ފާއިތުވި 24 ގަޑިއިރު މާލެ ސަރަހައްދަށްވުރެ އަތޮޅުތެރޭގެ ކޭސްތައް ގިނަ
12 ޖޫން 2021 | ހޮނިހިރު 17:48ރާއްޖެއިން މިހާތަނަށް ޕޮޒިޓިވްވި މީހުންގެ އަދަދު ވަނީ 70،077ށް އަރާފައި
މާލެ ސަރަހައްދުން 88 މީހުން ޕޮޒިޓިވްވިއިރު، އަތޮޅުތެރޭގެ ރަށްރަށުން 137 މީހުން ޕޮޒިޓިވްވި
ފާއިތުވި 24 ގަޑިއިރުގެތެރޭގައި މާލެ ސަރަހައްދަށްވުރެ އަތޮޅުތެރެއިން ރިޕޯޓު ކުރެވުނު ކޮވިޑް-19ގެ ކޭސްތައް ގިނަ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ)ގެ ތަފާސްހިސާބުތައް ދައްކައިފިއެވެ.
އެޗްޕީއޭއިން ބުނީ ހުކުރު ދުވަހުގެ އިރުއޮއްސި 6:00ން ހޮނިހިރު ދުވަހުގެ އިރުއޮއްސި 6:00އާ ހަމައަށް ކޮވިޑްގެ 246 ކޭސް ރިޕޯޓު ކުރެވިފައިވާ ކަަމަށެވެ. އެއީ މާލެ ސަރަހައްދުން ޕޮޒިޓިވްވި 88 މީހުންނާއި، އަތޮޅުތެރޭގެ ރަށްރަށުން ޕޮޒިޓިވްވި 137 މީހުންނާއި، ރިސޯޓުތަކުން ޕޮޒިޓިވްވި 13 މީހުންނާއި، އަދި ހަދަމުންދާ ރަށްރަށުން ޕޮޒިޓިވްވި 8 މީހުންނެވެ.
ފާއިތުވި 24 ގަޑިއިރު ނެގުނު 4،788 ސާމްޕަލްގެ ތެރެއިން ޕޮޒިޓިވްވި 246 މީހުންނާއެކު ރާއްޖެއިން މިހާތަނަށް ޕޮޒިޓިވްވި މީހުންގެ އަދަދު ވަނީ 70،077ށް އަރާފައެވެ. އަދި އެކްޓިވް ކޭހުގެ އަދަދު 11،04ށް ވަނީ އަރާފައެވެ.
97 މީހަކަށް ހޮސްޕިޓަލުގައި އެޑްމިޓް ކޮށްގެން ފަރުވާ ދެމުން އަންނައިރު 2،030 މީހަކު ވަނީ ބަލިން ރަނގަޅުވެފައެވެ. މިއާއެކު މިހާތަނަށް މި ބަލިން ރަނގަޅުވި މީހުންގެ އަދަދު ވަނީ 58،832ށް އަރާފައެވެ. ރާއްޖެއިން ކޮވިޑް ޖެހިގެން 194 މީހަކު ވަނީ ނިޔާވެފައެވެ.
ރާއްޖޭގައި ކޮވިޑް ފެތުރެމުން އަންނައިރު ކޮވިޑްގައި ނިޔާވާ މީހުންގެ އަދަދު ވެސް ވަނީ އިތުރުވާން ފަށާފައެވެ.
އޭޕްރީލް މަހުގެ 28ން ފެށިގެން ޖޫން މަހުގެ 5އާ ހަމައަށް ނިޔާވި މީހުންގެ ތެރެއިން ވެކްސިން ޖަހާފައިވަނީ 30 އިންސައްތަ މީހުންނެވެ. ނިޔާވި 111 މީހުންގެ ތެރެއިން 80 އިންސައްތަ މީހުންނަކީ ހައިރިސްކް މީހުންނަށް ވާއިރު 70 އިންސައްތަ މީހުން އެއްވެސް ޑޯޒެއް ނުޖަހާކަމަށް ތަފާސް ހިސާބުތައް ދައްކައެވެ.
