ސެޕްޓެމްބަރ މަހުގެ 9 ވަނަ ދުވަހު އޮންނަ ރިޔާސީ އިންތިޚާބުގައި ވޯޓުލާ މީހުންގެ ލިސްޓް އާންމުކޮށް ޝަކުވާ ހުށަހެޅުމުގެ ފުރުސަތު ހުޅުވާލާފައިވާއިރު ދުވަހުން ދުވަހަށް ޝަކުވާތަކަށް އެޓެންޑްކުރަމުންދާ ކަމަށް އިލެކްޝަންސް ކޮމިޝަން (އީސީ)ގެ ރައީސް ފުއާދު ތައުފީގު ވިދާޅުވެއްޖެއެވެ.

އިލެކްޝަންސް ކޮމިޝަނުން ވަނީ ޖޫން 22 ވާ ބުރާސްފަތި ދުވަހުގެ ނިޔަލަށް ވޯޓާސް ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލާފައެވެ. އީސީން އިންތިޚާބަށް ވަމުންދާ ތައްޔާރީތަކާއި ގުޅޭގޮތުން ވާހަކަދައްކަވަމުން އީސީގެ ރައީސް ވިދާޅުވީ ދުވަހުން ދުވަހަށް ޝަކުވާތަކަށް އެޓެންޑްވަމުންދަނީ ޝަކުވާ ހުށަހެޅުމުގެ މުއްދަތު ހަމަވާއިރު ފައިނަލް ލިސްޓް ވީހާވެސް އަވަހަށް އެކުލަވާލުމަށްކަމަށެވެ. ފައިނަލް ލިސްޓް އާންމުކުރުމާއެކު ދެން ލިސްޓަށް ބަދަލުނުގެނެވޭނެކަން ފާހަގަކުރައްވާ ފުއާދު ވިދާޅުވީ މިމުއްދަތުގެ ތެރޭގައި ލިސްޓުގައި އެމީހެއްގެ ނަން އޮތްތޯ ޗެކްކޮށް ޝަކުވާ ހުށަހެޅުން ވަރަށް މުހިންމު ކަމަށެވެ.

އީސީން ވަނީ މެއި މަހުގެ ތެރޭގައިވެސް ވޯޓާސް ލިސްޓް އާންމުކޮށް ޝަކުވާ ހުށަހެޅުމަށް ހުޅުވާލާފައެވެ. ފުއާދު ވިދާޅުވީ އެމުއްދަތުގެ ތެރޭގައިވެސް ޝަކުވާ ލިބިފައިވާކަމަށެވެ. އެގޮތުން ނިޔާވެފައިވާ 93 މީހެއްގެ ނަން ލިސްޓުގައި އޮވެގެންނާއި، އެޑްރެސް ބަދަލުވެގެން 88 ޝަކުވާ އާއި 18 އަހަރު ނުވާ 3 ޝަކުވާގެ އިތުރުން ނަން ބަދަލުވުމުގެ ޝަކުވާއެއް ހުށަހެޅުނުކަމަށެވެ. ލިސްޓް މިހާރު އާންމުކޮށްފައިވަނީ އެކަންކަމަށް ބެލުމަށްފަހުކަމަށް ފުއާދު ވިދާޅުވިއެވެ.

2023 ސެޕްޓެމްބަރ 9ށް 18 އަހަރު ފުރޭ 282672 މީހުންގެ ވޯޓުދިނުމުގެ ޙައްޤު ލިބިފައިވާ ލިސްޓު ދިވެހި ސަރުކާރުގެ ގެޒެޓްގައި ވަނީ ޝާއިޢުކޮށްފައެވެ. ލިސްޓުގައި ނަން އޮތްތޯ 1414 އަށް ގުޅައިގެން ނުވަތަ އެސް.އެމް.އެސްއެއް ފޮނުވައިގެން ވެސް ޗެކް ކުރެވޭނެއެވެ. މި ލިސްޓު އީސީގެ ވެބްސައިޓުންނާއި، ރަށު ކައުންސިލްތަކާއި، ސިޓީ ކައުންސިލްތަކުގެ އިދާރާއިން ވެސް ބެލޭނެއެވެ.