ކޮވިޑްގައި އިތުރު މީހަކު ނިޔާވެ، މި ބަލީގައި ނިޔާވި މީހުންގެ އަދަދު 189ށް
ނިޔާވެފައިވަނީ އުމުރުން 77 އަހަރުގެ ދިވެހި ފިރިހެނެއް
ރާއްޖޭގައި މިބަލީގައި ނިޔާވާ މީހުންގެ ރޭޓް މަތިވެފައިވާއިރު، ކޭސްތައް ކޮންޓްރޯލް ކުރުމަށް މިހާރު ވަނީ ގިނަ ފިޔަވަޅުތަކެއް އަޅާފައި
ރާއްޖޭގައި ކޮވިޑް-19ށް ފަރުވާ ހޯދަމުންދިޔަ އިތުރު މީހަކު ނިޔާވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ އަންގާރަ ދުވަހުގެ ހެނދުނު 09:13 ހާއިރު ލ. ކޮވިޑް މެނޭޖްމަންޓް ފެސިލިޓީގައި ފަރުވާ ހޯދަމުން ދިޔަ އުމުރުން 77 އަހަރުގެ ދިވެހި ފިރިހެނެއް ނިޔާވެފައިވާ ކަމަށެވެ. މިއީ މިބަލީގައި ރާއްޖެއިން ނިޔާވި 189 ވަނަ މީހާއެވެ.
ހޯމަ ދުވަހު ވެސް ތިން މީހަކު މި ބަލީގައި ވަނީ ނިޔާވެފައެވެ. އެގޮތުން ހުޅުމާލެ މެޑިކަލް ފެސިލިޓީގައި ފަރުވާ ހޯދަމުންދިއަ އުމުރުން 75 އަހަރުގެ ދިވެހި ފިރިހެނެއް ނިޔާވެފައިވާއިރު މި ފިރިހެން މީހާ ނިޔާވެފައިވަނީ ހޯމަ ދުވަހުގެ ރޭ 8:40 ހާއިރު ކަމަށް އެޗްޕީއޭއިން ބުނެއެވެ.
ހޯމަ ދުވަހު އެންމެ ފުރަތަމަ ނިޔާވެފައިވަނީ އުމުރުން 86 އަހަރުގެ ފިރިހެނެކެވެ. އެއީ ހުޅުމާލެ މެޑިކަލް ފެސިލިޓީގައި ފަރުވާދެމުން ދިޔަ މީހެކެވެ. އެމީހާ ނިޔާވެފައިވަނީ ހޯމަވިލޭރޭ މެންދަމު 12:18ގައެވެ. އަދި ދެވަނައަށް ނިޔާވެފައިވަނީ ދަރުމަވަންތަ ހޮސްޕިޓަލްގެ 11 ވަނަ ފަންގިފިލާގައި ފަރުވާ ހޯދަމުންދިޔަ އުމުރުން 100 އަހަރުގެ ދިވެހި ފިރިހެނެކެވެ. މިމީހާ ނިޔާވީ ހޯމަ ދުވަހުގެ ހެނދުނު 9:33 ހާއިރުއެވެ.
ރާއްޖޭގައި މިހާތަނަށް މިބަލީގައި އެއް ދުވަހެއްގެ ތެރޭގައި، އެންމެ ގިނަ މީހުން ނިޔާވެފައިވަނީ، މިދިޔަ މެއި މަހުގެ 24 ވަނަ ދުވަހު އެވެ. އެ ދުވަހު 13 މީހަކު ނިޔާވިއެވެ. އަދި މެއި މަހަކީ މިހާތަނަށް އެންމެ ގިނަ މީހުން މިބަލީގައި ނިޔާވި މަސް ވެސް މެއެވެ. ހަމައެކަނި މެއި މަހު ކޮވިޑް ބަލީގައި 88 މީހުން ވަނީ ނިޔާވެފައެވެ.
ރާއްޖޭގައި މިބަލީގައި ނިޔާވާ މީހުންގެ ރޭޓް މަތިވެފައިވާއިރު، ކޭސްތައް ކޮންޓްރޯލް ކުރުމަށް މިހާރު ވަނީ ގިނަ ފިޔަވަޅުތަކެއް އަޅާފައެވެ.
