން ބުނީ، އިންތިޚާބީ ޝަކުވާގެ މައްސަލަތައް ހުށަހެޅުމަށް ބޭނުންވާ ފަރާތްތަކަށް އެކަން ފަސޭހައިން ކުރެވޭނެ އިންތިޒާމު ހަމަޖެއްސުމަށްޓަކައި 22 ސެޕްޓެމްބަރ 2018 ވާ ހޮނިހިރު ދުވަހު މެންދުރު ފަހު 14:00 ން ރޭގަނޑު 22:30 ށް އަދި، 23 ސެޕްޓެމްބަރ 2018 ވަނަ ދުވަހުގެ ހެނދުނު 8:00 ން އެރޭ ރޭގަނޑު 12:00 އަށް ހައިކޯޓުގެ ރެޖިސްޓްރޭޝަން ހުޅުވިފައި ހުންނާނެ ކަމަށެވެ.
އިންތިޚާބީ ޝަކުވާގެ މައްސަލަތައް ބެލުމުގެ އިޚްތިޞާޞް ލިބިދީފައި ވަނީ ދިވެހިރާއްޖޭގެ ހައިކޯޓަށެވެ. އިންތިޚާބީ ޝަކުވާގެ މައްސަލަތައް، އިންތިޚާބުގައި ވާދަކުރާ ކެންޑިޑޭޓަކަށް ނުވަތަ، ސިޔާސީ ޕާޓީއަކަށް، އޮބްޒަރވަރަކަށް މޮނިޓަރ ކުރާ މީހަކަށް ނޫންނަމަ އިންތިޚާބާ ބެހޭ ކަންކަން ހިންގައި ބަލަހައްޓާ މީހަކަށްވެސް ހައިކޯޓަށް ހުށަހެޅިދާނެއެވެ. އިންތީޚާބީ މައްސަލަތައް ހުށަހަޅާނީ އިންތިޚާބީ ޝަކުވާގެ މައްސަލަތައް ހުށަހަޅާ ފޯމުން ކަމަށް ހައިކޯޓުން މައުލޫލާތުދެއެވެ.
ހައިކޯޓުން ބުނީ ކޯޓު ހުޅުވާފައި ހުންނަ ރަސްމީ ގަޑި ފިޔަވައި އެހެން ގަޑިއެއްގައި މައްސަލައެއް ހުށަހަޅާ ނަމަ، ހައިކޯޓުގެ ރެޖިސްޓްރޭޝަނާ ގުޅައިގެން ކުރިއަށް ގެންދެވިދާނެ ކަމަށާއި، އިންތިޚާބީ މައްސަލަތަކާ ގުޅިގެން ހައިކޯޓާ މުޢާމަލާތު ކުރުމަށް elections@highcourt.gov.mv އަށް އީމެއިލް ކުރުމުން ހައިކޯޓުގެ ފަރާތުން އެ ފަރާތަކާ ގުޅައި، އެކަން އޮތް ގޮތެއް ސާފުކޮށްދޭނެ ކަމަށެވެ.
އިންތިޚާބީ މައްސަލަތައް ހުށަހެޅުމުގައި އެންމެ ބޮޑު ސަމާލުކަމެއް ދޭން ޖެހޭނެ ކަމަކީ، ބޭނުންވާ ހުރިހާ މައުލޫމާތެއް ފުރިހަމަކޮށް، މައްސަލައިގެ ލިޔުންތަކާއި އެކު މައްސަލަ ހުށަހެޅުންކަން ފާހަގަކުރައްވައި ހައިކޯޓުން ބުނީ މައްސަލަ ހުށަހަޅާ ސަބަބާއި، އެކަމުގެ ތަފްސީލް އަދި މައްސަލައާއި ގުޅޭ ހެކިތައް ހުށަހެޅުމަށް ވަރަށް ބޮޑަށް ސަމާލުކަން ދޭން ޖެހޭ ކަމަށެވެ.
އިންތިޚާބީ މައްސަލަތައް ހައިކޯޓަށް ހުށަހެޅުމަށް ޤާނޫނުގައި ކަނޑައަޅާފައިވާ މުއްދަތަކީ، އިންތިޚާބުގެ ރަސްމީ ނަތީޖާ އިޢުލާން ކުރާ ދުވަހުން ފެށިގެން 14 ދުވަހެވެ. އަދި ރަސްމީ ނަތީޖާ އިޢުލާން ކުރާ ދުވަހުން ފެށިގެން 30 ދުވަހުގެ ތެރޭގައި އިންތިޚާބީ ހުރިހާ މައްސަލައެއް ބަލާ ނިންމަން ޖެހޭ ކަމަށް ހައިކޯޓުން މައުލޫމާތުދެއެވެ.
އިންތިޚާބީ މައްސަލަތައް ހުށަހަޅާ ފޯމްތައް، ހައިކޯޓުގެ ވެބްސައިޓުން ޑައުންލޯޑް ކުރެވޭނެއެވެ.
