7 ރަށެއްގައި ރިސޯޓް ތަރައްގީކުރުމަށް 13 ބިޑް!
25 ޖޫން 2021 | ހުކުރު 05:48ބީލަން ހުށަހަޅާފައިވާ ކުންފުނިތަކުގެ ތެރޭގައި ގިނައީ ދިވެހި ކުންފުނިތައް
ރާއްޖޭގެ ރަށްތަކެއް
ރާއްޖޭގެ 16 ރަށެއްގައި ރިސޯޓް ތަރައްގީކުރުމަށް ޝައުގުވެރިވާ ފަރާތްތަކުން ބިޑް ހުށަހެޅުމަށް ޓޫރިޒަމް މިނިސްޓްރީން ހުޅުވާލި ފުރުސަތުގައި ހަތް ރަށެއް ތަރައްގީކުރުމަށް ޝައުގުވެރިކަން ފާޅުކޮށް ބިޑް ހުށަހަޅާފައިވާ ކަމަށް ޓޫރިޒަމް މިނިސްޓްރީން ބުނެފިއެވެ.
ޓޫރިޒަމް މިނިިސްޓްރީން ބުނީ ޖޫން 24 ވަނަ ދުވަހު 9 ފަރާތަކުން ތަފާތު ހަތް ރަށަކަށް 13 ބިޑް ހުށަހަޅާފައިވާ ކަމަށެވެ. އަދި ހުށަހެޅިފައިވާ ޕްރޮޕޯޒަލްތަކުގެ ތެރެއިން، އެންމެ މަތިން ހުށަހަޅާފައިވާ ލީޒް އެކުއިޒިޝަން ކޮސްޓްގެ ފަރަގު މިނިމަމް ލީޒް އެކުއިޒިޝަން ކޮސްޓްގެ 140 އިންސައްތަ އަށްވުރެއް އިތުރުކަން މިނިސްޓްރީން ފާހަގަކުރެއެވެ. އަދި ބީލަން ހުށަހަޅާފައިވާ ކުންފުނިތަކުގެ ތެރޭގައި ގިނައީ ދިވެހި ކުންފުނިތައް ކަމަށް ޓޫރިޒަމް މިނިސްޓްރީން ބުނެއެވެ.
ރިސޯޓް ތަރައްގީކުރުމަށް ބިޑް ހުށަހަޅާފައިވާ ރަށްތަކަކީ ހއ. ވެލިފިނޮޅު، މ. ސީދިހުރާ އާާއެކު ސީދިހުރާ ވެލިގަނޑު، ތ. ކާއްޑޫ، ތ. އޮޅުފުށި، އޮޅުފުށި ފިނޮޅާއެެކު އަދި ލ. ބޮޑުމުންނަފުށި އާއި ގއ. ފުނަދޫވިލިގިއްޔާ ގދ. ކަނޑަހަލަގަލާއެވެ. ޓޫރިޒަމް މިނިސްޓްރީން ވަނީ ތަރައްގީ ކުރުމަށް ހުޅުވާލާފައިވާ ރަށްތަކުގެ ތެރެއިން ބިޑް ހުށަނާޅާ ހުރި ރަށްތަކަށް ބީލަން ނުލިބުނު ސަބަބުތައް ބަލައި އެރަށްތައް އަލުން ބީލަމަށް ހުޅުވާލާނެ ކަމަށެވެ.
ރިސޯޓް ތަރައްގީކުރުމަށް ޓޫރިޒަމް މިނިސްޓްރީން ހުޅުވާލާފައިވާ 16 ރަށުގެ ތެރޭގައި ހއ. އަތޮޅުގެ ދެރަށް، ހދ. އަތޮޅުގެ އެއް ރަށް، މ. އަތޮޅުގެ ދެރަށް، ތ. އަތޮޅުގެ ތިން ރަށް، ލ. އަތޮޅުގެ ތިން ރަށް ގއ. ގެ ދެރަށް އަދި ގދ. ގެ ތިން ރަށް ހިމެނެއެވެ.
