ގެސްޓް ހައުސްތަކުން ބިލުތައް ބަހާލައިގެން ދެއްކޭނެކަމުގެ ޔަޤީންކަން ފެނަކައިން ދީފައިވޭ: ގޭމް

ގެސްޓު ހައުސްތަކުން ފެނަކައަށް ދައްކަން ޖެހޭ ބިލުތައް ބަހާލައިގެން ދެއްކޭނެ އިންތިޒާމް ހަމަޖައްސައިދޭނެކަމުގެ ޔަޤީންކަން ފެނަކަ ކޯޕަރޭޝަނުން ދީފައިވާ ކަމަށް ގެސްޓް ހައުސް އެސޯސިއޭޝަން އޮފް މޯލްޑިވްސް (ގޭމް) އިން ބުނެފިއެވެ.

ފެނަކަ އާއެކު ބޭއްވި ބައްދަލުވުމުގައި ގޭމް އިން ވަނީ ގެސްޓް ހައުސްތަކުގެ ކަރަންޓު ޚިދުމަތް ކަނޑާލުމަކީ ވަރަށް ބޮޑު ދަތިކަމެއް ކަމަށާއި މަހުން މަހަށް ބިލުތައް ބަހާލައިގެން ދެއްކޭނެ އިންތިޒާމު ހަމަޖައްސައިދިނުމަށް އެދިފައެވެ. މި ބައްދަލުވުމުގައި އެސޯސިއޭޝަންގެ ރައީސް، ނައިބް ރައީސް، ފައިނޭންޝަލް ކޮންޓްރޯލަރ އަދި ސެކެޓްރީ ޖެނެރަލް ބައިވެރިވެވަޑައިގެންނެވިއެވެ.

އެ އެސޯސިއޭޝަންގެ ސެކެރެޓަރީ ޖެނެރަލް ސައުދުﷲ އަހުމަދު ވިދާޅުވީ 4 ސިޓީ ކައުންސިލާއި 17 އަތޮޅު ކައުންސިލާއެކު އެޖަމުޢިއްޔާގެ ބައްދަލުވުންތަކެއް ބޭއްވި ކަމަށާއި ކައުންސިލްތަކުން ރަށު ފަތުރުވެރިކަމަށް ހުރި ގޮންޖެހުންތަކާ ގުޅޭ ގޮތުން މައުލޫމާތު ހިއްސާ ކޮށްފައިވާނެ ކަމަށެވެ.

ގޭމް އިން ފެނަކައާއެކު ބައްދަލުވުން ބާއްވާފައިވާއިރު ރާއްޖޭގެ އެކި ރަށްރަށުގައި ގެސްޓްހައުސް ހިންގާ ފަރާތްތަކަށް ދިމާވާ ގޮންޖެހުންތައް ދެނެގަނެ، އެކަންތައްތަކަށް ހައްލުހޯދުމުގެ މަސައްކަތް ވެސް އެ އެސޯސިއޭޝަނުން ވަނީ ފަށާފައެވެ.

އެގޮތުން މިހާތަނަށް މަޝްވަރާ ބައްދަލުވުންތައް ބާއްވާފައިވާ ކައުންސިލްތަކުގެ ތެރޭގައި، ފުވައްމުލަކު ސިޓީ ކައުންސިލް، އައްޑޫ ސިޓީ ކައުންސިލް، އަދި ނ. އަތޮޅު ކައުންސިލް ހިމެނެއެވެ.

ގޭމް އިން ބުނީ މި ބައްދަލުވުންތަކުގެ ބޭނުމަކީ ރަށްރަށުގައި ގެސްޓްހައުސް ހިންގާ ފަރާތްތަކުގެ ކަންބޮޑުވުންތައް ހޯދައި، އެކަންކަން ހައްލުކުރުމަށް ރަށު ކައުންސިލްތަކާއި އަދި ސިޓީ ކައުންސިލްތަކާއެކު މަސައްކަތްކުރުން ކަމަށެވެ. އެ އެސޯސިއޭޝަންގެ އަމާޒަކީ، ސަރުކާރާއި އަދި ކައުންސިލްތަކުގެ އެއްބާރުލުމާއެކު، މި ވިޔަފާރި ކުރިއެރުވުމަށް ހުރި ގޮންޖެހުންތައް ހައްލުކޮށް، ގެސްޓްހައުސްތައް މާކެޓްކޮށް، އަދި މި ވިޔަފާރި އިތުރަށް ފުޅާކުރުން ކަމަށެވެ. އަދި މިކަންތައްތައް ހާސިލްކުރުމަށްޓަކައި ފަތުރުވެރިކަމުގެ ސިނާއަތުގެ އިތުރު ޖަމިއްޔާތަކާއެކު މަސައްކަތްކުރަން ތައްޔާރުކަމަށް ވެސް އެ އެސޯސިއޭޝަނުން ބުނެއެވެ.

ރާއްޖޭގެ ގެސްޓްހައުސް ވިޔަފާރިތަކަށް ދިމާވާ އެންމެ ބޮޑު ގޮންޖެހުމަކީ ރަށްރަށުގައި ޓޫރިސްޓު ބީޗެއް ނެތުން ކަމަށް ގޭމް އިން ފާހަގަކުރެއެވެ. އަދި ރަށް ކައިރީގައި ޕިކްނިކް އައިލެންޑެއް ނެތުމާއި ދަތުރުފަތުރުގެ ދަތިކަން ވެސް ގޭމް އިން ފާހަގަކުރެއެވެ.

ރާއްޖެއަށް ކޮވިޑް-19ގެ އަސަރުކުރުމާއެކު އެންމެ ބޮޑު ގެއްލުމެއް ވެގެންދިޔައީ ގެސްޓްހައުސް ވިޔަފާރިއަށެވެ. ފަތުރުވެރިން ރަށްރަށަށް ދިއުން މަނާކުރުމާއެކު އެތައް ގެސްޓްހައުސެއް ބަންދުކުރަން ޖެހުނެވެ.

ރާއްޖޭގެ ބޯޑަރު ބަންދުކޮށްފައި އޮތުމަށްފަހު އަލުން ހުޅުވާލިނަމަވެސް ގެސްޓްހައުސް ވިޔަފާރި ކުރިއަށް ގެންދިއުމުގެ ފުރުސަތު ލިބުނީ އެތައް މަހެއް ފާއިތުވެ ދިޔަފަހުންނެވެ.