ގަމުގެ ދޫގަސް ގެސްޓް ހައުސް އަލުން ހުޅުވަނީ

އައްޑޫ ގަމުގައި ކުރިން ފެށިގެން ދޫގަހުގެ ނަމުގައި ހިންގަމުން އައި ގެސްޓް ހައުސް އަލުން ތަރައްގީކޮށް ހުޅުވަން ނިންމާ ޑިވެލޮޕްމަންޓް ކޮންސެޕްޓް ޑިޒައިން ހުކުރު ދުވަހުގެ ރޭ ލޯންޗްކޮށްފިއެވެ.

ގެސްޓް ހައުސް އަލުން ތަރައްގީކޮށް ހުޅުވަން ނިންމާފައިވަނީ 120 ކޮޓަރި އާއެކުއެވެ. އަދި ދޫގަސް ތަރައްގީކުރަން ސަރުކާރުން ހަވާލުކޮށްފައި ވަނީ މޯލްޑިވްސް ޕޯޓްސް ލިމިޓެޑް (އެމްޕީއެލް) އާއެވެ.

ދޫގަސްގެ ޑިވެލޮޕްމަންޓް ކޮންސެޕްޓް ލޯންޗް ކުރަން ބޭއްވި ރަސްމިއްޔާތުގައި ވާހަކަ ދައްކަވަމުން އެމްޕީއެލްގެ ސީއީއޯ އަބްދުއްރައްޒާގް ހަލީމް ވިދާޅުވީ މި މަޝްރޫއު ކުރިއަށް ގެންދާނީ ދެ ފިޔަވައްސަކަށް ބަހާލައިގެން ކަމަށެވެ. އެގޮތުން ފުރަތަމަ ފިޔަވަހީގައި ތަރައްގީ ކުރާނީ 40 ކޮޓަރި ކަމަށާއި ބާކީ 80 ކޮޓަރީ ތަރައްގީ ކުރާނީ ދެވަނަ ފިޔަވަހީގައި ކަމަށެވެ.

އެމްޕީއެލް އިން ދޫގަސް ތަރައްގީ ކުރުމުގެ އަމަލީ މަސައްކަތް ފަށާނީ ޓޫރިޒަމް މިނިސްޓްރީގެ ތެރެއިން ނިންމަން ޖެހޭ ކަންކަން ފުރިހަމަ ކުރުމަށް ފަހުއެވެ.

ފުރަތަމަ ފިޔަވަހީގައި ތަރައްގީކުރާ 40 ކޮޓަރި ކުރިއަށް އޮތް ފަސް މަހެއްހާ ދުވަހުގެ ތެރޭގައި ނިމެނޭ ކަމަށް އެމްޕީއެލް އިން މައުލޫމާތުދެއެވެ.