މަތީ ތައުލީމާއި ތަމްރީނުގެ ލޯނަށް ހުޅުވާލި ފުރުސަތުގައި ލޯނު ލިބުނު ދަރިވަރުންގެ ދާއިމީ ލިސްޓު އާންމުކޮށްފިއެވެ.

މަތީ ތައުލީމާއި ތަމްރީނުގެ ލޯނު ސްކީމް ނުވަތަ ސްޓޫޑެންޓް ލޯން ސްކީމަށް ކުރިމަތިލުމަށް ފުރުސަތު ހުޅުވާލީ މި އަހަރުގެ ފެބްރުއަރީ މަހުގެ 11 ވަނަ ދުވަހުއެވެ. މި ފަހަރު ލޯނުގެ 770 ފުރުސަތަށް ކުރިމަތިލުމަށް ހުޅުވާލުމުން 1،176 ދަރިވަރުން ވަނީ ލޯނަށް ކުރިމަތިލައިފަައި ކަމަށް ހަޔަރ އެޑިއުކޭޝަން މިނިސްޓްރީއިން މަޢުލޫމާތުދެއެވެ. މީގެ ތެރެއިން ލޯނު ލިބުނު ދަރިވަރުންގެ ނަންތައް ހާމަކޮށް ވަގުތީ ލިސްޓު މެއި މަހު ވަނީ އިއުލާނުކޮށްފައެވެ. އަދި އެ ލިސްޓަށް ޝަކުވާ ހުށަހެޅުމަށް 1 ޖޫން ނިޔަލަށް ފުރުސަތު ހުޅުވާލިއެވެ. އެ ޝަކުވާތަކަށް ބަލައި ދާއިމީ ލިސްޓް ޖޫން 20 ވަނަ ދުވަހު އާންމުކޮށް އެކަން ވަނީ އިއުލާނުކޮށްފައެވެ. ޝަކުވާ އަށް ހުޅުވާލި އިރު، ލޯނު ދޭން ނިންމާފައި ވަނީ 417 ކުއްޖަކަށެވެ. ނަމަވެސް ލިސްޓު ފައިނަލް ކުރި އިރު، މިއަދަދު 449ށް ވަނީ އިތުރުކޮށް ލޯނު ހަމަޖައްސައިދީފައެވެ.

ލޯނަށް ހުޅުވާލި ފުރުސަތުގެ ތެރެއިން، މިހާރު ކިޔަވަމުންދާ ދަރިވަރުންނަށް ހާއްސަ ކުރި ފުރުސަތުތަކުގައި، އެމްބީބީއެސް ކިޔަވާ ދަރިވަރުންނާއި ޕައިލެޓްކަން ކިޔަވާ ދަރިވަރުންގެ ތެރެއިން ލޯނަށް ކުރިމަތިލި ހުރިހާ ދަރިވަރުންނަށް ލޯނު ދޭން އޮތީ ނިންމާފައެވެ. އޭގެ ތެރޭގައި ހިމެނެނީ، އެމްބީބީއެސްއަށް ކިޔާވާ 65 ދަރިވަރަކާއި، ފައިލެޓްކަން ކިޔަވާ 16 ދަރިވަރުންނެެވެ. މިހާރު ލޯނު އަނބުރާ ދެއްކުމަށް އޮންނަ މުއްދަތު 18 މަސްދުވަހަށް އިތުރުކުރުމަށް ވެސް ވަނީ ނިންމާފައެވެ. މިއީ ޕެންޑަމިކްގެ ސަބަބުން ގެނައި ބަދަލެއް ކަމަށް އެ މިނިސްޓްރީއިން ވަނީ ބުނެފައެވެ.

ލޯނު ސްކީމުގައި ބައެއް ދާއިރާތަކުން ލޯނަށް އެދި ކުރިމަތިލީ އަދަދު ވަނީ ދަށްވެފައެވެ. އެގޮތުން އެކައުންޓިން، އިންޖިނިއަރިން އަދި ސޯޝަލް ސައިންސްގެ ދާއިރާތަކުން ގިނަ ޖާގަތަކެއް ހާއްސަ ކުރި ނަމަވެސް ތަރުހީބު ކުޑަ އެވެ. އެންމެ ގިނަ ދަރިވަރުން ކުރިމަތިލާފައިވަނީ އެމްބީބީއެސް، ޕައިލެޓް އަދި ޕީއެޗްޑީ ކޯސްތަކަށެވެ.

