ޝާހީ ފަރިއްކޮޅެއްގައި ބޮޑު ކަނޑިއަކުން ކޭކު ފަޅުއްވައި އިނގިރޭސި ރާނީ އެލިޒަބެތުގެ ހުނަރުފުޅު ދައްކަވާލައްވައިފިއެވެ.
ރާނީ އެލިޒަބެތު ކަނޑިން ކޭކު ފަޅުއްވާފައި ވަނީ އީޑެން ޕްރޮޖެކްޓުން އިންތިޒާމުކުރި ޚާއްސަ ޖާފަތެއް ކަމަށްވާ 'ދަ ބިގް ލަންޗް' ގައެވެ.
ޖާފަތުގައި ކޭކު ފަޅުއްވަން ރާނީ ކަނޑިއެއް ހޯއްދެވުމުން, ތަނުގައި ހުރި އޮފިޝަކަލަކު ވަޅި އެބަ އޮތޭ ގޮވާލާ އަޑުއިވެއެވެ. ޖަވާބުގައި ރާނީ ވިދާޅުވީ ވަޅި އޮތްކަން އެނގިވަޑައިގަންނަވާ ކަމަށާއި, އެކަމަކު ކަނޑިން ކޭކު ފެޅުމަކީ މާ ތަފާތު ގޮތެއްކަމުގައެވެ.
މީސް މީޑިއާގައި މިހާރު ދައުރުވަމުންދާ ވީޑިއޯއިން ފެންނަ ގޮތުގައި ރާނީ ކޭކު ފެޅުއްވިއިރު އަރިހުގައި ޑަޗެސް އޮފް ކެމްބްރިޖް ކޭޓްއާއި ޑަޗެސް އޮފް ކޯންވޯލް ކެމިލާ ހުންނެވިއެވެ. ކަނޑިއަކުން ކޭކު ފެޅުމަކީ ތަފާތު ގޮތެކޭ ރާނީ ވިދާޅުވުމާއެކު ދެ ބޭފުޅުން ވެސް ހިނިފުޅުވަޑުވާ މަންޒަރު ފެނިގެން ދެއެވެ.
މެންދުރުގެ ޖާފަތުގައި ބައިވެރިވެ ވަޑައިގެންނެވުމުގެ ކުރިން, ޖީ7 ސަމިޓްގެ ލީޑަރުންނާއެކު އިނގިރޭސި ބޮޑުވަޒީރު ބޮރިސް ޖޯންސަން، އީޑެން ޕްރޮޖެކްޓުގައި ބޭއްވި ރަސްމިއްޔާތުގައި ރާނީ ބައިވެރިވެވަޑައިގެންނެވިއެވެ. ރާނީގެ އަރިހުގައި ޕްރިންސް ޗާލްސް, ޕްރިންސް ވިލިއަމް, ކެމިލާ، އަދި ކޭޓްވެސް ޖީ7 ލީޑަރުންނާ ބައްދަލު ކުރެއްވިއެވެ.
