"މޭ ހަޔެއް" ކޮމިޓީ އުފެއްދުމަށް ގައުމީ މަޖިލީހުގެ ޖަލްސާއެއް

މެއި 6ވަނަ ދުވަހު ރައްޔިތުންގެ މަޖިލީހުގެ ރައީސަށް އަމާޒުކޮށްދިން ޓެރަރިސްޓް ހަމަލާގެ ތަހުގީގު ހިނގަމުން އަންނަ ގޮތް ގާތުން ބަލައި، ފާރަވެރިވާނެ ޚާއްސަ ކޮމިޓީއެއް އުފެއްދުމަށް އެމްޑީޕީގެ ގައުމީ މަޖިލީހަށް ގަރާރެއް ހުށަހަޅަން ނިންމައިފިއެވެ.

"މޭ ހަޔެއް" ގެ ނަމުގައި އުފައްދާ މި ކޮމިޓީއާ މެދު ގޮތެއް ނިންމުމަށް ބާއްވާ ގައުމީ މަޖިލީހުގެ ޖަލްސާ ބުރާސްފަތި ދުވަހުގެރޭ ބޭއްވުމަށްވަނީ ނިންމާފައެވެ.

މައިގަނޑު 3 ކަމެއްގެ މައްޗަށް އެކުލަވާލާފައިވާ މި ގަރާރު ހުށަހަޅުއްވަނީ އުނގޫފާރު ދާއިރާގެ މެމްބަރު މުޙައްމަދު ވަޙީދު (ވައްޑެ) އެވެ. ގަރާރަށް ތާއީދު ކުރައްވަނީ މާލޭ ސިޓީ ކައުންސިލްގެ މެމްބަރު މުޙައްމަދު ސައިފް ފާތިޙެވެ.

ކޮމިޓީ އެކުލަވާލުމަށް ހަމަޖެހިފައިވަނީ، ރައީސުލްޖުމްހުރިއްރާ ކަނޑައަޅުއްވާ މެމްބަރަކާއި، ރައީސް ނަޝީދު ކަނޑައަޅުއްވާ މެމްބަރަކާއި، އެމްޑީޕީގެ ޗެއަރޕާސަން ޙަސަން ލަޠީފާއި، މުޙައްމަދު ޝިހާބު އަދި އަޙުމަދު މަޢުސޫމާއެކު 5 މެމްބަރުންގެ މައްޗަށެވެ.

ގަރާރުގައި ފުރަތަމަ ކަމެއްގެ ގޮތުގައި ބުނެފައިވަނީ، މެއި 6ަވަނަ ދުވަހުގެ ހާދިސާގެ ތަހުގީގު ހިނގާ ގޮތް ގާތުން ބެލުމެވެ. ދެވަނަ ކަމެއްގެ ގޮތުގައި ބުނެފައިވަނީ، ކުރިން ހިނގާދިޔަ ނުރައްކާތެރި ގޮތް ނޭގޭ މަރުތަކުގެ ހަގީގަތް މިއަދާ ހަަމައަށްވެސް ނޭގި އޮތުމަކީ ކަންބޮޑުވާ ކަމެއް ކަމަށާއި، ދައުލަތުގެ އެއް ވެރިޔާއަށް އަމާޒުކޮށް، ދިން މިހަމަލާގެ ހަގީގަތް ނުހޯދިއްޖެ ނަމަ އެމްޑީޕީ ދައުލަތެއްގެ ގޮތުގައި ދެކޭ ދިވެހި ދައުލަތުގެ ސިފަތައް ގެއްލިގެންދާނެ ކަމުގެ ކަންބޮޑުވުން އެބައޮތްކަން ހާމަކުރުމެވެ.

މި ކަންކަމަށް ބަލައި، ހުރިހާ ކަމެއް ގާތުން ބަލައި ފާރަވެރި ކޮމިޓީއެއް އެކުލަވާލަން ނިންމަނީ ކަމަށް ގަރާރުގައި ވެއެވެ.

ހަމަލާއަށް ފަންޑު ކުރީ ކޮންބައެއްކަން ތަހުގީގަށް މިހާތަނަށް ހޯދިފައިނުވާތީ އެކަމާ ކަންބޮޑުވާ ކަމަށާއި، ހަމަލާގެ ހަގީގަތް އޮޅޭގޮތަށް ބައެއް ފަރާތްތަކުން ވާހަކަ ދައްކަމުން އަންނާތީ ކަންބޮޑުވާ ކަމަށްވެސް ގަރާރުގައި ވަނީ ފާހަގަކޮށްފައެވެ.