މުޖްތަމައުގެ ތެރޭގައި ކޮވިޑްގެ ކޭސްތައް ގިނަވަނީ، ސަމާލުވޭ!

އެޑްމިޓްކޮށްގެން ފަރުވާދޭ މީހުންގެ ފަރާތުން ކޮވިޑަށް ޕޮޒިޓިވްވާ މީހުންގެ އަދަދު އިތުރުވެފައިވާ ކަމަށާއި، މިއީ ކޮމިއުނިޓީ ތެރޭގައި ކޭސްތައް އިތުރުވެފައިވާ ކަމުގެ ހެއްކެއް ކަމަށް އައިޖީއެމްއެޗުގެ އެތެރެހަށީގެ ޑޮކްޓަރު، ޑރ. މުހައްމަދު އަލީ ވިދާޅުވެއްޖެއެވެ.

ޓްވިޓާގައި ހިއްސާކުރެއްވި މެސެޖެއްގައި ޑރ. މުހައްމަދު އަލީ ވިދާޅުވީ އެޑްމިޓްކޮށްގެން ފަރުވާދެމުން އަންނަ މީހުން ޕޮޒިޓިވްވަމުން އަންނަ ކަމަށެވެ. މީގެ މާނައަކީ ކޮމިއުނިޓީ ތެރޭގައި ކޮވިޑްގެ ކޭސްތައް ހުރީ ވަރަށް މަތީގައި ކަމަށެވެ.

ޑރ. މުހައްމަދު އަލީ ވަނީ ބަލި މީހުން ކައިރިއަށް ޒިޔާރާތް ކުރާ ފަރާތްތަކުން ސަމާލުވުމަށް އެދިލައްވާފައެވެ. އަދި ބަލިމީހުން ކައިރިއަށް ޒިޔާރާތްކުރާ މީހުންގެ އަދަދު ވެސް މަދުކުރުމަށް ވަނީ އެދިފައެވެ. އަދި މިއީ ދިފާއީ ގޮތުން އިތުރު ފިޔަވަޅު އަޅަންވީ ވަގުތުކަމަށް ޑރ. މުހައްމަދު އަލި ވަނީ ވިދާޅުވެފައެވެ.

ފާއިތުވި މަސްތަކުގައި ރާއްޖޭގައި ކޮވިޑް-19ގެ ކޭސްތައް މަދުވެފައި އޮތުމަށްފަހު އަނެއްކާ ވެސް އިތުރުވާންފަށާފައިވާކަމަށް ތަފާސްހިސާބުތަކުން ދައްކާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ވެސް ވަނީ ބުނެފައެވެ.

އެޗްޕީއޭއިން ހޯމަ ދުވަހު ނެރުނު ބަޔާނެއްގައި ބުނީ، ފާއިތުވި ހަފުތާގައި ރާއްޖޭން 142 ކޭސް ފެނިފައިވާ ކަމަށެވެ. މިއީ އޭގެ ކުރީ ހަފުތާއާއި އަޅާބަލާއިރު 69 އިންސައްތައިގެ އިތުރުވުމެއްކަންވެސް ވަނީ ފާހަގަކޮށްފައެވެ.

ކޮވިޑުގެ ކޭސްތައް އިތުރުވުމާއެކު ސާމްޕަލް ޕޮޒިޓިވިޓީއާއި ހޮސްޕިޓަލުގައި އެނދުމަތިކޮށްގެން ފަރުވާ ދޭ މީހުންގެ އަދަދުވެސް އިތުރުވަމުންދާކަމަށް އެޗްޕީއޭއިން ބުނެއެވެ. އެގޮތުން މެއި މަހު ކޮވިޑު ޖެހިގެން 15 މީހުން އެޑްމިޓްކުރިއިރު ޖޫންމަހުގެ 12 ވަނަ ދުވަހާ ހަމައަށް އެކަނިވެސް 11 މީހުން އެޑްމިޓްކޮށްފައިވާ ކަމަށްވެސް އެ އިދާރާއިން ބުނެއެވެ.

އެޗްޕީއޭއިން ވަނީ ރާއްޖޭގައި ކޮވިޑުގެ ހާލަތު އިތުރަށް ގޯސްވިޔަނުދިނުމަށް ސަމާލުކަންދޭންވީ ކަންކަން ވެސް ފާހަގަކޮށްފައެވެ.

އެޗްޕީއޭއިން ބުނީ ދުނިޔޭގައި އަދިވެސް ކޮވިޑުގެ ހާލަތު ދެމިއޮތުމާއެކު ބައެއް ގައުމުތަކުގައި މިހާރުވެސް ހާލަތު ގޯސްވަމުންދާކަމަށެވެ. ނަމަވެސް ރާއްޖޭގެ ހާލަތު އިތުރަށް ގޯސްވިޔަނުދިނުމަށް ހުރިހާ ފަރާތްތަކުންވެސް ރައްކާތެރިކަމުގެ ފިޔަވަޅުތައް އެޅުމަށް އެ އިދާރާއިން ވަނީ އިލްތިމާސްކޮށްފައެވެ.