ހަރުކަށި ފިކުރާ ދެކޮޅަށް އައްޑޫ ސިޓީގައި ފުލުހުން ހިންގި އޮޕަރޭޝަންތަކުގައި ހައްޔަރުކުރި ފަސް މީހުން ދޫކޮށްލަން އައްޑު އަތޮޅު ހިތަދޫ މެޖިސްޓްރޭޓް ކޯޓުން ކުރި އަމުރު ހައިކޯޓުން ބާތިލުކޮށްފިއެވެ.

މި މައްސަލައިގައި ހިމެނޭ ފަސް މީހުންނަކީ, ގދ.މަޑަވެލި/ ގަމަރީ އިޢުތިޞާމް މުޙައްމަދު ސަޢީދު, އާއި ގއ. ކޮލަމާފުށި/ ވިކްޓްރީ ހައުސް މަފްތޫޙް ސަޢީދު, އާއި ސ. ހިތަދޫ/ ކާކީގެ ޙަސަން ޝިހާން އިބްރާހީމް, އާއި ސ. މީދޫ/ ސައީދާމަންޒިލް ޢަބްދުﷲ ހައިޝަމް, އާއި ހއ. ހޯރަފުށި/ އަލަނާސިގެ މުޙައްމަދު ތަސްލީމެވެ.

ޓެރަރިޒަމްގެ އަމަލުތައް ހިންގުމަށް މަސައްކަތްކޮށް, އެފަދަ މަސައްކަތުގައި އަމަލީގޮތުން ބައިވެރިވެ، އެފަދަ އަމަލުތަކަށް ހިތްވަރު ދިނުމާއި، ހަރުކަށި ފިކުރު ފެތުރުމާއި، ގޮވާތަކެތި ހެދުމުގެ މައުލޫމާތު އެހެން މީހުންނަށް ފޯރުކޮށްދިނުމާއި، ހަރުކަށި ފިކުރުގެ ފަރާތްތަކާ ގާތް ގުޅުމެއް ބާއްވަމުން ދާކަމުގެ ތުހުމަތުގައި މުޙައްމަދު ތަސްލީމް ހައްޔަރުކޮށްފައި ވަނީ މެއި މަހުގެ 15ވަނަ ދުވަހުއެވެ.

މި މައްސަލައިގައި އިޢުތިސާމް މުޙައްމަދު ސަޢީދު ހައްޔަރުކޮށްފައިވަނީ، ޓެރަރިޒަމްގެ ޢަމަލު ހިންގުމަށް ޢަމަލީގޮތުން މަސައްކަތް ކޮށް، ގޮވާތަކެތި ހެދުމުގެ މައުލޫމާތު އެހެން މީހުންނަށް ފޯރުކޮށްދޭ ކަމަށް މުޙައްމަދު ތަސްލީމްގެ މައްޗަށް ކުރެވުނު ތުހުމަތުގައި ބައިވެރިވުމެއް އޮތް ކަމަށް ތުހުމަތުކުރެވިގެންނެވެ. އިޢުތިޞާމް ހައްޔަރުކޮށްފައި ވަނީ މެއި 17 ގައެވެ.

މަފްތޫޙް ސަޢީދާއި, ޙަސަން ޝިހާން އިބްރާހީމާއި, ޢަބްދުﷲ ހައިޝަމް ހައްޔަރުކުރީ އައްޑޫ ސިޓީގައި ވަކި ޖަމާޢަތެއްގެ ގޮތުގައި ހަރުކަށި ފިކުރު ފެތުރުމަށްޓަކައި ޓެރަރިޒަމްގެ ޢަމަލުތަކަށް ހިތްވަރުދީ އައި.އީ.ޑީ ހެދުމަށް ބޭނުންކުރާ ތަކެތި ރައްކާކޮށްގެން ގެންގުޅެ, އެ ތަކެތި ބޭނުންކޮށްގެން ބަޔަކަށް ނުވަތަ ބައެއްގެ މުދަލަށް ގެއްލުމެއް ދީފާނެ ކަމުގެ ތުހުމަތުގައެވެ. އެ މީހުން ހައްޔަރުކޮށްފައިވަނީ މެއި މަހުގެ 15 ވަނަ ދުވަހުއެވެ.

