ސަރުކާރުގެ މިދައުރު ނިމޭއިރު މާލޭގެ ހުރިހާ ރައްޔިތުންނަށް ބޯހިޔާވަހިކަން ލިބޭނެ- މިނިސްޓްރީ

މާލޭގައި ބޯހިޔާވަހިކަމަށް ބޭނުން ޖެހިފައިވާ ހުރިހާ ރައްޔިތުންނަށް، ސަރުކާރުގެ މި ދައުރު ނިމޭއިރު ބޯހިޔާވަހިކަން ލިބޭނެކަމަށް މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ އިން ބުނެފިއެވެ.

އަންގާރަ ދުވަހުގެރޭ ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަ ދައްކަވަމުން މިނިސްޓްރީގެ ޑެޕިއުޓީ މިނިސްޓަރ މުޙައްމަދު ޢާޞިމް ވިދާޅުވީ، ބޯހިޔާވަހިކަމަށް ބޭނުންޖެހިފައިވާ މިންވަރު ބެލުމަށް ކުރި ދިރާސާތަކުން، އެކަށީގެންވާ ބޯހިޔާވަހިކަމެއް ނެތި 17000 މީހުން މާލޭގައި އެކަނިވެސް ދިރިއުޅެމުންދާކަމަށް ފާހަގަވެފައިވާ ކަމަށެވެ. އޭގެ ތެރެއިންވެސް 5000ށް ވުރެ ގިނަ މީހުންނަކީ މާލޭގެ ރައްޔިތުންކަން އޭނާ ފާހަގަ ކުރެއްވިއެވެ.

ސަރުކާރުގެ ބޯހިޔާވަހިކަމުގެ މަޝްރޫއުގެ ތެރެއިން މާލޭގައި ބޯހިޔާވަހިކަން ބޭނުންވާ ހުރިހާ ފަރާތްތަކަށް މި ދައުރު ނިމޭއިރު ބޯހިޔާވަހިކަން ފޯރުކޮށްދީ ނިމޭނެ ކަމަށާއި، އެގޮތުން ފަހި ދިރިއުޅުން ކޯޕަރޭޝަނުން އެއްބަސްވުމުގައި ސޮއިކޮށް ކުރިއަށް ގެންދާ 6000 ހައުސިންގ ޔުނިޓާއި، އަންގާރަ ދުވަހު ބިންގާ އެޅި 1000 ޔުނިޓާއެކު، އެކަން ހާސިލުވެގެންދާނެ ކަމަށް އާސިމް ވިދާޅުވިއެވެ.

ޢާޞިމް މިހެން ވިދާޅުވެފައިވާއިރު، ހުޅުމާލޭގައި އިމާރާތް ކުރާ 1000 ހައުސިންގ ޔުނިޓުތަކުގެ އަމަލީ މަސައްކަތް ފަށާފައިވަނީ އަންގާރަ ދުވަހުއެވެ. މި 1000 ފްލެޓް އެޅުމަށް ނިންމާފައިވަނީ ތިން ކެޓަގަރީއަކަށް ބަހާލައިގެންނެވެ. އެއީ ކައުންސިލް ހައުސިންގ އެފޯޑަބަލް ހައުސިންގ އަދި މިޑްރޭޖް ހައުސިންގއެވެ.

ކައުންސިލް ހައުސިންގ ގެ ދަށުން 650 އަކަފޫޓުގެ ދެ ކޮޓަރި، 800 އަކަފޫޓުގެ 3 ކޮޓަރި، އެފޯޑަބަލް ހައުސިންގ 650 އަކަފޫޓުގެ 2 ކޮޓަރި، 900 އަކަފޫޓުގެ 3 ކޮޓަރި، މިޑްރޭންޖް ހައުސިންގ 750 އަކަފޫޓުގެ 2 ކޮޓަރި، އަދި 1000 އަކަފޫޓުގެ 3 ކޮޓަރި އެޅުމަށް ވަނީ ނިންމާފައެވެ.

މި ފްލެޓްތަކުގެ ކޮންސެޕްޓް ޑިޒައިންކޮށް، އިމާރާތް ކުރުމާއި ފައިނޭންސިންގ ކުރިއަށްދާނީ އެޕޯލޯ ހޯލްޑިންގ ކުންފުނީގެ ފަރާތުންނެވެ.