މި ކާމިޔާބީއަކީ ރައީސް ޞާލިޙުގެ ޚާރިޖީ ސިޔާސަތުގެ ނަތީޖާ- މިނިސްޓަރ
7 ޖޫން 2021 | ހޯމަ 17:59މި ދަނޑިވަޅަކީ މުޅި ދުނިޔެއަށްވެސް ދަތި ދަނޑިވަޅެއްކަން އެމަނިކުފާނު ފާހަގަ ކުރެއްވި
ފޮރިން މިނިސްޓަރ ޢަބްދުﷲ ޝާހިދު ޔޫއެންގެ ޖެނެރަލް އެސެމްބްލީގައި ވާހަކަފުޅު ދައްކަވަނީ
އދ. ގެ އާންމު މަޖިލީހުގެ ރައީސް ކަމުގެ އިންތިޚާބުގައި ރާއްޖެއަށް ލިބުނު ކާމިޔާބީއަކީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ ހަރުދަނާ ޚާރިޖީ ސިޔާސަތުގެ ނަތީޖާކަމަށް ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.
އިންތިޚާބު ކާމިޔާބު ކުރެއްވުމަށްފަހު ރާއްޖޭގެ މީޑިއާއަކަށް ދެއްވި ފުރަތަމަ އިންޓަރވިއުގައި މިނިސްޓަރ ޝާހިދު ވިދާޅުވީ، މި ކާމިޔާބީއަކީ ރާއްޖޭގެ ސަރުކާރުގެ ހަރުދަނާ ޚާރިޖީ ސިޔާސަތުގެ ނަތީޖާ ކަމަށެވެ.
މި ދަނޑިވަޅަކީ މުޅި ދުނިޔެއަށްވެސް ދަތި ދަނޑިވަޅެއްކަން ފާހަގަ ކުރައްވައި މިނިސްޓަރ ވިދާޅުވީ، މި ލިބުނު ކާމިޔާބީއަކީ އުއްމީދުން ފުރިގެންވާ ކާމިޔާބީއަކަށް ވެގެންދާނެ ކަމަށެވެ. އަދި ކަންކަން ހާސިލު ކުރުމަށް ސިޔާސަތުތައްވެސް ބައްޓަން ކުރައްވާނެކަން މިނިސްޓަރ ފާހަގަ ކުރެއްވިއެވެ.
އަދި މިއީ އެމަނިކުފާނުގެ ހަޔާތުގައި އަދާ ކުރައްވަން ޖެހިވަޑައިގެންނެވި އެންމެ ބޮޑު އެއް ޒިންމާގެ ގޮތުގައިވެސް ވަނީ ސިފަ ކުރައްވާފައެވެ.
މިނިސްޓަރ ވިދާޅުވީ، ރާއްޖެ ފަދަ ކުޑަ އަދި ވަސީލަތް މަދު ގައުމަކަށް މި ލިބުނު ކާމިޔާބީއާއެކު ދުނިޔޭގައި ރާއްޖޭގެ ނަން ފަވާލަން ރަނުގެ ފުރުސަތެއް ލިބިގެންގޮސްފައިވާ ކަމަށެވެ.
އިންތިޚާބަށް ތައްޔާރުވުމަށް ޓަކައި މިނިސްޓަރ ވަނީ ގިނަ ގައުމުތަކެއްގެ ޚާރިޖީ ވަޒީރުންނާ ބައްދަލު ކުރައްވައި، ގައުމުތަކުން ފާހަގަކުރާ ކަންކަންވެސް އޮޅުންފިލުއްވާފައެވެ. މިނިސްޓަރ ވިދާޅުވީ، ހުރިހާ ގައުމުތަކުންވެސް ކޮވިޑުގެ އާލަމީ ވަބާގެ ކަންބޮޑުވުން ފާޅު ކުރައްވާފައިވާ ކަމަށެވެ.
