ފ އަތޮޅު ވިއްކާލުން ތަރައްގީ، ކޮންސިއުލޭޓް އެޅުން އަޅުވެތިކަން
18 ޖޫން 2021 | ހުކުރު 14:32އިންޑިއާ ކުރިއަށް ނުލައި ބައެއް މީހުންނަށް މިހާރު ވާހަކަ ދެކެވޭ ކަމަކަށްވެސް ނުވޭ
ފ އަތޮޅު ވިއްކާލި ބީދައިން މުޅި އައްޑުއަތޮޅު ވިއްކާލަނީއޭ ހީވެ ކުރީގެ ސަރުކާރުގެ އިސްވެރިން ދަނީ ވާހަކަ ދައްކަމުން
ވެރިކަމުގައި ކޮންމެ ބަޔަކު ތިއްބަސް ދިވެހިންގެ މި ފަޚުރުވެރި ފަސްގަނޑު އޮންނަން ވާނީ ދިވެހިންގެ މިލްކެއްގެ ގޮތުގައެވެ. މި ފަސްގަނޑުން އެއްމެ ވެލި ފުކެއްވެސް އެހެން ބައެއްގެ އަތްމައްޗަށް ދޫކޮށްލާކަށް ދިވެހިން ބޭނުމެއް ނުވާނެއެވެ. އެކަމަކަށް ހިތެއްވެސް ނޭދޭނެއެވެ.
ދުނިޔޭގެ ޗާޓުގައި ދިވެހިންނަށް ލިބިފައިވާ މި މަގާމަކީ އެތައް ބަޔަކު ފާރަލައިފައިވާ އަދި ދަހިވެތިވާ މަގާމެކެވެ. މި ފަސްގަނޑުން ކުޑަ ނަމަވެސް ތަންކޮޅެއް ލިބޭނެ ގޮތެއް ވޭތޯ ބަލަބަލާ ތިބެއެވެ. މިކަން ހާސިލްވޭތޯ ދުނިޔޭގެ ބާރުގަދަ ގައުމުތަކުން މަސައްކަތް ކޮށްފައިވާކަން ތާރީޚުން ސާބިތުވާން އެބައޮތެވެ. ބޭރުގެ ބާރުތަކުން ރާއްޖޭގެ ބިމުން ތަންކޮޅެއް ލިބޭތޯ އެތައް ހަނގުރާމައެއް ކޮށްފައިވާކަން ފެންނަން އޮބައޮތެވެ. މިކަން ކޮންމެވެސް މިންވަރަކަށް ކާމިޔާބުވެސް ކުރިއޭ ދެންނެވިދާނެއެވެ. ރާއްޖޭގެ ރައްޔިތުން އަޅުވެތި ކުރުވައިގެން ވެރިކަން ކުރި ޒަމާންތަކެއް ދިވެހިން ވަނީ ދެކެފައެވެ. ރައްޔިތުންނަށް ގައްދާރުވި ވެރިންތަކެއްވެސް ދިވެހިން ވަނީ ދެކެފައެވެ.
އެހެންނަމަވެސް މިއިން އެއްވެސް އިރެއްގައި ދިވެހިންގެ މި ބިމުން ކައިވަތެއް ނަމަވެސް ބޭރުގެ ބައެއްގެ މިލްކަކަށް ވިޔަ ދީފައި ނެތެވެ. ދިވެހިންގެ މި ބިމަށް ވެރި ވެގަންނަން މަސައްކަތްކުރި ކޮންމެ ބައެއްވެސް ޖެހެނީ ވަކި ހިސާބަކުން ހަތިޔާރު ބައްހައްޓާށެވެ. އެއީ މީގެ އެތައް އަހަރެއްގެ ކުރީގެ ވާހަކަތަކެވެ. އޭރުވެސް ދިވެހިންގެ އަޒުމާ ހިތްވަރު އެގޮތުގައި ހުރި އިރު މިއަދު އެކަމަށް ވަކި ބަދަލެއް އަންނާނެ ހެއްޔެވެ.
