ސްރީލަންކާގެ ބޮޑުވަޒީރު މަހިންދަ ރާޖްޕަކްސަގެ މަރުހަބާ ޝާހިދަށް
8 ޖޫން 2021 | އަންގާރަ 07:27މިނިސްޓަރު ޝާހިދަށް މަރުހަބާ ވިދާޅުވެ ގިނަ ބަޔަކު ދަނީ ޝުއޫރު ފާޅުކުރަމުން
ފޮރިން މިނިސްޓަރ އަބްދުﷲ ޝާހިދު
އދ. ގެ 76 ވަނަ މަޖިލީހުގެ ރައީސްކަމުގެ ގޮނޑި ފޮރިން މިނިސްޓަރު އަބްދުﷲ ޝާހިދު ކާމިޔާބު ކުރެއްވުމާ ގުޅިގެން ސްރީލަންކާގެ ބޮޑުވަޒީރު މަހިންދަ ރާޖްޕަކްސަ މިނިސްޓަރ ޝާހިދަށް މަރުހަބާ ވިދާޅުވެއްޖެއެވެ.
މިނިސްޓަރ ޝާހިދަށް މަރުހަބާ ވިދާޅުވެ ލަންކާގެ ބޮޑުވަޒީރު ކުރެއްވި ޓްވީޓެއްގައި ވިދާޅުވެފައިވަނީ އދ. ގެ 76 ވަނަ މަޖިލީހުގެ ރައީސްކަމުގެ މަގާމު ކާމިޔާބުކުރެއްވުމާ ގުޅިގެން މަރުހަބާ ވިދާޅުވާ ކަމަށާއި މަގާމުގެ މަސްއޫލިއްޔަތު އަދާކޮށް މި ދައުރުގައި ގިނަ ކާމިޔާބީތަކެއް ހޯއްދަވާނެ ކަމަށް އުއްމީދު ކުރައްވާ ކަމަށެވެ.
އދ. ގެ 76 ވަނަ މަޖިލީހުގެ ރައީސްކަމުގެ ގޮނޑި ފޮރިން މިނިސްޓަރު އަބްދުﷲ ޝާހިދު ކާމިޔާބު ކުރެއްވުމާ ގުޅިގެން އދ. ގެ އާންމު މަޖިލީހުގެ 75 ވަނަ ސެޝަންގެ ރައީސް، ވޮލްކަން ބޮޒްކިރް ވެސް ވަނީ މަރުހަބާ ވިދާޅުވެފައެވެ.
މިނިސްޓަރު ޝާހިދަށް ތައުރީފްކުރައްވައި ވޮލްކަން ބޮޒްކިރް ކުރެއްވި ޓުވީޓްގައި ވަނީ އދ. ގެ 76 ވަނަ މަޖިލީހުގެ ރައީސްކަމުގެ މަގާމުގައި މަލްޓިލޭޓަރަލް ޑިޕްލޮމެސީގެ ބޭނުން އަދި ފޮރިން މިނިސްޓަރަކަށް ހުރެ ލިބުނު ތަޖުރިބާގެ ބޭނުން ވަރަށް ފުރިހަމައަށް އަދާ ކުރާނެކަމުގެ ޔަގީންކަން އެބަ އޮތް ކަމަށް ވިދާޅުވެފައެވެ. މިނިސްޓަރު ޝާހިދަށް މަރުހަބާ ދަންނަވާފައިވާއިރު، ކުރައްވާފައިވާ މަސައްކަތްތައް ފާހަގަކުރައްވާފައިވެއެވެ.
ރާއްޖޭގެ ފޮރިން މިނިސްޓަރ އަބްދުﷲ ޝާހިދާއި، އަފްޣާނިސްތާނުގެ ކުރީގެ ފޮރިން މިނިސްޓަރ ޑރ. ޒަލްމާއި ރަސޫލު ވާދަ ކުރެއްވި މި އިންތިޚާބު ޝާހިދު ކާމިޔާބު ކުރައްވާފައިވަނީ 143 ވޯޓުގެ އަޣުލަބިއްޔަތުންނެވެ.
