މައިކޮލެޖްގެ ފަރާތުން ސިއްހީ ޚިދުމަތްތެރިންނަށް ޚާއްސަ ކެއާ ޕެކޭޖްތަކެއް ހަދިޔާ ކޮށްފިއެވެ.

މައިކޮލެޖްގެ ފަރާތުން މިކަމަށްޓަކައި ބޭއްވި ޚާއްސަ ރަސްމިއްޔާތު ޝަރަފްވެރި ކޮށްދެއްވީ މިނިސްޓަރ އޮފް ސްޓޭޓް ފޯ ހެލްތު އަހްމަދު އާދިލްއެވެ. މި ރަސްމިއްޔާތުގައި މިނިސްޓަރ ބައިވެރިވެ ވަޑައިގެންނެވީ ޒޫމް މެދުވެރިކޮށެވެ. މި ރަސްމިއްޔާތުގައި މިއާންޒް އިންޓަނޭޝަނަލް ގްރޫޕްގެ ސީއީއޯ އަހްމަދު މުއްތަކީ, މައި ކޮލެޖްގެ ސީއީއޯ މުހައްމަދު ހަލީމް, އަދި މައިކޮލެޖްގެ ރެކްޓަރ ލަމްޔާ އަބްދުލްހާދީ ބައިވެރިވެ ވަޑައިގެންނެވިއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ސްޓޭޓް މިނިސްޓަރ ވިދާޅުވީ، މި ކަމަކީ ސިއްހީ ދާއިރާގެ ޚިދުމަތްތެރިންގެ މަސައްކަތަށް އިތުރު ހިތްވަރެއް ލިބިގެންދިޔަ ކަމެއް ކަމަށެވެ. އަދި އެ ޚިދުމަތްތެރިން ކުރާ މަސައްކަތަށް ހިތްވަރު ދިނުމުގެ ގޮތުން މިއާންޒް ގްރޫޕުގެ ފަރާތުން ހަދިޔާކުރި ތަކެއްޗަށް ޓަކައި ހެލްތު މިނިސްޓްރީއާއި މިނިސްޓްރީގެ ދަށުން މަސައްކަތް ކުރާ އެންމެހާ ފަރާތްތަކުގެ ނަމުގައި ޝުކުރު އަދާކުރެއްވިއެވެ.

'މިއާންޒް ކެއަރސް' ގެ މި ޝިއާރުގެ ދަށުން, މައިކޮލެޖުން ރާއްޖޭގެ އެކި ކަންކޮޅުތަކުގައި ހުރި ހުރިހާ ކޮވިޑް ފެސިލިޓީތަކަށް ކެއާޕެކޭޖް ރައްދުކޮށްދިނުމަށް ހަމަޖެހިފައިވެއެވެ. މި ޕެކޭޖްތަކުގައި ހުންނާނީ ކާބޯތަކެތި ކަމަށް މައިކޮލެޖް އިން މައުލޫމާތު ދެއެވެ.

މައިކޮލެޖްގެ ރެކްޓަރ ލަމްޔާ އަބްދުލްހާދީ ވިދާޅުވީ, ހަދިޔާ ޕެކޭޖްތަކުގައި ހުންނާނީ ސިއްހީ ޚިދުމަތްތެރިން މަސައްކަތުގައި ހޭދަކުރާ ވަގުތުގައި ވަރުބަލި ފިލުވާލުމަށް ނަގާ ހުސްވަގުތުގައި ބޭނުން ކުރެވޭ ކަހަލަ ކާބޯތަކެތިކަމަށެވެ. މީގެ މަގުސަދަކީ ޚިދުމަތްތެރީންގެ އިހުސާސްތައް ދެނެގަންނަކަން އަންގައިދިނުމާއި, އެ މަސައްކަތުގެ ބުރަ އިހުސާސް ކުރެވޭކަން ހާމަކޮށްދިނުން ކަމަށް ލަމްޔާ ވިދާޅުވިއެވެ.

މުޖުތަމައުއަށް އަހުލުވެރި ޒިންމާދާރު ދަރިވަރުންތަކެއް ބިނާކުރުމުގެ ގޮތުން މައިކޮލެޖުން ގެންދަނީ މިފަދަ އިޖުތިމާއީ އެތައް ހަރަކާތެއް ހިންގަމުންނެވެ. އެގޮތުން މިދިޔަ އަހަރުވެސް އެ ކޮލެޖުން ލޭ ހަދިޔާކުރުމުގެ ޕްރޮގްރާމެއް ބާއްވާފައިވެއެވެ. ހަމަ އެހެންމެ ކޮވިޑް19އިން ރައްކާތެރިވުމަށް އާންމުންގެ ހޭލުންތެރިކަން އިތުރު ކުރުމަށް ސިލްސިލާ ވީޑިއޯ ކްލިޕްތަކެއް ގެނެސްދޭން މިހާރު ފަށާފައި ވާކަން ފާހަގަކޮށްލެވެއެވެ.