ގެސްޓް ހައުސް ވިޔަފާރިތަކަށް ހާއްސަ ޓީވީ ޕެކޭޖުތަކެއް ދިރާގުން ތައާރަފުކޮށްފި
ގެސްޓްހައުސް ވިޔަފާރިތަކަށް ހާއްސަ ތިން ޕެކޭޖެއް ވަނީ ތައާރަފުކޮށްފަ
ދިރާގު މައި އޮފީސް
ދިރާގުން ރާއްޖޭގެ ގެސްޓް ހައުސް ވިޔަފާރިތަކަށް ހާއްސަ ޓީވީ ޕެކޭޖުތަކެއް ބުދަ ދުވަހު ތައާރަފުކޮށްފިއެވެ.
ދިރާގުން ބުނީ، ރާއްޖޭގައި އެކުންފުނީގެ ފިކްސްޑް ބްރޯޑްބޭންޑް ނެޓްވޯކް ގާއިމްކުރެވިފައިވާ ރަށްރަށުގައި ހިންގަމުންގެންދާ ކޮންމެ ގެސްޓް ހައުސް ވިޔަފާރިއަކަށްވެސް، އަލަށް ތައާރަފް ކުރި 'ގެސްޓް ހައުސް ޓީވީ'ގެ ހިދުމަތް ލިބޭނެ ކަމަށެވެ.
ދިރާގު ގެސްޓް ހައުސް ޓީވީގެ ހިދުމަތަކީ ގެސްޓް ހައުސްތަކަށް ހާއްސަކޮށްގެން ޓީވީގެ ހިދުމަތް ފޯރުކޮށްދިނުމަށް ފަރުމާ ކުރެވިގެން ރާއްޖޭގައި ތައާރަފުކުރި މިފަދަ ފުރަތަމަ ހިދުމަތް ކަމަށް ދިރާގުން ބުނެއެވެ. އަދި މި ހިދުމަތާއެކު ތަފާތު ޑިޖިޓަލް ވެލިއު އެޑެޑް ފީޗަރތައް ލިބިގެން ދާނެ ކަމަށް ދިރާގުން މައުލޫމާތު ދެއެވެ.
އޭގެ ތެރޭގައި ގެސްޓް ހައުސް އޮޕަރޭޓަރ ސާވިސް، އަދި ޓީވީ މެދުވެރިކޮށް ރޫމް ސާރވިސް އަށް ރިކުއެސްޓް ކުރުމާއި، ތަފާތު ރެކްރިއޭޝަނަލް އެކްޓިވިޓީސް އަށް ރިކުއެސްޓް ކުރުން ހިމެނެއެވެ. އަދި ގެސްޓް ހައުސް ޓީވީގެ ޔޫޒަރ އިންޓަފޭސް އެ ގެސްޓް ހައުސް އަކުން ބޭނުން ގޮތަކަށް ކަސްޓަމައިޒް ކޮށްލެވޭނެ ކަމަށް ދިރާގުން ބުނެއެވެ.
އަލަށް ތައާރަފް ކުރެވުނު ގެސްޓް ހައުސް ޓީވީގެ ސަބަބުން ގެސްޓް ހައުސްގައި ކަސްޓަމަރުންނަށް ދެވޭ ހިދުމަތުގެ ތަޖުރިބާ އިތުރަށް ފުރިހަމަ ކުރުމުގެ ފުރުސަތު ގެސްޓްހައުސް ހިންގަވާ ފަރާތްތަކަށް ހުޅުވިގެންދާނެ ކަމަށްވެސް ދިރާގުން ބުނެއެވެ.
ދިރާގުން ގެސްޓް ހައުސްތަކަށް ހާއްސަކޮށް ގެސްޓް ހައުސް ޓީވީގެ ތަފާތު ތިން ޕެކޭޖެއް ތައާރަފްކޮށްފައިވެއެވެ.
