ހިޔާ ފްލެޓުތަކުގެ ގޭސް ހޮޅީގެ ނެޓްވޯރކް ޑިޒައިން ކުރަން ބަޔަކު ހޯދަނީ

ހުޅުމާލޭގެ ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓުތަކަށް ކައްކާ ގޭސް ފޯރުކޮށްދިނުމަށް އަޅާ ގޭސް ހޮޅީގެ ނެޓްވޯކް ޑިޒައިންކޮށްދޭނެ ބަޔަކު ހޯދަން އިއުލާނުކޮށްފިއެވެ.

ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން ވަނީ ހުޅުމާލޭ ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓުތަކަށް ކައްކާ ގޭސް ފޯރުކޮށްދިނުމަށް އަޅާ ގޭސް ހޮޅީގެ ނެޓްވޯކް ޑިޒައިން އަދި ކޮންސަލްޓެންސީ ބީލަން ހުޅުވާލަފައެވެ. ހިޔާ ހައުސިންގ ޔުނިޓްތަކަށް ކައްކާ ގޭސް ގުޅާނީ، ގޭސް ވިއުގައަކުން ކަމަށް ހައުސިންގ ޑިވެލޮޕްމަންޓް ކޯޕަރޭޝަން އެޗްޑީސީން ވަނީ މީގެ ކުރިން ބުނެފައެވެ.

އެޗްޑީސީއާ ގުޅިގެން މިމަސައްކަތްކުރާ މޯލްޑިވްގޭސްއިން ބުނީ 25 ބުރީގެ ހިޔާ ފްލެޓުތަކަށް ގޭސް ހޮޅި އަޅާނެ ގޮތުގެ ކޮންސެޕްޓް ޑިޒައިން އަދި ކޮންސަލްޓެންސީ އަށް ހުޅުވާލާފައިވަނީ ރާއްޖެއިން ބޭރުގެ ފަރާތްތަކަށް ކަމަށެވެ.

ބައިނަލްއަޤްވާމީ ގަވައިދުތަަކާ އެއްގޮތަށް ހިޔާ ފްލެޓުތަކަށް އެލްޕީޖީ ގޭސް ޕައިޕް ނެޓްވޯކު އެޅުމަށް ބޭނުންވާ ފުރަތަމަ ސްޓޭޖުގެ މަސައްކަތް، ޑިޒައިން އެންޑް ކޮންސަލްޓެންސީ މަސައްކަތްކުރާ ފާމް ތަކަށް ހުޅުވާލާފައިވާކަމަށް މޯލްޑިވްސް ގޭސްއިން ބުނެއެވެ.

މި މަސައްކަތަށް ޝައުގުވެރިވާ ބޭރުގެ ކުންފުނިތަކުން މި މަހުގެ 19ގެ ކުރިން ބިޑް ލިޔެކިޔުން ހުށަހެޅުމަށް ވަނީ ހުޅުވާލައިފައެވެ.

މޯލްޑިވް ގޭސް އިން ބުނީ ހިޔާ ފްލެޓުތަކުގެ ޓައިޕް "އޭ" އަދި ޓައިޕް "ބީ" ޓަވަރުތަކަށް ގޭސް ހޮޅި އެޅުމަށް، ކޮންމެ ޓައިޕަކަށް ވަކިވަކިން ޑީޓެއިލްޑް ސްޕެސިފިކޭޝަން ހުށަހަޅަން ޖެހޭނެ ކަމަށެވެ. މިގޮތުން ޓައިޕް "އޭ"ގެ 10 ޓަވަރުގައި 3840 އެޕާޓްމެންޓު ހުރެއެވެ. އަދި ޓައިބް "ބީ"ގެ 6 ޓަވަރުގައި 2880 އެޕާޓްމެންޓު ހުރެއެވެ.

ހިޔާ ފްލެޓްތަކަށް ގޭސް ވިއުގައެއް މެދުވެރިކޮށް ގޭސް ފޯރުކޮށްދިނުމަށް ކުރާ މަސައްކަތަކީ، މިގޮތަށް ރާއްޖޭގައި ކުރާ ފުރަތަމަ މަސައްކަތެވެ. ގޭސް ފޯރުކޮށްދިނުމަށް ވިއުގައެއް އެޅުމަށް ނިންމާފައިވަނީ އުސް އިމާރާތްތަކަށްވާތީ، ގޭސް ފުޅި އަރުވާ ބޭލުމުގައި ދިމާވާނެ ތަކުލީފުތައް ކުޑަކުރުމަށެވެ.