މިއަހަރު ލޯނު ލިބޭ ދަރިވަރުންގެ ތެރެއިން އަލަށް ކިޔަވަން ފަށާ ކުދިންނަށް ކިޔެވުން ފެށުމަށް 18 މަސް ދޭނެ ކަމަށް ހަޔަރ އެޑިއުކޭޝަނުން ބުންޏެެވެ. ލޯނު ލިބޭ ދަރިވަރުންގެ ދާއިމީ ލިސްޓު ހަޔަރ އެޑިއުކޭޝަން މިނިސްޓްރީގެ ވެބްސައިޓުގައި ވަނީ އާންމުކޮށްފައެވެ. މަތީ ތައުލީމާއި ތަމްރީނަށް ލޯނު ދޫކުރުމަށް މިއަހަރުގެ ބަޖެޓުގައި 137 މިލިއަން ރުފިޔާ ވަނީ ބަޖެޓު ކޮށްފައެވެ.

މީގެ އިތުރުން ކޮވިޑްގެ 4 ވަނަ ރާޅާއެކީ ދިން ލުއިތަކާއެކު ސްޓޫޑަންޓް ލޯނު އަނބުރާ ދެއްކުން، މި އަހަރުގެ ނިޔަލަށް ފަސްކޮށްދެއްވާފައިވާ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ވަނީ ހާމަކުރައްވާފައެވެ. މިކަމާ ގުޅިގެން ހަޔަރ އެޑިއުކޭޝަން މިނިސްޓަރ ޑރ. އބްރާހިމް ޙަސަން ކުރެއްވި ޓްވީޓެއްގައި ވިދާޅުވީ، އިޤުތިޞާދީ ގޮތުން ބޮޑެތި ގޮންޖެހުންތައް ހުރިއިރު ވެސް ސްޓޫޑަންޓްލޯނުތައް އަނބުރާ ދެއްކުން މި އަހަރުގެ ނިޔަލަށް މަޑުޖައްސާލުމަށް ރައީސް ނިންމެވި ނިންމެވުމަކީ މަތީ ތަޢުލީމާއި ތަމްރީނަށް އެމަނިކުފާނު ދެއްވާ އަހައްމިއްޔަތުކަމުގެ ކުލަގަދަ ހެއްކެއްކަމަށް ވިދާޅުވެފައެވެ.

ކޮވިޑް19ގެ ބަލިކަމުގެ މިހާލަތުގައި ގިނަ ފަރާތްތަކެއްގެ އާމްދަނީއަށް އަސަރުކޮށްފައިވުމާއެކު، އާއްމު ހާލަތަށް ރުޖޫއަވުމަށް ވަގުތުނަގާނެ ކަމަށް ބެލެވޭތީ މި ދިޔަ އަހަރު ވެސް ސަރުކާރުން އެ ފުރުސަތު ފަހިކޮށްދިނެވެ. ސަރުކާރުގެ މި ނިންމުމާ ގުޅިގެން ބޭންކް އޮފް މޯލްޑިވްސް އާއި ބޭންކް އޮފް ސިލޯންއިން ދަރިވަރުން ނަގާފައިވާ ނޭޝަނަލް ސްޓޭންޑަންޓް ލޯނު ސްކީމްގެ ލޯނުތަކާއި، އެޑިޔުކޭޝަން އެސިސްޓަންސް ލޯނު ސްކީމްގެ ލޯނުތަކުގެ އިތުރުން، މީރާއަށް ލޯނު ރީޕޭމަންޓް ދައްކާ ގޮތަށް ހަމަޖެހިފައިވާ ލޯނުތައް އަނބުރާ ދައްކަންޖެހިފައިވާ ފަރާތްތަކާއި، ލޯނު ސްކީމްގެ ދަށުން ނަގާފައިވާ ލޯނުތައް ދައްކަމުންދާ ފަރާތްތަކުން ލޯނު ދެއްކުން އޭރު ވެސް ފަސްކޮށްދީފައިވެއެވެ. އޭގެ އިތުރުން، އެ މުއްދަތުގެ ތެރޭގައި ސްޓޫޑަންޓް ލޯނު ރީޕޭމަންޓްގެ އެއްވެސް ފައިސާއެއް ދައްކާކަށް ނުޖެހޭނެ ކަމަށް އޭރު ހަޔަރ އެޑިއުކޭޝަން މިނިސްޓްރީން ވެސް ބުނެފައިވެއެވެ.

ކޮވިޑް-19ގެ މި ހާލަތުގައި ސަރުކާރުން ގެންދަނީ އެކި ގޮތްގޮތުން ރައްޔިތުންނަށް އެހީތެރިކަން ފޯރުކޮށްދިނުމަށް ތަފާތު އެކި ސްޓިމިއުލަސް ޕެކޭޖުތައް ވެސް ފޯރުކޮށްދެމުންނެވެ.