އަތޮޅުތެރޭގައި ކުދި ހޮސްޕިޓަލްތަކެއް ގާއިމުކުރަނީ

އަތޮޅުތެރޭގައި 18 ކުދި ހޮސްޕިޓަލް ގާއިމުކުރުމުގެ މަސައްކަތް ކުރައްވާ ކަމަށް ހެލްތް މިނިސްޓަރ އަހްމަދު ނަސީމް ވިދާޅުވެއްޖެއެވެ.

އަންގާރަ ދުވަހު އޮތް ނޫސްވެރިންގެ ބައްދަލުވުމުގައި ހެލްތް މިނިސްޓަރ ވިދާޅުވީ، އަތޮޅުތެރޭގެ ހޮސްޕިޓަލްތައް ތަރައްގީކޮށް ވަސީލަތްތައް ގާއިމުކުރުމަށް ކުރިއަށްގެންދާ ޕްރޮޖެކްޓްގެ ދަށުން 30 އެނދުގެ 18 ހޮސްޕިޓަލްގެ ކުރެހުންތައް ނިމިފައިވާ ކަމަށާއި، ގިނަ ތަންތަން މިހާރު އޮތީ އިއުލާންކުރުމުގެ މަރުހަލާގައި ކަމަށެވެ. މި ހޮސްޕިޓަލްތަކަކީ ބީއެމްއެލް އާއި ކުވައިތު ފަންޑުން ޚަރަދުކުރުމަށް ހަމަޖެހިފައިވާ ހޮސްޕިޓަލްތަކެކެވެ.

ރާއްޖޭގެ ސިއްޙީ ނިޒާމު އިތުރަށް ހަރުދަނާކޮށް ބޭނުންވާ ވަސީލަތްތައް ގާއިމުކުރުމާއި، އިންސާނީ ވަސީލަތްތައް އިތުރުކުރުމުގެ މަސައްކަތްފަށާފައިވާ ކަން ސަރުކާރުންވަނީ ހާމަކޮށްފައެެވެ.

ޕެންޑަމިކާ ކުރިމަތިލިއިރު އަތޮޅުތެރޭގައި ހާލަތު ދަށް ނަމަވެސް މިހާރު ކުރެވުނު މަސައްކަތްތަކުން ހުރިހާ ހިސާބެއްގައި ވެސް ވަސީލަތްތައްވަނީ ގާއިމުކޮށްފައެވެ. ހުރިހާ އަތޮޅެއްގައި ފެސިލޓީ ގާއިމުކުރަން 1.7 ބިލިއަން ރުފިޔާ ދައުލަތުންވަނީ ޚަރަދުކޮށްފައެެވެ.

މީގެ އިތުރުން 5 ސަރަހައްދެއްގައި ޓާޝަރީ ހޮސްޕިޓަލްތައް ގާއިމުކުރުމަކީ ވެސް ސިއްޙީ ނިޒާމު އިތުރަށް ހަރުދަނާކުރުމުގެ ގޮތުން ކުރަމުން އަންނަ މަސައްކަތްތަކެކެވެ.