ހިޔާ މަޝްރޫއުގައި މިހާރު ކުރިއަށްދަނީ ފްލެޓްތަކަށް މީހުން ބަދަލުވުމުގެ ކުރިން ކުރިއަށްގެންދަންޖެހޭ އެންމެ ފަހުގެ މަސައްކަތްތަކެވެ. ފައިނަލް ލިސްޓް އާއްމުކޮށް، ފްލެޓްތަކުގެ ގުރުއަތުލުމުގެ މަސައްކަތް ވަނީ ފަށާފައެވެ.

މީހުން ބަދަލުވުމުގެ ކުރިން ފްލެޓްތަކުގައި ހުންނަންޖެހޭ އާއްމު ޚިދުމަތްތައް ގާއިމުކުރުމުގެ މަސައްކަތް ހައުސިންގ ޑިވެލޮޕްމަންޓް ކޯޕަރޭޝަން އެޗްޑީސީންވަނީ ފަށާފައެވެ.

ހިޔާ ފްލެޓްތަކުގެ އެންމެ ތިރީ ފަންގިފިލާ ޚާއްސަކުރަނީ ވިޔަފާރިތަކާއި އާއްމު ޚިދުމަތްތަކަށެވެ. މިއީ ހިޔާ މަޝްރޫއިން އުނިކުރި 280 ޔުނިޓް ސަރަޙައްދުގައި ހަދާ ތަންތަނެވެ. މީގެތެރޭގައި ކުދި ފިހާރަތަކާއި، ސުޕަރ މާކެޓާއި، ބޯކޮށާ ތަންތަނާއި، ބުކްޝޮޕާއި، ބޭސްފިހާރައާއި، ކްލިނިކާއި، ކެފޭ ރެސްޓޯރަންޓްފަދަ ޚިދުމަތްތަކަށް ވަނީ ޖާގަ ކަނޑައަޅާފައެވެ.

ހިޔާއަކީ ހުޅުމާލޭ ދެވަނަ ފިޔަވަހީގައި ކުރިއަށްދާ ބޯހިޔާވަހިކަމުގެ އެންމެ ބޮޑު މަޝްރޫއެވެ.

މި 6720 ހައުސިންގ ޔުނިޓަށް 25000އަށްވުރެ ބޮޑު އާބާދީއެއް ބަދަލުވާނެކަމަށް ބެލެވެއެވެ.

މި އާބާދީއަށް ދަތިކަމެއްނެތި އާއްމު ޚިދުމަތްތައް ލިބޭވަރަށް އިންތިޒާމްތައް ހަމަޖެއްސުމުގެ މަސައްކަތް ހައުސިންގ ޑިވެލޮޕްމަންޓް ކޯޕަރޭޝަން އެޗްޑީސީން ދަނީ ކުރަމުންނެވެ.

މިގޮތުން، ސްޓެލްކޯއިން މިހާރު ވަނީ ހުޅުމާލެ ފުރަތަމަ ފިޔަވަހިން ދެ ވަނަ ފިޔަވައްސަށް ކަރަންޓް ވިއުގައި ގުޅާލުމުގެ މަސައްކަތްވެސް ނިންމާލާފައެވެ.

ދެ ވަނަ ފިޔަވަހީގައި ކަރަންޓު ނެޓްވޯރކް އެޅުމަށް ކުރީގެ ރައީސް ޔާމީންގެ ސަރުކާރުގައި ބޭރު ގައުމެއްގެ ކުންފުންޏަކާ ހަވާލުކޮށްފައިވަނީ ސްޓެލްކޯއިންވެސް މިކަމަށް ބިޑްކޮށްފައި ވަނިކޮށެވެ.

ސަރުކާރުން ވަނީ ހުޅުމާލެ ދެވަނަ ފިޔަވަހީގައި، ފުރަތަމަ ފިޔަވައްސެކޭ އެއްގޮތަށް 50 މެގަވޯޓްގެ އިންޖީނުގެއެއް އެޅުމަށް ރާވާފައެވެ.