އދ. ގެ އާންމު މަޖިލީހުގެ ރައީސް ކަމުގެ އިންތިޚާބު ރާއްޖޭގެ ޚާރިޖީ ވަޒީރު ޢަބްދުﷲ ޝާހިދު ކާމިޔާބު ކުރައްވައި، އެސެމްބްލީގައި ދިވެހިންގެ މާދަރީ ބަހުން ވާހަކަ ދެއްކެވުމުން ދިވެހި ބަހުގެ އެކަޑަމީން މިނިސްޓަރ ޝާހިދަށް ތައުރީފު ކުރައްވައިފިއެވެ.

ރާއްޖޭގެ ފޮރިން މިނިސްޓަރ ޢަބްދުﷲ ޝާހިދާއި، އަފްޣާނިސްތާނުގެ ކުރީގެ ފޮރިން މިނިސްޓަރ ޑރ.ޒަލްމާއި ރަސޫލު ވާދަ ކުރެއްވި މި އިންތިޚާބު ޝާހިދު ކާމިޔާބު ކުރައްވާފައިވަނީ 143 ވޯޓުގެ އަޣުލަބިއްޔަތުންނެވެ.

އިންތިޚާބު ކާމިޔާބު ކުރެއްވުމަށްފަހު އދ ގެ ޖެނެރަލް އެސެމްބްލީގައި ދެއްވި ފުރަތަަމަ ތަޤުރީރުގައި މިނިސްޓަރ ވަނީ މާދަރީ ބަހުން ވާހަކަފުޅު ދައްކަވާފައެވެ. އެގޮތުން މިއީ ރާއްޖެފަދަ ގައުމަކަށް ލިބިގެން ދިޔަ ބޮޑު ޝަރަފެއް ކަމުގައި އެމަނިކުފާނު ވަނީ ސިފަކުރައްވާފައެވެ.

މިނިސްޓަރ ޝާހިދު ވަނީ ފާއިތުވި އަހަރު ތިމާވެށީގެ ގޮތުންނާއި، އިންސާނީ ކާރިސާތަކުގެ ގޮތުންނާއި، އިޤްތިޞާދީ ގޮތުން ކުރިމަތިވި ބޮޑެތި ގޮންޖެހުންތަކަށް އަލިއަޅުއްވާލައްވާފައެވެ.

މީގެ އިތުރުން އެމަނިކުފާނު ވަނީ ކޮވިޑު-19ގެ ބަލިމަޑުކަމުން ސަލާމަތްވުމަށާއި، ވެކްސިނޭޝަން ޕްރޮގްރާމްތައް ފުޅާކުރުމަށް ކުރައްވާ މަސައްކަތްތަކަށް ޚާއްސަ ސަމާލުކަމެއް ދެއްވާނެ ކަމަށް ވިދާޅުވެފައެވެ. އަދި 76 ވަނަ މަޖިލީހަކީ ގިނަ ކާމިޔާބީތަކެއް ހޯދޭނެ މަޖިލީހަކަށް ހެއްދެވުމަށް މަސައްކަތް ކުރައްވާނެ ކަމުގެ ޔަގީންކަން ވެސް ދެއްވާފައެވެ.

އދ.ގެ 76ވަނަ އާންމު މަޖިލީހުގެ ރައީސްކަމުގެ މަގާމަށް އެމަނިކުފާނު ހޮވިވަޑައިގެންނެވުމުގެ އުފަލުގައި ތަހުނިޔާ ދަންނަވައި ދިވެހި ބަހުގެ އެކަޑަމީން ބުނީ، އެ މަޖިލީހުގައި ދިވެހިބަހުން އެމަނިކުފާނު ވާހަކަފުޅު ދައްކަވައި ދެއްކެވި ނަމޫނާއަށް ޓަކައި ތައުރީފުކޮށް ޝުކުރު އަދާކުރާ ކަމަށެވެ.

އދ ގެ އާންމު މަޖިލީހުގައި ވާހަކަ ދައްކަވަމުން މިނިސްޓަރ ވަނީ މިންތީގެ ހަމަހަމަކަމާއި، އިންސާނީ ޙައްޤުތައް ރައްކާތެރި ކުރުމަށް ކުރައްވާ މަސައްކަތްތަކަށް ޚާއްސަ ސަމާލުކަމެއް ދެއްވާނެ ކަމަށް ވިދާޅުވެފައެވެ. އަދި ޒިންމާދާރު، ޒިންމާ ކުރުވޭ މަޖިލީހަކަށް 76 ވަނަ މަޖިލިސް ހައްދަވާނެ ކަމުގެ ޔަގީންކަން މިނިސްޓަރ ވަނީ ދެއްވާފައެވެ.