އާޒިމް އުފުލި ދިޔާތަކެތި ހާމަކުރާނީ ދެ މަސް ފަހުން
މީގެ ކުރިން އާޒިމް ވަނީ އަދީބް އަތުން ދިޔާ އެއްޗެއް ނެގި ކަމަށް ބުނެފައި
އެމްޑީޕީގެ ޕީޖީ ލީޑަރު އަލީ އާޒިމް
ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަދި މޯލްޑިވިއަން ޑިމޮކްރެޓިކް ޕާޓީގެ ޕާލިމެންޓްރީ ގްރޫޕްގެ ލީޑަރު އަލީ އާޒިމް، ކުރީގެ ނައިބު ރައީސް އަޙްމަދު އަދީބް އަތުން ނެގި ދިޔާތަކެއްޗަކީ ކޮބައިކަން ދެ މަސް ފަހުން މީޑިއާގައި ހާމަ ކުރައްވާނެ ކަމަށް ވިދާޅުވެއްޖެއެވެ.
ސީއެންއެމްގެ ޕްރޮގްރާމެއްގައި ވާހަކަ ދައްކަވަމުން އާޒިމް ވިދާޅުވީ އަދީބު އަތުން ނެންގެވި ދިޔާ އެއްޗަކީ ހަރާން އެއްޗެއް ނޫން ކަމަށާއި، އެއީ ހަލާލު އެއްޗެއް ކަމަށެވެ. އަދި އެއީ ކޯއްޗެއްކަން ދެ މަސް ފަހުން މީޑިއާގައި އާންމު ކުރައްވާނެ ކަމަށް އާޒިމް ވިދާޅުވިއެވެ.
މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) ޚިޔާނާތުގައި ފައިސާ ލިބުނު މީހުންގެ ނަންތައް ރައްޔިތުންގެ މަޖިލީހުން އާންމުކޮށްފައިވާއިރު އެ ލިސްޓުގައި އާޒިމްގެ ނަން ވެސް ހިމެނެއެވެ.
މީގެ ކުރިން އާޒިމް ވަނީ އަދީބު އަތުން ފައިސާ ނުނަންގަވާ ކަމަށާއި އަދީބު އަތުން ލިބިފައިވަނީ ދިޔާ އެއްޗެއްކަމަށް ވިދާޅުވެފައެވެ.
