"ކަންކަން ނިންމާއިރު ހޭވެސް އަހާނުލާ، މަޖިލީހަކީ ކޮބައިކަން އޮޅިއްޖެ"
5 ޖޫން 2021 | ހޮނިހިރު 14:23ޑިފެންސް މިނިސްޓްރީގެ ނާއިބު ހަސަން ޒަމީލުގެ މައްޗަށް ދައުވާކޮށްދޭން އެދިފައިވޭ
ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީގެ ބައްދަލުވުމުގައި ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހިމް ޝަރީފް (މަވޯޓާ ޝަރީފް) ބައިވެރިވެވަޑައިގަންނަވަނީ
މަޖިލީހުން ބޮޑެތި ކަންކަން ނިންމާއިރު މެމްބަރުންގެ ލަފާ ނުހޯދާތީ ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހިމް ޝަރީފް (މަވޯޓާ ޝަރީފް) އެކަމުގެ ކަންބޮޑުވުން ފާޅުކުރައްވައިފިއެވެ.
މިހާރު ރައްޔިތުންގެ މަޖިލީހަކީ ކޮބައިކަން އޮޅިއްޖެކަމަށް ވިދާޅުވެ ހޮނިހިރު ދުވަހު ޝަރީފް ކުރެއްވި ޓްވީޓެއްގައި ވިދާޅުވީ، މެމްބަރުން ގާތުގައި އެއްވެސް ވަރަކަށް އަހާލުމެއް ނެތި މަޖިލީހުން ކަންކަން ނިންމަމުންދާ ވާހަކަ ނޫސްތަކުން ފެންނަމުންދާ ކަމަށެވެ. އެކަމާ ގުޅޭގޮތުން ރާއްޖެއެމްވީން ސުވާލުކޮށްލުމުން ޝަރީފް ވިދާޅުވީ، ރައްޔިތުންގެ މަޖިލީހުގެ އިމްތިޔާޒަށް އަރައިގެންފައިވާ ކަމަށް ބުނެ ޑިފެންސް މިނިސްޓްރީގެ ނާއިބު ހަސަން ޒަމީލުގެ މައްޗަށް ދައުވާކޮށްދޭން މަޖިލީހުން ޕްރޮސިކިއުޓާ ޖެނަރަލްގެ އޮފީހުން އެދިފައިވާ ޚަބަރު ނޫސްތަކުން ފެނިފައިވާ ކަމަށެވެ.
ޝަރީފް ވިދާޅުވީ، މަޖިލީހުގެ އިމްތިޔާޒަށް އަރައިގެންފައިވާކަމަށް ބުނެ ދައުވާކޮށްދިނުން އެދި ފޮނުވާއިރު މަޖިލިސް މެމްބަރުންގެ ލަފާވެސް އެކަމުގައި ހޯދަންވާނެ ކަމަށެވެ. އެގޮތުން މަޖިލީހުގެ ނަމުގައި އެފަދަ ކަމެއް ނިންމަންވާނީ މަޖިލީހުގެ ތަޅުމުގައި މެމްބަރުންގެ އަޢުލަބިއްޔަތުންކަން ޝަރީފް ފާހަގަ ކުރެއްވިއެވެ. އަދި ކަންކަން މިހާރު ހިނގަމުންދާގޮތަށް އަލިއަޅުވާލައްވައި ޝަރީފް ވަނީ މިހާރު މަޖިލީހަކީ ކޮބައިކަން އޮޅިވަޑައިގެންފައިވާ ކަމަށް ވިދާޅުވެފައެވެ.
މަޖިލީހުގެ އިމްތިޔާޒާ ބެހޭ ގާނޫނުގެ ދަށުން ޒަމީލުގެ މައްޗަށް ދައުވާކޮށްދިނުން އެދި ޕީޖީ އޮފީހަށް ފޮނުވާފައިވާކަން މަޖިލީހުގެ ސްޕޯކްސްޕަރސަން ވަނީ ރާއްޖެއެމްވީއަށް ކަށަވަރު ކޮށްދެއްވާފައެވެ. އެގޮތުން މަޖިލީހުގެ ކޮމިޓީއަށް ވަކިވަކި ސިފައިން ހާޒިރު ނުކުރެވޭނެ ކަމަށް ބުނެ ޑިފެންސް މިނިސްޓްރީން މަޖިލީހަށް ފޮނުވާފައިވާ ސިޓީގައި ސޮއި ކުރައްވާފައިވަނީ ޒަމީލުކަމަށް އޮންލައިން ނޫސް އަދަދުގައި ރިޕޯޓު ކޮށްފައިވެއެވެ.
ރައްޔިތުންގެ މަޖިލީހަށް ވެސް އަދި އެހެން އިދާރާތަކަށް ވެސް ވަކި ވަކި ސިފައިން ހާޒިރުކޮށް ޖަވާބުދާރީ ކުރުވުމަކީ ޗެއިން އޮފް ކޮމާންޑާ ޚިލާފު ކަމެއް ކަމަށާއި ޖަވާބުދާރީ ވާނީ މުއައްސަސާގެ ފަރާތުން ކަމަށް މޯލްޑިވްސް ނެޝެނަލް ޑިފެންސް ފޯސް (އެމްއެންޑީއެފް) އިން ވަނީ ބުނެފައެވެ.
ރައީސް މުހައްމަދު ނަޝީދަށް ދިން ޓެރަރިސްޓް ހަމަލާއާ ގުޅިގެން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241) ކޮމިޓީން ކުރިއަށްގެންދާ އިންކުއަރީއާ ގުޅޭގޮތުން ނެރުނު ބަޔާނުގައި އެމްއެންޑީއެފުން ބުނީ އެ އިންކުއަރީ އަށް އެމްއެންޑީއެފް އިން ފުރިހަމަ އެއްބާރުލުން ދޭނެކަމަށެވެ. މި އިންކުއަރީ އަށް ވަކި ވަކި ސިފައިންނަށާއި ފުލުހުންނަށް ވެސް މައުލޫމާތު ދެވޭ ގޮތަށް ހުޅުވާލާފައިވާއިރު، އެމްއެންޑީއެފުން ބުނީ ކޮމިޓީގެ އިންކުއަރީއަށް ވަކި ވަކި ފަރުދުންގެ ފަރާތުން މައުލޫމާތު ހޯދޭ ގޮތަށް ގާނޫނީ ހައިސިއްޔަތު އޮތް ނަމަވެސް އެކަމަކީ އެމްއެންޑީއެފްގެ ޗެއިން އޮފް ކޮމާންޑާ މުޅިން ޚިލާފު ކަމެއް ކަމަށެވެ. އަދި އޭގެ ސަބަބުން ސިފައިންގެ ގާނޫނީ ޒިންމާ އަދާކުރުމަށް ބޮޑެތި ގޮންޖެހުންތަކެއް ކުރިމަތިވާނެ ކަމަށް ވެސް ބުނެފައިވެއެވެ.
