އިންކުއަރީގައި 49 މީހަކާ ސުވާލުކޮށްފި، މިހާރު ކުރަމުންދަނީ ރިޕޯޓް އެކުލަވާލުމުގެ މަސައްކަތް
އެމްއެންޑީއެފްގެ 32 އޮފިސަރުންނާ ސުވާލުކޮށްފައިވޭ
241 ކޮމިޓީގެ މުޤައްރިރު މުޙައްމަދު އަސްލަމް ނޫސްވެރިންނާ ބައްދަލުކުރައްވަނީ
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށްދިން ޓެރަރިސްޓް ހަމަލާގައި އެމަނިކުފާނުގެ ސެކިޔުރިޓީ ފެއިލްވި ގޮތުގެ އިންކުއަރީ ކުރިޔަށްގެންދާ 241 ކޮމިޓީން މިހާރު ކުރަމުންދަނީ ރިޕޯޓް އެކުލަވާލުމުގެ މަސައްކަތްކަމަށް އެކޮމިޓީގެ މުޤައްރިރު ހިތަދޫ އުތުރު ދާއިރާގެ މެމްބަރ މުޙައްމަދު އަސްލަމް ވިދާޅުވެއްޖެއެވެ.
ކޮމިޓީން ކުރިޔަށްގެންދާ އިންކުއަރީގެ އެންމެ ފަހުގެ މައުލޫމާތު ދެއްވުމަށް އަސްލަމް ވަނީ ބުދަ ދުވަހު ނޫސްވެރިންނާ ބައްދަލުކުރައްވާފައެވެ. މިބައްދަލުވުމުގައި އިންކުއަރީއާ ގުޅޭގޮތުން މައުލޫމާތު ދެއްވަމުން އަސްލަމް ވިދާޅުވީ އިންކުއަރީން 49 މީހަކާ ސުވާލުކޮށްފައިވާކަމަށެވެ. އޭގެތެރޭގައި މޯލްޑިވްސް ނޭޝަނަލް ޑިފެންސް ފޯސް(އެމްއެންޑީއެފް)ގެ 32 އޮފިސަރުން ހިމެނޭކަމަށް އަސްލަމް ވިދާޅުވިއެވެ. އަދި ފުލުހުންގެ 5 އޮފިސަރުންނާ ވެސް ސުވާލުކޮށްފައިވާ ކަމަށް އަސްލަމް ވިދާޅުވިއެވެ.
މީގެއިތުރުން ކޮމިޓީން ވަނީ ދެ ފަހަރެއްގެ މަތިން ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލްއާއި، ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް ޢަބްދުއްރަޙީމްއާއި، އެސްޕީޖީގެ ކުރީގެ ކޮމާންޑަރ ކާނަލް ނަޞްރުﷲ އިބްރާހީމް މަޖުދީއާ ދެފަހަރެއްގެ މަތިން ބައްދަލުކޮށްފައިކަމަށް އަސްލަމް ވިދާޅުވިއެވެ.
ބައެއް ސީނިއަރ އޮފިސަރުންނާ ދެފަހަރަށް ކޮމިޓީން ބައްދަލުކުރި ކުރުމާއި ގުޅޭގޮތުން އަސްލަމް ވިދާޅުވީ ބައެއް ޖޫނިއަރ އޮފިސަރުންނާވެސް ދެ ފަހަރެއްގެ މަތިން ކޮމިޓީން ބައްދަލުކޮށް މައުލޫމާތު ސާފުކޮށްފައިވާނެ ކަމަށެވެ. އަދި އުސޫލެއްގެ މަތިން ކޮމިޓީން ބައްދަލުކުރި ޖޫނިއަރ އޮފިސަރުން ހާމަކުރަމުން ގެންގޮސްފައިނުވާނެ ކަމަށް އަސްލަމް ވިދާޅުވިއެވެ.
ކޮމިޓީއަށް ހާޒިރުކުރި އިސް ބައެއް ބޭފުޅުން:
ކޮމިޓީގެ ތިން މެންބަރަކު ސިފައިންގެ މައި މަރުކަޒަށް ވަޑައިގެން ވެސް މައުލޫމާތުތަކެއް ސާފުކުރައްވާފައިވާއިރު، އެތަނަށް ވަޑައިގެންނެވީ ގައުމީ ސަލާމަތާ ގުޅުންހުރި ސުވާލުތަކެއް ހުރުމުން އެކަން ސާފުކުރުމަށް ކަމަށް އަސްލަމް ވިދާޅުވިއެވެ.