ދިވެހި ރައްޔިތުންނަށް ދެއްވި މެސެޖުގައި ޝާހިދު ވިދާޅުވީ، ރާއްޖެއަކީ މުޅި ދުނިޔޭގެ ގިނަ ގައުމުތަކުގެ ރިޔާސަތު ހަވާލުވެފައި އޮތުމުގެ ޝަރަފު ލިބިގެންވާ ގައުމު ކަމަށާއި، މިއީ މި ޖީލަށްވެސް ލިބިގެންދިޔަ ކާމިޔާބީއެެއް ކަމަށެވެ. އަދި ރާއްޖޭގެ މިނިވަންކަމާއި ސިޔާދަތު ދެމި އޮންނާނެކަމުގެ ޔަގީންކަން އެމަނިކުފާނު ވަނީ ދެއްވާފައެވެ.
އިންތިޚާބު ކާމިޔާބު ކުރައްވައި ދެއްކެވި ވާހަކަފުޅުގައި މިނިސްޓަރ ޝާހިދު ވަނީ ފާއިތުވި އަހަރު ތިމާވެށީގެ ގޮތުންނާއި، އިންސާނީ ކާރިސާތަކުގެ ގޮތުންނާއި، އިޤްތިސާދީ ގޮތުން ކުރިމަތިވި ބޮޑެތި ގޮންޖެހުންތަކަށް އަލިއަޅުވާލައްވާފައެވެ.
މީގެ އިތުރުން އެމަނިކުފާނު ވަނީ ކޮވިޑު-19ގެ ބަލިމަޑުކަމުން ސަލާމަތްވުމަށާއި، ވެކްސިނޭޝަން ޕްރޮގްރާމްތައް ފުޅާކުރުމަށް ކުރައްވާ މަސައްކަތްތަކަށް ޚާއްސަ ސަމާލުކަމެއް ދެއްވާނެ ކަމަށް ވިދާޅުވެފައެވެ. އަދި 76 ވަނަ މަޖިލީހަކީ ގިނަ ކާމިޔާބީތަކެއް ހޯދޭނެ މަޖިލީހަކަށް ހެއްދެވުމަށް މަސައްކަތް ކުރައްވާނެ ކަމުގެ ޔަގީންކަން ވެސް ދެއްވާފައެވެ.
އަދި މިންތީގެ ހަމަހަމަކަމާއި، އިންސާނީ ހައްގުތައް ރައްކާތެރި ކުރުމަށް ކުރައްވާ މަސައްކަތްތަކަށް ޚާއްސަ ސަމާލުކަމެއް ދެއްވާނެ ކަމަށެވެ. އަދި ޒިންމާދާރު، ޒިންމާ ކުރުވޭ މަޖިލީހަކަށް 76 ވަނަ މަޖިލިސް ހައްދަވާނެ ކަމުގެ ޔަގީންކަން ވެސް އެމަނިކުފާނު ދެއްވިއެވެ.
އދ. ގެ 76 ވަނަ މަޖިލީހުގެ ރައީސް ކަމުގެ ގޮނޑިއަށް ވާދަ ކުރެއްވީ ރާއްޖޭގެ ފޮރިން މިނިސްޓަރ ޢަބްދުﷲ ޝާހިދާއި، އަފްޣާނިސްތާނުގެ ކުރީގެ ފޮރިން މިނިސްޓަރ ޑރ.ޒަލްމާއި ރަސޫލެވެ. ޝާހިދު މި އިންތިޚާބު ކާމިޔާބު ކުރައްވާފައިވަނީ 143 ވޯޓު ކާމިޔާބު ކުރައްވައިގެންނެވެ.
އދ. ގެ އާންމު މަޖިލީހުގައި މެންބަރު 193 ގައުމުން ބައިވެރިވި މި ވޯޓުގައި ރައީސަކު ހޮވާފައި މިވަނީ ސިއްރު ވޯޓަކުންނެވެ.
