މިސަރުކާރުން ފްލެޓް ދޫކުރާއިރު، އެތަނުގައި ވަގުތުން ދިރިއުޅެވޭނެ- ހައުސިން

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ ސަރުކާރުގައި ހިންގާ ބޯހިޔާވަހިކަމުގެ މަޝްރޫއުތަކުގެ ތެރެއިން ފްލެޓްތައް ދޫކުރާއިރު، ހުންނާނީ ހުރިހާ މަސައްކަތްތަކެއް ނިމިފައި ކަމަށް މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އިން ބުނެފިއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި އެމިނިސްޓްރީގެ ޑެޕިއުޓީ މިނިސްޓަރު މުޙައްމަދު ޢާޒިމް ވިދާޅުވީ މިސަރުކާރުގައި ހިންގާ ހުރިހާ ބޯހިޔާވަހިކަމުގެ މަޝްރޫއުތަކުން ފްލެޓުތައް ވެރިފަރާތްތަކާއި ހަވާލުކުރާއިރު، ޚިދުމަތް ދެވޭވަރަށް ހުރިހާ ފިނިޝިންގެ މަސައްކަތްތަކެއް ހުންނާނީ ނިމިފައި ކަމަށެވެ. އަދި އެފްލެޓްތަކުގައި ވަގުތުން ދިރިއުޅެވޭނެ ކަމަށެވެ.

ޢާޒިމް މިހެން ވިދާޅުވެފައިވާއިރު، ކުރީގެ ރައީސް ޢަބްދުﷲ ޔާމީންގެ ވެރިކަމުގައި ހިންގި، ހިޔާ މަޝްރޫއުގެ ފްލެޓްތަކުގެ މަސައްކަތް ހަވާލު ކުރެވުނު ކޮންޓްރެކްޓަރާ އެކު އެތަނުގެ ފިނިޝިންގ މަސައްކަތް ކުރުމަށް އެއްބަސްވެވިފައި ނުވެއެވެ. އެހެންކަމުން، މި ތަންތަން އާންމުންނާ ހަވާލު ކުރެވިގެން ދާނީ ފިނިޝިންގ މަސައްކަތް ނުނިންމައެވެ. އެހެންކަމުން އެ ފްލެޓްތައް ލިބޭ މީހުން އެތަނެއްގައި ތަށި މުށި ހަރުކުރުމާއި، ދޮރު ހަރު ކުރުމާއި، ބޮކި ހަރު ކުރުމުގެ މަސައްކަތްތައް ކުރަން ޖެހެއެވެ.

ހުޅުމާލެ ދެވަނަ ފިޔަވަހީގައި އަޅާފައިވާ ހިޔާ ފްލެޓްތަކަށް ބަދަލު ނުވެވި ގިނަ ދުވަސްތަކެއް ވަމުން ދިއުމާއި ގުޅިގެން އާންމުންގެ ގިނަ ކަންބޮޑުވުން ފާޅުކުރަމުން ދާއިރު، މިހާރު ކުރިއަށްދަނީ ގުރުއަތު ނެގުމުގެ މަސައްކަތެވެ. އަދި ޖުލައި މަހުގެ 15ން ފެށިގެން މަސްދުވަހުގެ ތެރޭގައި އެގްރިމެންޓްކޮށް ނިމޭނެއެވެ.

ބޯހިޔާވަހިކަން ކަށަވަރު ކުރުމަށް "ގެދޮރުވެރިޔާ"ގެ ލުއި ލޯން ސްކީމަށް އަލިއަޅުއްވާލައްވައި ޢާޒިމް ވިދާޅުވީ، ލޯނަށް އެދި ހުށައަޅާއިރު އެމީހަކީ ލޯނު ދެއްކޭނެ ފަދަ ގާބިލުކަން ހުރި މީހަކަށް ވާންޖެހޭ ކަމަށެވެ. އަދި ލޯނަށް ހުށަހަޅާއިރު، އެމީހެއްގެ ނަމުގައި ރަޖިސްޓްރީކޮށްފައިވާ އިމާރާތަކަށް ވުމާއި، މަދުވެގެން 3 އަހަރު އެރަށެއްގައި ދިރިއުޅެން ޖެހޭނެ ކަމަށެވެ.

މިލޯނުގެ އިންޓަރެސްޓަށް އިޝާރާތްކުރައްވާ ޢާޒިމް ވިދާޅުވީ މި ލޯން ސްކީމްގެ ދަށުން ލުއިތަކެއް ލިބެގެންދާނެ ކަމަށާއި، އަމިއްލަ ބޯހިޔާވަހިކަން ލިބިގެންދާނެ ކަމަށެވެ. ގެދޮރުވެރިޔާ ލޯނަށް 6 ޕަސެންޓް އިންޓްރަސްޓް ރޭޓަކީ އެކަށީގެންވާ އަދަދެއް ކަމަށާއި، ލޯނުގެ ގްރޭސް ޕީރިއަޑްގެ ތެރޭގައިވެސް އިންޓްރަސްޓެއް ނުނަގާނެ ކަމަށް އޭނާ ވިދާޅުވިއެވެ.

ޢާޒިމް ވިދާޅުވީ ގެދޮރުވެރިޔާ ލޯނު ސްކީމުގެ ދަށުން 7 ލައްކަ ރުފިޔާއާ ހަމައަށް ފައިސާ ދޫކުރާއިރު، އެ އަގަކީ ކޮންޓްރެކްޓަރުންގެ ފަރާތުން ލިބިފައިވާ އަގުތަކަށް ބަލައި ކަނޑައަޅާފައިވާ ބެންޗް މާރކެއް ކަމަށެވެ.

އަލަށް ތައާރަފްކުރި މި ލޯން ސްކީމަކީ، މާލީ ތަނަވަސްކަން ނެތުމުގެ ސަބަބު އަމިއްލަ ބޯހިޔާވަހިކަމަށް ހުރަސްއެޅިފައި ތިބި އާއިލާތަކަށް ޚާއްސަ ކޮށްގެން ސަރުކާރުން ހުޅުވާލާފައިވާ ލުއި ލޯނު ސްކީމެކެވެ. މާލީ ތަނަވަސްކަން ނެތުމުގެ ސަބަބުން ގެދޮރު ނޭޅި ތިބި މީހުންނަށް ލުއިތަކެއް ހޯއްދަވައި ދެއްވާނެ ކަމަށް ރައީސުލްޖުމްހޫރިއްޔާ ވަނީ ވައުދުވެވަޑައިގެންފައެވެ. މި ލޯން ސްކީމާއެކު އަމިއްލަ ގެއެއް ހަދަން ފަށައި، މާލީ ދަތިކަމުގެ ސަބަބުން މަސައްކަތް ނުނިމި ހުރި ފަރާތްތަކަށް މި ލުއި ލޯން ސްކީމާއެކު ދިރުއުޅުން އިތުރު ހަރުފަތަކަށް ގެންދިޔުމަށް މަގު ފަހިވެގެންދާނެއެވެެ. ލޯން ސްކީމްގެ އަމާޒަކީ، ދެމެހެއްޓެނިވި ގޮތެއްގައި ބޯހިޔާވަހިކަން ރާއްޖޭގެ ހުރިހާ ކަންކޮޅުތަކަށް ކަށަވަރުކޮށްދިނުމެވެ.