މި މައްސަލައިގައި އެ ފަސްމީހުންގެ ބަންދުގެ މުއްދަތު ތިންވަނަ ފަހަރަށް އިތުރުކުރުމަށް ދަށުކޯޓަށް ފުލުހުންގެ ފަރާތުން ހުށަހެޅުމުން, އެއްވެސް ޝަރުތަކާ ނުލާ އެމީހުން ދޫކޮށްލުމަށް ދަށުކޯޓުން ވަނީ އަމުރުކޮށްފައެވެ. ދަށު ކޯޓުން އެގޮތަށް އަމުރު ކުރީ އެ ފަސްމީހުންގެ މައްޗަށް ތުހުމަތު ކުރެވޭ މައްސަލައިގެ ހެއްކާއި ޤަރީނާ ހުށަހަޅާފައި ނުވުމުން އެ މީހުން ބަންދުގައި ބަހައްޓަންޖެހޭ ސަބަބެއް މިވަގުތު ނެތްކަމަށް ބުނެއެވެ. އެހެން ކަމުން ޕްރޮސެކިއުޓަރ ޖެނެރަލްގެ އޮފީހުން ވަނީ  މި މައްސަލަ ހައިކޯޓުގައި އިސްތިއުނާފް ކޮށްފައެވެ.

ފަސްމީހުންގެ މައްޗަށް ހުށަހެޅިފައިވާ ހެކިތަކުގެ މައްޗަށް ރިޢާޔަތްކޮށް ހައިކޯޓުން ބުނެފައިވަނީ, މި މައްސަލައިގައި ތުހުމަތުކުރެވޭ ކޮންމެވެސް ވަރެއްގެ ހެކި ފުރަތަމަވެސް ލިބިފައި ވާކަން އެނގޭ ކަމަށެވެ. އެމީހުންނަށް ތުހުމަތު ކުރެވޭ ކުށްތަކަކީ ޖިނާއީ ބޮޑެތި ކުށްތަކުގެ ތެރޭގައި ހިމެނޭ ކުށްތަކެއް ކަމަށް ހައިކޯޓުގެ ނިންމުމުގައި ބުނެފައި ވެއެވެ. އަދި އޭގެ ޒާތުގައި ގައުމީ ސަލާމަތާއި ގައުމުގެ އަމަން އަމާންކަމާއި ރައްޔިތުންގެ މެދުގައި އޮންނަންޖެހޭ ހަމަޖެހުން ނެތި, ބިރުވެރިކަން ފެތުރިގެންދާފަދަ ނުރައްކާތެރިކަން ބޮޑު ކުށްތަކެއް ކަމަށްވާތީ, އެ ފަދަ ކުށްތަކުގައި ތުހުމަތުކުރެވޭ މީހުންނާ މެދު ހުށަހެޅިފައިވާ ހެކިތަކާއި ޤަރީނާތަކުގެ މައްޗަށް ބުރަވެ ގޮތް ގަނޑައަޅަން ޖެހޭނީ, އެ ފަދަ ކުށްތަކުގެ ނިސްބަތުން ދޭންޖެހޭ ބުރަދަން ދެވިގެން ކަމަށް ހައިކޯޓުން ބުނެފައިވެއެވެ.

އިސްތިޢުނާފް މައްސަލައިގެ ޙުކުމްގައި ހައިކޯޓުން ބުނެފައިވަނީ ހިތަދޫ މެޖިސްޓްރޭޓް ކޯޓުން އެމީހުން ދޫކޮށްލުމަށް ކުރިއަމުރު ނެރެފައި ވަނީ ޤާނޫނާ ޚިލާފަށް ކަމަށެވެ. އަދި ޖިނާއީ އިޖުރާއަތުގެ ގާނޫނުގެ 52ވަނަ މާއްދާގެ ދަށުން އެ ފަސްމީހުން 15 ދުވަހުގެ މުއްދަތަށް ބަންދުކުރުމަށް މައްސަލަ ބެލި ފަނޑިޔާރުންގެ އިއްތިފާޤުން ހައިކޯޓުން ވަނީ ޙުކުމްކޮށްފައެވެ.