މީގެއިތުރުން އަސްލަމް ވިދާޅުވީ އޭޑީކޭ ހޮސްޕިޓަލްގައި ރައީސް ނަޝީދުގެ އޮޕަރޭޝަން ކުރިޔަށްގެންދިޔަ ޓީމާ ބައްދަލުކުރުމަށް އެހޮސްޕިޓަލްގައި އެދިފައިވާނެކަމަށެވެ. ޑޮކްޓަރުންގެ ޓީމާ ބައްދަލުކުރަނީ މައުލޫމާތު ސާފުކުރުމަށް ކަމަށާއި ކަމެއްގައި ތުހުމަތުކުރެވިގެން ނޫންކަމަށެވެ. އަދި ރައީސް ނަޝީދަށް ދިން ހަމަލާގެ ތަހުގީގު ހިނގަމުންދާ ގޮތް ބެލުމަށް ރައީސުލްޖުމްހޫރިއްޔާ އައްޔަނު ކުރައްވާފައިވާ ޚާއްސަ މަންދޫބު ޢައްބާސް ފާއިޒުއާވެސް ކޮމިޓީން ބައްދަލުކުރުމަށް ހަމަޖެހިފައިވާކަމަށް އޭނާ ވިދާޅުވިއެވެ.
އަސްލަމް ވިދާޅުވީ ބޭނުންވާ މައުލޫމާތު އެއްކުރުމަށްފަހު ރިޕޯޓް އެކުލަވާލުމުގެ މަސައްކަތް އަންގާރަ ދުވަހުން ފެށިގެން ކުރިޔަށް ގެންދާކަމަށެވެ. އަދި ރިޕޯޓް އޮންނަންވީ ގޮތުގެ ސްޓްރަކްޗަރއަށް މިހާރު ކޮމިޓީން އެއްބަސްވެފައިވާ ކަމަށެވެ.
ކޮމިޓީއަށް ހާޒިރުކުރި ހުރިހާ ފަރާތްތަކުންވެސް ކުރި ސުވާލުތަކަށް ޖަވާބު ދެއްވާފައިވާކަމަށާއި، އަދި ކޮމިޓީއަށް ހާޒިރުކުރެވުނު މީހުންނާއި ލިޔެކިޔުމުން ހޯދި ޖަވާބު ތަކުގެ އަލީގައި ރިޕޯޓް އެކުލަވާލެވޭވަރުވާނެ ކަމަށް އޭނާ ވިދާޅުވިއެވެ.
ރިޕޯޓް އެކުލަވާލާއިރު ހާމަނުކުރެވޭނެ ބައެއް މައުލޫމާތުތައް ހުންނާނެކަމަށާއި އެފަދަ މައުލޫމާތުތައް ހާމަކުރުމުގައި އަމަލުކުރާނެ ގޮތަކާމެދު ކޮމިޓީގައި މިހާރު ދަނީ މަޝްވަރާކުރެވެމުން ކަމަށާއި، އަދި ނުހިމަނާ މައުލޫމާތު ނުހިމަނާ އޮތީ ކީއްވެތޯ ރިޕޯޓްގައި ހިމަނާނެކަމަށް އަސްލަމް ވިދާޅުވިއެވެ.
އަސްލަމް ވިދާޅުވީ ކޮމިޓީގެ ރޫހު ހުރީ ހާމަކުރެވެން ހުރި ހުރިހާ މައުލޫމާތެއް ހާމަކުރުމަށް ކަމަށެވެ.
ކޮމިޓީން މަސައްކަތްކުރަމުން އަންނަނީ މިމަސް ނިމެންވާއިރަށް ކޮމިޓީ ރިޕޯޓް އެކުލަވާލައި ތަޅުމަށް ފޮނުވަމަށެވެ. ބުދަ ދުވަހުގެ ނޫސްވެރިންގެ ބައްދަލުވުމުގައި އަސްލަމް ވިދާޅުވީ ކޮމިޓީ ރިޕޯޓް އެކުލަވާލުމަށް ހަފްތާއެއްހާ ދުވަސް ބޭނުންވާނެކަމަށެވެ.
241 ކޮމިޓީން އިންކުއަރީގެ މަސައްކަތް ފަށާފައިވަނީ މެއި މަހުގެ 24 ވަނަ ދުވަހުއެވެ. އަދި ޖޫން މަހުގެ 5ވަނަ ދުވަހުން ފެށިގެން އިންކުއަރީއަށް އެކި ފަރާތްތައް އަންނަނީ ހާޒިރުކުރަމުންނެވެ.
