އީރާނުގެ ލީޑަރު ޚާމަނާއީ 'ކޮވިރާން ބަރަކާތު' ވެކްސިނުގެ ފުރަތަމަ ޑޯޒް ޖައްސަވައިފި

އިރާނުގެ ސުޕްރީމް ލީޑަރު އަލީ ޚާމަނާއީ އެގައުމުން ކޮވިޑް-19ށް އުފައްދާފައިވާ ވެކްސިން 'ކޮވިރާން ބަރަކާތު' ވެކްސިނުގެ ފުރަތަމަ ޑޯޒް ޖައްސަވައިފިއެވެ.

ޚާމަނާއީ ވިދާޅުވެފައިވަނީ އެހެން ގައުމުތަކުގެ ވެކްސިން ޖެހުމަށް ވުރެ އަމިއްލަ ގައުމުން އުފައްދާފައިވާ ވެކްސިން ޖެހުން މާ ރަނގަޅުވާނެ ކަމަށާއި އެއީ ލިބޭ ގައުމީ ފަޚުރެއް ކަމަށެވެ.

މީގެ އިތުރުން އެމެރިކާ އާއި އިނގިރޭސިވިލާތުގެ ވެކްސިނަށް ބަރޯސާ ނުވެވޭނެ ކަމަށާއި، އެ ގައުމުތަކުން ބޭނުންވަނީ އެހެން ގައުމުތަކަށްވެސް ބަލި ފެތުރުމަށް ކަމަށް ޚާމަނާއީ މީގެ ކުރިން ވަނީ ވިދާޅުވެފައެވެ. އެހެންނަމަވެސް، އިރާނަށް އިތުބާރު ހިފޭ ގައުމެއްގެ ވެކްސިނަކަށް ހުއްދަ ދިނުމާމެދު އިއުތިރާޒެއް ނެތް ކަމަށްވެސް ވަނީ ވިދާޅުވެފައެވެ.

އަމިއްލައަށް ކޮވިޑަށް ދެ ވެކްސިން އުފެއްދުމުގެ މަސައްކަތް އީރާނުން ކުރަމުންދާއިރު ކޮވިރާން ވެކްސިން އިންސާނުންގެ ގަޔަށް ޖަހައިގެން ޓެސްޓް ކުރަން ފަށާފައިވަނީ މިދިޔަ ޑިސެމްބަރ މަހުއެވެ. މި ވެކްސިން ކުއްލި ހާލަތްތަކުގައި ބޭނުން ކުރުމުގެ ހުއްދަ ފާއިތުވި ހަފުތާގައި ދީފައިވާއިރު ވެކްސިނުގެ ރައްކާތެރިކަމާ ގުޅިގެން އިރާނުން ބުނެފައިވަނީ ވެކްސިން ޖަހާފައިވާ މީހުންނަށް ކޮވިޑާ ދެކޮޅަށް 85 އިންސައްތަ އިމިއުނިޓީ ލިބޭކަމަށް ދިރާސާތަކުން ހާމަވެފައިވާ ކަމަށެވެ.

އިރާނުން ކޮވިޑަށް އިތުރު ވެކްސިންތައް އުފެއްދުމުގެ މަސައްކަތް ކުރަމުންދާއިރު އެގައުމަށް ކޮވެކްސް ފެސިލިޓީގެ ދަށުން އާބާދީގެ ދެބައިކުޅަ އެއްބައި މީހުންނަށް ފުދޭ މިންވަރަށް ވެކްސިންގެ ޑޯޒު ލިބުމުގެ ފުރުސަތު އޮތްނަމަވެސް އެމެރިކާގެ ފިއްތުންތައް ކުރިމަތިވެދާނެ ކަމުގެ ބިރަށް ބައިނަލްއަގްވާމީ ބޭންކުތަކުން އެގައުމަށް އެހީތެރިކަން ފޯރުކޮށްދިިނުމަށް ޖެހިލުންވާ ކަމަށް މީޑިއާ ރިޕޯޓުތައް ބުނެއެވެ.