ޚިތާނު ކުރުމުގެ ނަމުގައި އަންހެން ކުދިންގެ ޖިންސީ ގުނަވަނަށް ގެއްލުން ދިނުމަކީ ލާއިސްލާމީ ނާތަހުޒީބީ އަމަލެއް ކަމަށް ކުރީގެ ރައީސް މައުމޫން ޢަބްދުލް ޤައްޔޫމް ވިދާޅުވެއްޖެއެވެ.

މިކަމަކީ އެފްރިކާ ހިސާބުގެ ބައެއް ސަގާފަތުގެ ތެރެއިން އައިސް އިހުޒަމާނުގައި ރާއްޖޭގައި ވެސް ކޮށް އުޅުނު ކަމެކެވެ. އެކަން އަނެއްކާ ވެސް ރާއްޖޭގައި ފެތުރެމުން އަންނަ ކަމުގެ ވާހަކަތައް ފެންމަތިވެފައިވާއިރު ބައެއް ދީނީ އިލްމުވެރިން ވެސް އަންނަނީ އެކަމަށް ބާރުދޭ ގޮތަށް ވާހަކަދައްކަމުންނެވެ. އެކަމާ ގުޅިގެން ރައީސް މައުމޫން ކުރެއްވި ޓުވީޓެއްގައި ވިދާޅުވީ އިސްލާމް ދީނުގައި ޚިތާނުކުރުން ޝަރުޢު ކުރައްވާފައިވަނީ ހަމައެކަނި ފިރިހެން ކުދިންނަށް ކަމަށާއި، އަންހެންކުދިން ޚިތާނު ކުރުމެއް ނޯންނަ ކަމަށެވެ.

ރައީސް މައުމޫން ވިދާޅުވީ މިކަމަކީ ދީނުގައި ކަނޑައެޅިގެން ޙަރާމް ކަމެއްކަމަށް މިސްރުގެ ފަތުވާދޭ އިދާރާއިން ބުރާސްފަތި ދުވަހު ނެރުނު ބަޔާނުގައި ބުނެފައިވާ ކަމަށެވެ.

އަންހެން ކުދިން ޚިތާނުކުރުމުގެ ސަގާފަތް އަލުން ރާއްޖޭގައި އާލާވަމުން އަންނަކަން ދިރާސާތަކުން ދައްކާފައިވާ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް)އިން ވަނީ ބުނެފައެވެ. ރާއްޖެ ޓީވީގެ "ފަލަ ސުރުޚީ" ޕްރޮގްރާމްގައި ވާހަކަދައްކަވަމުން އެޗްއާރްސީއެމް ކޮމިޝަނަރު ޝިފާތު ޢަބްދުއްރައްޒާޤް ވިދާޅުވީ ރާއްޖޭގައި އަންހެން ކުދިން ޚިތާނުކުރުމާއި، އެކަމަށް ހިތްވަރު ދިނުން އިތުރުވަމުން އަންނަކަން ދިރާސާތަކުން ދައްކާ ކަމަށެވެ.

މިކަމަކީ ރާއްޖޭގައި ގާނޫނީ ކުށެއްގެ ގޮތުގައި ކަނޑައެޅުމަށް މަސައްކަތް ފަށާފައިވާކަމަށް އެޓަރނީ ޖެނެރަލް އިބްރާހީމް ރިފްޢަތު މިދިޔަ ނޮވެމްބަރު މަހު ވަނީ ވިދާޅުވެފަ އެވެ. ރާއްޖޭގެ ކޮންމެ 10 އަންހެނަކުން އެކަކު ޚިތާނު ކޮށްފައިވާކަމަށް ޔުނިސެފުން ވަނީ ބުނެފައެވެ.

ދުނިޔޭގެ ބައެއް އެހެން ހިސާބުތަކުގައި ވެސް މިސަގާފަތް އޮންނައިރު، އެކަމަކީ އެއްވެސް ފައިދާއެއް ނެތް ގެއްލުންބޮޑު ކަމެއް ކަމަށް ދުނިޔޭގެ ސިއްހަތު ޖަމިއްޔާއިން ބުނެފައިވެއެވެ. އޭގެ ސަބަބުން ބައެއް މީހުން މަރުވެސް ވެފައިވާއިރު، އެކަމަކީ އަންހެނުންގެ ޖިންސީގުނަވަނަށް އެކި ކަހަލަ ބަލިތައް ޖެހި އެތައް އުނދަގުލެއް ކުރިމަތިކުރުވާ ކަމެކެވެ.