ވެރިން ހިތުހުރި ގޮތަކަށް ގައުމު ބައިބައި ކުރަން ދިވެހިންގެ ހިތެއް ނުރުހޭނެއެވެ. އެކަމަށް ދިވެހިން ޖާގައެއްވެސް ނުދޭނެއެވެ.
2017 ވަނަ އަހަރު ދިވެހިންގެ ބިމުން ބޮޑު ބައެއް މަހުޖަނަކަށް ވިއްކާލަން އޭރުގެ ސަރުކާރުން ޑީލް ހެދިކަން ދިވެހިންނަށް ފަޅާއެރުމާއެކު ލޭ ހޫނު ވިއެވެ. އެހެންނަމަވެސް އޭރުގެ ސަރުކާރުގެ ވަޒީރުންނާއި އެކި ފެންވަރުގެ ބޭބޭފުޅުން ނުކުންނަވައި ރައްޔިތުންނަށް އެކަން އޮޅުވާލަން މަސައްކަތްކުރިއެވެ.
ފ އަތޮޅުން ބައެއް އަރަބި މަހުޖަނަކަށް ވިއްކާލަން ޑީލް ހެއްދެވި މިނިސްޓަރުން މިއަދު ނިކުންނަވާ ގައުމު ވިއްކާލަނީއޭ ވިދާޅުވުމުން އެވާހަކަތައް ހަމަޖައްސާނެ ގޮތެއް ނުފެނުނެވެ. މިއަދު އަޑޫސިޓީ އިންޑިއާއަށް ވިއްކާލަނީ ކަމަށް ބުނެ އަޑަށް ބާރުލައްވައި އެކި ޕޯޑިއަމް ތަކުގައި ވާހަކަ ދައްކަވާއިރު، މިބައިމީހުންގެ މޭސްތެރިކަމުގެ ދަށުން ރައްޔިތުންނަށް އޮޅުވާލައިގެން މުޅި ފ އޮތޮޅު ވިއްކާލަން ދެއިރު ދެދަޅައަށް މީޑިއާތަކުގައި ޖެއްސި ސްޓަންޓްތައް މިހާ އަވަހަށް ހަނދާން ނެތުނީ ހެއްޔެވެ.
ޖުމްލަ 23 ރަށެއްގެ މައްޗަށް އެކުލެވޭ ފ. އަތޮޅުގެ މިލްކުވެރިކަން ސައުދީ އަރަބިއްޔާގެ ޝާހީ އާއިލާގެ ބޭފުޅަކަށް ދޫކޮށްލަން އުޅުނުއިރު ރާއްޖޭގެ މިނިވަންކަމާއި ސިޔާދަތު ގެއްލިދާނެ ކަމާމެދު ކަންބޮޑު ނުވީ ކީއްވެތޯއެވެ. އޭރު އެއީ ރާއްޖޭގެ ތަރައްގީގެ ގޮތުގައި ސިފަކުރި އިރު މިއަދު ސަރުކާރުން ކުރާ ކޮންމެ ކަމަކީ ބޭރެގެ ބަޔަކަށް ރާއްޖެ ވިއްކާލުން ނުވަތަ އަޅުވެތި ކުރުން ކަމަށް ބުނުމުން ހަމައެއް ނުޖެހެވެ. ވާނީވެސް އެހެންތާއެވެ. ރާއްޖެ ވިއްކާލަން ޑީލް ހެދި ބަޔަކަށް ހީވަނީ އެހެން މީހުންވެސް ކަންކުރާނީ ހަމަ އެގޮތަށް ކަމަށެވެ.
އިންޑިއާ ކޮންސިއުލޭޓެއް އައްޑޫސިޓީގައި ގާއިމް ކުރަން އުޅޭ ކަމުގެ އަޑު ފެތުރުމާއެކު މިބައި މީހުންނަށް ހީވާން ފެށީ ފ އަތޮޅު ވިއްކާލި ބީދައިން މުޅި އައްޑުއަތޮޅު ވިއްކާލަނީ ހެންނެވެ. ވަގަކަށް ހީވާނީ ދެންތިބޭނީވެސް ހުސް ވަގުން ހެންނެވެ. އެހެން ވިމާ އެހެން ހީވެދާނެއެވެ.
