މިނިވަން ޗެމްޕިއަންޝިޕް: ކޮނޑޭ ހިފަހައްޓައި ނިލަންދޫން ޗެމްޕިއަންކަން ހޯދައިފި

މިނިވަން ޗެމްޕިއަންޝިޕްގައި ގއ.ކޮނޑޭ ހިފަހައްޓައި ގއ.ނިލަންދޫން ގއ އަތޮޅުގެ ޗެމްޕިއަންކަން ހޯދައިފިއެވެ.

އާދީއްތަ ދުވަހު ހަވީރު ނިލަންދޫ އަދި ކޮނޑޭ ބައްދަލުކުރި މި މެޗު އެއްވަރުވީ 1-1 ގެ ނަތީޖާއަކުންނެވެ.

ކޮނޑޭ ދަނޑުގައި ކުޅުނު މި މެޗު ފެށިގެން ދެވަނަ މިނެޓުގައި އެޓީމުން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ މުޙައްމަދު ނާޝިދެވެ. މި ލަނޑަށްފަހުވެސް އެޓީމުން ދިޔައީ ނިލަންދޫގެ ހާފަށް ބާރުބޮޑުރަމުންނެވެ.

އެގޮތުން ލަނޑު ޖެހުމަށް ގިނަ ފުރުސަތުތައް ކޮނޑޭ އިން ވަނީ ތަނަވަސްކޮށްފައެވެ. އެހެންނަމަވެސް ނިލަންދޫން ވަނީ މޮޅު ޑިފެންސެއްކޮަށް، ބައިކޮޅަށް އިތުރު ލަނޑެއް ވަނަނުދީ ހިފަހައްޓާފައެވެ.

ފުރަތަމަ ހާފް ނިމުނީ 0-1 ގެ ނަތީޖާއިން ނިލަންދޫގެ މައްޗަށް ކޮނޑޭ ކުރީގައި އޮވެގެންނެވެ.

ދެވަނަ ހާފް ފެށިގެން ނިލަންދޫން އެޓީމުގެ ކުޅުން ރަނގަޅުކޮށްފައިވާއިރު، ލަނޑު ޖެހުމަށްވެސް އެޓީމުން ވަނީ ފުރުސަތުތަކެއް ތަނަވަސްކޮށްފައެވެ. އެހެންނަމަވެސް ކޮނޑޭ އިން ވަނީ އެޓީމުން އުފެއްދި ގިނަ ހަމަލާތައް ދިފާއުކޮށްފައެވެ.

ނިލަންދޫން މެޗުގެ ނަތީޖާ ހަމަހަމަކުރީ 75 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ބަދަލު ކުޅުންތެރިޔެއްގެ ގޮތުގައި ދެވަނަ ހާފްގައި ކުޅެން އެރި ނަޒީފް އަޙުމަދެވެ. މި ލަނޑަށްފަހުވެސް އެޓީމަށް ވަނީ ލީޑު ނެގުމަށް ފުރުސަތުތަކެއް ލިބި ބޭކާރުވެފައެވެ.

މި ނަތީޖާއާއެކު މެޗު ނިމުނުއިރު، ފުރަތަމަ ލެގުގައި ނިލަންދޫ 0-2 ގެ ނަތީޖާއިން މޮޅުވެފައި އޮތުމާއެކު 1-3 ގެ އެގްރިގޭޓް ނަތީޖާއަކާއެކު އެޓީމުން ވަނީ އަތޮޅު ޗެމްޕިއަންކަން ހޯދާފައެވެ.