އިންޑިއަން އޯޝަންގެ 'އެންމެ މަތީފަންތީގެ ރިސޯޓްތަކުގެ ތެރޭގައި ރާއްޖޭގެ 18 ރިސޯޓެއް ހިމެނިއްޖެ

ކޮންޑޭ ނާސްޓް ޓްރެވެލާ 2018 ރީޑާސް ޗޮއިސް އެވޯޑްސްގެ 'ޓޮޕް ރިސޯޓްސް" ކެޓަގަރީގައި ރާއްޖޭގެ 18 ރިސޯޓެއް ހިމެނިއްޖެއެވެ.

ތިރިސް އެއް ވަނަ ކޮންޑޭ ނާސްޓް ޓްރެވެލާ ރީޑާސް ޗޮއިސް އެވޯޑްސްގައި ފުރަތަމަ 11 ވަނައިގައި ހިމެނިފައި ވަނީ ރާއްޖޭގެ ރިސޯޓްތައް ކަމަށްވާއިރު 12 ވަނައިގައި މޮރިޝަސްގެ ރިސޯޓް، އަދި 19 ވަނައިގައި ސީޝެލްގެ ރިސޯޓެއް ހިމެނިފައިވާއިރު ދެ ހުރީ މުޅިން ވެސް ރާއްޖޭގެ ރިސޯޓްތަކެވެ.

އެގޮތުން މި ލިސްޓްގެ އެއް ވަނައިގައި ނަލަދޫ ޕްރައިވެޓް އައިލެންޑް މޯލްޑިވްސް (99.74 ޕޮއިންޓް)، ދެވަނައިގައި ތާޖް އެގްޒޯޓިކާ ރިސޯޓް އެންޑް ސްޕާ (99.55 ޕޮއިންޓް) އަދި ތިންވަނައިގައި ސޮނޭވާ ފުށު (99.22 ޕޮއިންޓް) ހިމެނިފައި ވެއެވެ.

އިތުރު ރިސޯޓްތައް ވެސް ވާދަކޮށްފައިވަނީ ވަރަށް ކައިރި ކައިރިން ޕޮއިންޓް ލިބިގެންނެއެވެ. އޭގެ ތެރޭގައި ވެލާ ޕްރައިވެޓް އައިލެންޑް، ކޮމޯ ކޮކޯ އައިލެންޑް، ދަ އެސްޓީ ރެގިސް މޯލްޑިވްސް ވޮއްމުލި ރިސޯޓް، ނިޔާމަ ޕްރައިވެޓް އައިލެންޑްް މޯލްޑިވްސް ހިމެނެއެވެ.

މި ލިސްޓްގެ 12 ވަނައިގައި މޮރިޝަސްގެ ދަ އޮބްރޯއީ އަދި 19 ވަނައިގައި ސީޝެލްސްގެ ސިކްސް ސެންސަސް ޒިލް ޕަސިއޮން ހިމެނިފައި ވެއެވެ.

ފަތުރުވެރިކަމުގެ ދާއިރާގައި ރާއްޖޭގެ ރިސޯޓްތަކަށް ރާއްޖެއަށް ޒިޔާރަތްކުރާ ފަތުރުވެރިންގެ ވަރަށް ބޮޑު ތަރުހީބެއް އަބަދުވެސް ލިބިގެންދެއެވެ. އިންޑިއަން އޯޝަންގެ އެންމެ މަތީ ފަންތީގެ ރިސޯޓްތަކުގެ ތެރޭގައި ރާއްޖެ ހިމެނިފައިވާއިރު ވޯލްޑް ޓްރެވެލް އެވޯޑްސްގައި ވެސް ރާއްޖޭއިން ވަނީ 3 އެވޯޑެއް އިންޑިއަން އޯޝަން އިން ހާސިލްކޮށްފައެވެ.