ކޮވިޑް ޖެހިގެން ހއ. އަތޮޅު ހޮސްޕިޓަލްގައި މީހަކު ނިޔާވެއްޖެ، މިއީ 209 ވަނަ މަރު

ކޮވިޑް-19 ޖެހިގެން އިތުރު މީހަކު ރާއްޖޭގައި ނިޔާވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނީ ނިޔާވެފައިވަނީ 51 އަހަރުގެ ބަންގްލަދޭޝްގެ ފިރިހެނެއްކަމަށެވެ. މިމީހާ ނިޔާވެފައިވަނީ ހއ އަތޮޅު ހޮސްޕިޓަލްގައި، ހުކުރު ދުވަހުގެ 11:30ގައެވެ. މިއީ ރާއްޖޭގައި މިބަލީގައި ނިޔާވި 209 ވަނަ މީހާއެވެ.

ކޮވިޑް ޖެހިގެން ބުރާސްފަތި ދުވަހު ވަނީ އުމުރުން 34 އަހަރުގެ ދިވެހި ފިރިހެނަކު ނިޔާވެފައެވެ. އަދި އަންގާރަ ދުވަހު ވަނީ 79 އަހަރުގެ ދިވެހި އަންހެނަކު ނިޔާވެފައެވެ. ކޮވިޑް ޖެހިގެން މިދިޔަ ހަފްތާގެ ހޮނިހިރު ދުވަހުވެސް ތިން މީހަކު ވަނީ ނިޔާވެފައެވެ.

ކޮވިޑް ޖެހިގެން ޖޫން މަހުގެ މިހާތަނަށް ރާއްޖޭގައި 40 މީހަކު ވަނީ ނިޔާވެފައެވެ. ފާއިތުވި މެއި މަހު އެކަނި ކޮވިޑް ބަލި ޖެހިގެން 88 މީހަކު ވަނީ ނިޔާވެފައެވެ.

ރާއްޖޭގައި ކޮވިޑްގެ ހާލަތު އޭޕްރީލް މަހުގެ ފަހުކޮޅުން ފެށިގެން ގޯސްވަމުން އައިސް މެއި މަހު ވަނީ ހާލަތު ވަރަށް ބޮޑަށް ގޯސްވެފައެވެ. އެއާއެކު ކޮވިޑް ފެތުރުން ކޮންޓްރޯލްކުރުމަށް އެޅި ފިޔަވަޅުތަކާއެކު މިހާރު ހާލަތު އަންނަނީ ރަނގަޅުވަމުންނެވެ. އެގޮތުން ޖޫން މަސް ފެށުނު ފަހުން ދުވާލެއްގެ މައްޗަށް ޕޮޒިޓިވްވާ ކޭސްތަކުގެ އަދަދު ވަރަށް ބޮޑުތަން ދަށްވެފައިވާއިރު، އަޅާފައިވާ ފިޔަވަޅުތަކަށްވެސް އަންނަނީ ލުއިތައް ދެމުންނެވެ.