ޔޫޑަބްލިއުސީ އިން ދިވެހި 3 ދަރިވަރަކަށް ބޭރުގެ ސްކޮލަރޝިޕް އެއް
މި ސްކޮލަރޝިޕްގެ ދަށުން ދަރިވަރުން ފުރިހަމަކުރާނީ އިންޓަނޭޝަނަލް ބެކަލޯރިއޭޓް ޑިޕްލޮމާ
ޔޫޑަބްލިއުސީ މޯލްޑިވްސް
ޔުނައިޓެޑް ވޯލްޑް ކޮލެޖް މޯލްޑިވްސް (ޔޫޑަބްލިއުސީ މޯލްޑިވްސް) އިން ތިން ދިވެހި ދަރިވަރަކަށް އިންޑިއާ، ހޮންގކޮންގ އަދި ކެނެޑާގައި މަތީ ތަޢުލީމު ހާސިލުކުރުމުގެ ފުރުޞަތު ހޯދައިދީފި އެވެ.
މި ފުރުޞަތު ލިބިފައިވަނީ ނ. ކުޑަފަރީ ސްކޫލްގެ ދަރިވަރު އިޒް ޔާލާ ބިންތު އަލީ، ބްރައިޓްވޭ އިންޓަނޭޝަނަލް ސްކޫލްގެ ދަރިވަރު ޔަޒާން އަބްދުﷲ ޔަޒާން، އަދި ތާޖުއްދީން ސްކޫލްގެ ދަރިވަރު ހައްވާ އިޝާއަށެވެ.
މި ދަރިވަރުން ކިޔަވަން ދާނީ އިންޑިއާގެ މަހިންދްރާ ޔުނައިޓެޑް ވޯލްޑް ކޮލެޖް، ހޮންގކޮންގްގެ ލީޕޯޗުން ޔުނައިޓެޑް ވޯލްޑް ކޮލެޖް، އަދި ކެނެޑާގެ ޕިއާސަން ޔުނައިޓެޑް ވޯލްޑް ކޮލެޖަށެވެ. މި ސްކޮލަރޝިޕްގެ ދަށުން ދަރިވަރުން ފުރިހަމަކުރާނީ އިންޓަނޭޝަނަލް ބެކަލޯރިއޭޓް (އައި.ބީ) ޑިޕްލޮމާއެވެ.
ޔޫޑަބްލިއުސީ މޯލްޑިވްސްގެ އެގްޒެކެޓިވް ކޮމިޓީ ޗެއާ، ޒަހީނާ ރަޝީދު ވިދާޅުވީ، "މިއީ މި ދަރިވަރުންގެ މުޅި ހަޔާތް ބަދަލުވެގެންދާނެ ފުރުޞަތެއް. މި ދަރިވަރުން ތަޢުލީމު ހާސިލުކޮށް ނިމިގެން އެނބުރި އައިސް ރާއްޖެއަށް ޚިދުމަތްކުރާނެކަމުގެ އުންމީދު އެބައޮތް" ކަމަށެވެ.
ޔޫޑަބްލިއުސީ ސްކޮލަރޝިޕްއަކީ ގްރޭޑް 10 ނިންމާ، ނުވަތަ އުމުރުން 15-17 އަހަރުގެ ދަރިވަރުންނަށް ޚާއްޞަކޮށްގެން ދެވޭ ފުރުޞަތެކެވެ. މިހާތަނަށް ޖުމްލަ 67 ދިވެހި ދަރިވަރުން ވަނީ ޔޫޑަބްލިއުސީގެ ސްކޮލަރޝިޕްގައި ތަޢުލީމު ހާސިލުކޮށްފަ އެވެ.
ޔޫޑަބްލިއުސީ މޯލްޑިވްސްއަކީ 2001 ވަނަ އަހަރު ރާއްޖޭގައި ރަޖިސްޓްރީކޮށްގެން ހިންގާ މަދަނީ ޖަމްޢިއްޔާއެކެވެ. މި ޖަމްޢިއްޔާގެ މަޤްޞަދަކީ ޒުވާނުންގެ މެދުގައި އުންމީދާއި ހެޔޮ ބަދަލު ގެނައުމަށް މަގުފަހިކޮށް، މުސްތަޤްބަލުގެ ލީޑަރުން އުފެއްދުމެވެ.
