ކ. މާލެ
|
17 ޖޫން 2021 | ބުރާސްފަތި 13:54
ރެއާލް މެޑްރިޑުގެ ލެޖެންޑް ސާޖިއޯ ރާމޯސް
ރެއާލް މެޑްރިޑުގެ ލެޖެންޑް ސާޖިއޯ ރާމޯސް
ގެޓީ އިމޭޖަސް
ރާމޯސް ރެއާލް ދޫކޮށްލުން
16 އަހަރަށްފަހު ރާމޯސް ރެއާލް ދޫކޮށްލަނީ
 
ރާމޯސްއަކީ ރެއާލުގެ ތާރީޚުގައި އެންމެ ކާމިޔާބު ކެޕްޓަން
 
ޕީއެސްޖީން އަންނަނީ ރާމޯސް ހޯދުމަށް މަސައްކަތްކުރަމުން

16 އަހަރަށްފަހު ރެއާލް މެޑްރިޑް ދޫކޮށްލަން އެ ކުލަބުގެ ލެޖެންޑް ސާޖިއޯ ރާމޯސް ނިންމައިފިއެވެ.

ބުދަ ދުވަހުގެރޭ ރެއާލުން ވަނީ ރާމޯސް އެ ކުލަބު ދޫކޮށްލަން ނިންމާފައިވާކަން ކަށަވަރުކޮށްދީފައެވެ. ރެއާލުން ނެރުނު ބަޔާނެއްގައި ބުނީ ރާމޯސް ރެއާލް ދޫކޮށްލަން ނިންމާފައިވާ ކަމަށާއި، އެކަމާ ގުޅޭ ނޫސްވެރިންގެ ބައްދަލުވުމަކަށް ތައްޔާރުވަމުން އަންނަ ކަމަށެވެ. އަދި މި ބައްދަލުވުމުގައި ރާމޯސްގެ އިތުރުން ރެއާލްގެ ރައީސް ފްލޮރިންޓީނޯ ޕެރޭޒް ބައިވެރިވާނެ ކަމަށްވެސް ވަނީ ބުނެފައެވެ. މީގެ އިތުރުން ރާމޯސްއަށް "ފެއާވެލް" އެއް ބޭއްވުމަށް ތައްޔާރުވަމުން އަންނަ ކަމަށްވެސް ރެއާލުން ވަނީ ބުނެފައެވެ.

ރިޕޯޓުތައް ބުނާ ގޮތުން ރެއާލާއެކު ހަދާފައިވާ އެއްބަސްވުން އާކުރަން ރާމޯސް ބޭނުންވި ނަމަވެސް، ރެއާލުން ވަނީ ރާމޯސްގެ ހުށަހެޅުމަށް ދެކޮޅު ހަދާފައެވެ. އުމުރުން މިހާރު 34 އަހަރުގެ ރާމޯސް ރެއާލް ދޫކޮށްލަން ނިންމިއިރު، ފްރާންސްގެ ޕީއެސްޖީން އަންނަނީ އޭނާގެ ސޮއި ހޯދުމަށް މަސައްކަތް ކުރަމުންނެވެ.

ރާމޯސް ރެއާލް ދޫކޮށްލާއިރު، ސްޕެއިންގެ ސެވިއްޔާ ދޫކޮށް ރާމޯސް ރެއާލާ ގުޅުނީ 2005 ވަނަ އަހަރުއެވެ. ރެއާލާއެކު ގިނަ ކާމިޔާބީތަކެއް ހޯދައިފައިވާ ރާމޯސްއަކީ ރެއާލުގެ ތާރީޚުގައި އެންމެ ކާމިޔާބު ކެޕްޓަނެވެ. ރެއާލަށް ކުޅެދިން 671 މެޗުގައި ރާމޯސް ވަނީ އެޓީމަށް 101 ލަނޑު ކާމިޔާބުކޮށްދީފައެވެ. އަދި ވަނީ ރެއާލާއެކު ޔުއެފާ ޗެމްޕިއަންސް ލީގު ހަތަރު ފަހަރު، ސްޕެނިޝް ލީގު ފަސް ފަހަރު، ފީފާ ކުލަބު ވޯލްޑް ކަޕް ހަތަރު ފަހަރު، ސްޕެނިޝް ކަޕް ދެ ފަހަރު، ޔުއެފާ ސުޕަ ކަޕް ތިން ފަހަރު އަދި ސްޕެނިޝް ސުޕަ ކަޕް ހަތަރު ފަހަރު ކާމިޔާބުކޮށްފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އިސްމާޢީލް ޝާހް
0%
0%
0%
0%
0%
100%
ކޮމެންޓް