އިންޑިއާގެ ކޮންސިއުލޭޓެއް އައްޑޫގައި ގާއިމް ކުރުމަށް ސަރުކާރުން މުޅިން ނިންމީ އެއް ނޫނެވެ. އެކުވެރި ދައުލަތްތަކާއެކު ކަންކަމުގައި މަޝްވަރާ ކުރެއެވެ. ކުރާ ކޮންމެ މަޝްވަރާ އަކީ ހަގީގަތަކަށްވެސް ނުވެދާނެއެވެ. ރައީސް ސާލިހު ވިދާޅުވީ އިންޑިއާ އަދި ސައުދީގައިވެސް ރާއްޖޭގެ ކޮންސިއުލޭޓެއް މިހާރު ހުންނަ ކަމަށާއި ރާއްޖޭގެ ވަކި ހިސާބެއްގައި އިންޑިއާ ކޮންސިއުލޭޓެއް ހުރުން އެއީ މައްސަލައެއް ނޫން ކަމަށެވެ. މިއީ އަދި އައްޑޫސިޓީ އިންޑިއާއަށް ވިއްކާލުމެއް ނޫނެވެ.
މިކަމާ ގުޅުވައި އޭރު ފ އޮތޮޅު ވިއްކާލަން ޑީލް ހެއްދެވުމުގައި އުޅުއްވި އިކޮނޮމިކް މިނިސްޓަރ މުހައްމަދު ސައީދު، ރާއްޖޭގެ ހާލަތު ރަނގަޅު ކުރުމަށްޓަކައި އެހެން ގައުމެއްގެ ބާރުގެ ދަށަށް ރާއްޖޭގެ މިނިވަންކަމާއި ސިޔާދަތު ގެއްލިގެންދާފަދަ ގޮތަކަށް އެއްވެސް ކަމެއް ކުރުމަކީ ބަލައި ގަނެވޭނެ ކަމެއް ނޫންކަމަށާއި އަދި ރާއްޖޭގެ ހާލަތު ރަނގަޅު ކުރުމަށް ދައްކަންޖެހޭ އަގަކީ ގައުމާއި ރައްޔިތުން ކަމުގައިވާނަމަ އެއީ ވަރަށް ބޮޑު ގޯހެއް ކަމަށް ވިދާޅުވާތީ ހައިރާންވެއެވެ. ގައުމީ ލެއާ ގައުމުގެ މިނިވަންކަން އޭރު ހިތަށް ނައީ ކީއްވެގެން ހެއްޔެވެ.
އިންޑިއާ ކުރިއަށް ނުލައި މިބައި މީހުންނަށް މިހާރު ވާހަކަ ދެކެވޭ ކަމަކަށްވެސް ނުވެއެވެ. ތިމާމެންގެ ވެރިކަމުގައި ރައްޔިތުންގެ އަނގަ ބަންދުކޮށް ކުޅުނު ޗަރުކޭސް އެއްމެން ކުޅޭނެއޭ ހިތައް އަރަނީއެވެ. ރާއްޖެއަށް ހެވެއް އެދިގެން މަސައްކަތެއް ކުރަން ބޭނުން ނުވަނީއެވެ. މިބައި މީހުންނަށް ވިސްނިފައި އޮންނަނީ ވަކި މީހަކަށް ނޫނީ މިގައުމުގައި ވެރިކަން ނުކުރެވޭނެ ކަމަށެވެ. އޭރު ތަރައްގީއޭ ބުނެ ރައްޔިތުން ކަނުބަނދެ ބައިތިއްބާފައި ގައުމު ވިއްކާލިޔަސް އެއްމެންގެ އަމަލުތައް ހުންނާނީ އެހެނެއް ނޫނެވެ.
