ކޮވިޑް-19އާ ގުޅިގެން މާލެ ސިޓީގައި އިއުލާނުކޮށްފައިވާ ކާފިއު ފެށޭ ގަޑި ލަސްކޮށް، ވިޔަފާރި ކުރެވޭނެ ވަގުތު އިތުރުކޮށްފިއެވެ.

ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ)އިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް އޮފީހުގެ ތަރުޖަމާނު މަބްރޫކް ޢަޒީޒް ވިދާޅުވީ މާލޭ ސަރަހައްދުގައި ކާފިއު ގަޑި ދެން ހިންގާނީ އިރުއޮއްސި 06:00ން ފަތިހު 04:00ށް ކަމަށެވެ.

މާލެ ސިޓީގައި އަޅާފައިވާ ކާފިއުއަށް ލުއި ދިނުމަށް ނިންމާފައި މިވަނީ މާލެ ސަރަހައްދުން ފެންނަމުންދާ ކޭސްތަކުގެ އަދަދު ވަރަށް ބޮޑަށް ދަށަށްދާން ފެށުމާ ގުޅިގެންނެވެ. އެގޮތުން މިގެނައި ލުއިތަކާއެކު އިރުއޮއްސި 06:00އާ ހަމައަށް ވިޔަފާރިކުރުމުގެ ފުރުސަތު ލިބޭނެ ކަމަށް މަބްރޫކް ވަނީ ވިދާޅުވެފައެވެ.

ފަތިހު 4:00ން ހެނދުނު 8:00އާ ދެމެދު ޕަރމިޓާ ނުލައި، ކަސްރަތު ކުރުމަށް އެކަނި ބޭރަށް ނުކުމެވޭއިރު، ޒަރޫރީ ބޭނުންތަކުގައި ބޭރުގައި އުޅެވޭނީ މިހާރު ވެސް އަމަލުކުރަމުންދާ ގޮތަށް ޕަރމިޓާއެކުއެވެ. އެގޮތުން ކެފޭ/ރެސްޓޯރެންޓްތަކުންނާއި ފިހާރަތަކުން ވެސް އަމަލުކުރަން ޖެހޭނީ މިހާރު އަމަލުކުރަމުންދާ އުސޫލަށެވެ. އަދި އިކޮނޮމިކް މިނިސްޓްރީން އާއްމުކޮށްފައިވާ އުސޫލާ އެއްގޮތަށް ޑެލިވަރީގެ ޚިދުމަތް ވެސް ދެވޭނެ އެވެ.

މާލެ ސިޓީގެ ހުރިހާ މިސްކިތްތަކެއް ހުޅުވާލާފައިވާއިރު، މިސްކިތްތަކުގައި ޖަމާއަތެއް ނުހެދޭނެއެވެ. ނަމަވެސް އެކަހެރިކޮށް މިސްކިތްތަކުގައި ނަމާދު ކުރެވޭނެއެވެ.

މީގެ އިތުރުން ސެލޫން ތަކާއި ބޯކޮށާ ތަންތަނަށް ވެސް ޚާއްސަ އުސޫލުތަކެއްގެ ދަށުން ކަސްޓަމަރުންނަށް ޚިދުމަތް ދިނުމުގެ ފުރުސަތު މިހާރު ވަނީ ހުޅުވާލާފައެވެ. އެގޮތުން އެފަދަ ތަންތަން ހުޅުވުމަށް ހުއްދަ ދޭނީ, އެތަންތަނުން ޚިދުމަތް ދޭނެ ޕްލޭން ހުށަހަޅައި, އެތަން އެޗްޕީއޭ އިން އިންސްޕެކްޓް ކުރުމަށްފަހުއެވެ. އަދި ޚިދުމަތް ދެވޭނީ ޚާއްސަ ގައިޑްލައިނެއްގެ ދަށުން އެޕޮއިންޓްމަންޓު އުސޫލުންނެވެ.

ސަރުކާރުން އަންނަނީ ރާއްޖޭގެ ކޮވިޑް-19ގެ ހާލަތު ކައިރިން މޮނިޓަރ ކުރަމުންނެވެ. ކޭސްތަކަށް އަންނަ ބަދަލަށް ބަލައި ފިޔަވަޅުތައް ހަރުކަށި ކުރުން ނުވަތަ ލުއި ކުރުމުގެ މަސައްކަތް ދަނީ ކުރަމުންނެވެ.