ކޮންޓެކްޓް ޓްރޭސިންއާއި އެކްޓިވް ސަރވަލެންސް މަސައްކަތްތައް އަލުން ފަށައިފި
ކޮންމެ ކޭސްއެއްގެ ފުލް ޓްރޭސިންގެ މަސައްކަތް ކުރިއަށްދާނެ
ކޮވިޑަށް ޓެސްޓު ކުރުމަށް ސާމްޕަލް ނަގަނީ
ކޮވިޑް-19ގެ ހަތަރުވަނަ ރާޅާއެކު ކޭސްތައް އިތުރުވުމާއި ގުޅިގެން މަޑު ޖައްސާލި ކޮންޓެކްޓް ޓްރޭސިންއާއި އެކްޓިވް ސަރވަލެންސް މަސައްކަތްތައް އަލުން ފަށައިފިއެވެ.
އަންގާރަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި, ހެލްތް އިމަޖެންސީ އޮޕަރޭޝަން ސެންޓަރު (އެޗްއީއޯސީ)ގެ ތަރުޖަމާނު ޑރ. ނަޒްލާ ރަފީޤު ވިދާޅުވީ ކޭސްތައް އިތުރުމާއި ގުޅިގެން ކޮންޓެކްޓް ޓްރޭސިންގެ މަސައްކަތް ކުރިއަށް ނުގެންދެވުނު ކަމަށާއި، އެކްޓިވް ސަރވަލެންސްގެ މަސައްކަތްތައް މަޑު ޖައްސާލަން ޖެހުނު ކަމަށެވެ. ނަމަވެސް މިހާރު މި ދެ މަސައްކަތްވެސް ފަށާފައިވާކަން ޑރ. ނަޒްލާ ފާހަގަކުރެއްވިއެވެ.
ޑރ. ނަޒްލާ ވިދާޅުވީ ކޮންޓެކްޓް ޓްރޭސިންގައި ވެސް ހަމަ ކޮންމެ ކޭސްއެއްގެ ފުލް ޓްރޭސިންގެ މަސައްކަތް ކުރިއަށްދާނެ ކަމަށެވެ. އެގޮތުން 24 ގަޑިއިރުގެ ތެރޭގައި 80 އިންސައްތަ ކޭސް، އަދި 48 ގަޑިއިރުގެ ތެރޭގައި ޕޮޒިޓިވްވާ ހުރިހާ ކޭސްއެއް ކޮންޓެކްޓް ޓްރޭސިން ހެދިގެންދާނެ ކަމަށް ވިދާޅުވިއެވެ.
މީގެ އިތުރުން ކޮންޓެކްޓް ޓްރޭސިންގެ މަސައްކަތްތައް މަޑު ޖައްސާލުމާއެކު ކޭސްތައް ފެންނަ މިންވަރު މަދުވާނެ ކަމަށާއި، މިފަހަރުގެ ހާލަތުން ކޮވިޑް ކޭސްތަކުގެ ހަގީގީ މަންޒަރު ސާފުނުވާ ކަމަށް ވިދާޅުވިއެވެ.
ޑރ.ނަޒްލާ ވިދާޅުވީ އެކްޓިވް ސަރވަލެންސްގައި މަދުވެގެން 380 ސާމްޕަލް ކޮންމެ ދުވަހަކު ވެސް ނަގާނެ ކަމަށެވެ. މިމަސައްކަތުގައި އާއްމު ރައްޔިތުންގެ ފުރިހަމަ އެއްބާރުލުން ބޭނުންވާކަން އޭނާ ފާހަގަކުރެއްވިއެވެ.
މިހާރުގެ ހާލަތަށް އިޝާރާތް ކުރައްވައި ޑރ.ނަޒްލާ ވިދާޅުވީ އާބާދީގެ ނިސްބަތަށް ބަލާއިރު ކޭސްތައް ފެންނަ މިންވަރު އަދިވެސް އިތުރު ކަމަށާއި، އަންލިންކް ކޭސްތައް ގިނަ ކަމަށެވެ. އެހެންކަމުން ކުރިއަށް އޮތްތަނުގައި ވެސް ބަލި ކޮންޓްރޯލް ކުރުމަށް އަޅާފައިވާ ފިޔަވަޅުތަކާއި އެއްގޮތަށް އަމަލުކުރުމަށް ވަނީ އިލްތިމާސްކޮށްފައެވެ.
