ގޯލްޑަން ޖުބްލީ ސްޓިއަރިން ކޮމިޓީ އެކުލަވާލައިފި
ކޮމިޓީ އެކުލަވާލާފައި ވަނީ ޓޫރިޒަމް އިންޑަސްޓްރީގެ ޖަމްއިއްޔާތަކުގެ މަޝްވަރާއާއި އެކު
ގޯލްޑަން ޖުބްލީ ސްޓިއަރިންގް ކޮމިޓީ
ރާއްޖޭގެ ފަތުުރުވެރިކަމަށް 50 އަހަރު ފުރުން ކުލަގަދަކޮށް ފާހަގަ ކުރުމަށްޓަކައި ޓޫރިޒަމް މިނިސްޓްރީއާއި ޓޫރިޒަމް އިންޑަސްޓްރީ ގުޅިގެން ހިންގާ ހަރަކާތްތައް ވިލަރެސްކޮށް ކުރިއަށް ގެންދިއުމަށްޓަކައި "ޓޫރިޒަމް ގޯލްޑަންޖުބްލީ ސްޓިއަރިންގ ކޮމިޓީ" ޓޫރިޒަމް މިނިސްޓްރީން އެކުލަވާލައިފިއެވެ.
ޓޫރިޒަމް މިނިސްޓްރީން ބުނީ މިކޮމިޓީގެ މައިގަނޑު މަޤްޞަދަކީ ދިވެހިރާއްޖޭގެ ފަތުުރުވެރިކަމަށް 50 އަހަރު ފުރޭ އަހަރު ކުލަގަދަކޮށް ފާހަގަ ކުރުމަށްޓަކައި ހިންގާ ހަރަކާތްތައް ވިލަރެސްކުރުމާއި ޓޫރިޒަމް އިންޑަސްޓްރީއާއި މިއިންޑަސްޓްރީ އާއި ގުޅިލާމެހިފައިވާ އެހެންފަރާތްތަކުގެ ބައިވެރިވުންއޮންނަ ގޮތަށް ރާއްޖޭގެ ސިޓީތަކާއި، އަތޮޅުތަކުގައި ތަފާތު ހަރަކާތައް އިންތިޒާމްކޮށް ކުރިއަށް ގެންދިއުން ކަމަށެވެ.
"ޓޫރިޒަމް ގޯލްޑަންޖުބްލީ ސްޓިއަރިންގ ކޮމިޓީ" އެކުލަވާލާފައި ވަނީ ޓޫރިޒަމް އިންޑަސްޓްރީގެ ޖަމްއިއްޔާތަކުގެ މަޝްވަރާއާއި އެކު 11 މެމްބަރުން ހިމެނޭހެންނެވެ. ކޮމިޓީގައި މިނިސްޓްރީ އޮފް ޓޫރިޒަމްގެ އިތުރުން މޯލްޑިވްސް މާކެޓިންގ އެންޑް ޕަބްލިކް ރިލޭޝަންސްކޯޕަރޭޝަން، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ، މޯލްޑިވްސް ގެސްޓްހައުސް އެސޯސިއޭޝަން، ނޭޝަނަލްބޯޓިންގ އެސޯސިއޭޝަން އޮފް މޯލްޑިވްސް، މޯލްޑިވްސް އެލަޔަންސް އޮފް ޑައިވް އޮޕަރޭޓަރސް، މިއުޒިޝަންސް ޔޫނިއަން އޮފްމޯލްޑިވްސް، ޗެފްސް ގިލްޑް އޮފް މޯލްޑިވްސް، މިނިސްޓްރީ އޮފް އާރޓްސް ކަލްޗަރ އެންޑް ހެރިޓޭޖް، މިނިސްޓްރީ އޮފް ޔޫތްސްޕޯރޓްސް އެންޑް ކޮމިއުނިޓީ އެމްޕަވަރމަންޓް، އަދި މިނިސްޓްރީ އޮފް ހޯމް އެފެއަރޒް، ތަމްސީލުކުރައްވާ މެންބަރުން ހިމެނެވެ.
މިކޮމިޓީގެ ފުރަތަމަ ބައްދަލުވުގައި ގޯލްޑަންޖުބްލީ ފާހަގަކުރުމަށް ކުރިއަށްގެންދަން ގަސްދުކުރާ އެކްޓިވިޓީ ކަލަންޑަރާއި ގުޅޭގޮތުންމެންބަރުން މަޝްވަރާ ކޮށްފައިވާކަމަށާއި ގޯލްޑަން ޖުބްލީގެ މައިގަނޑު ހަރަކާތްތައް ކުރިއަށް ގެންދިއުމާއި ހަރަކާތައް ހިންގުމަށްބޭނުންވާ ބަޖެޓާއި އިންތިޒާމުތަކާއި ގުޅޭގޮތުން ޚިޔާލާއި މަޝްވަރާ ބަދަލު ކޮށްފައިވާކަމަށް މިނިސްޓްރީން ބުނެއެވެ.
"ޓޫރިޒަމް ގޯލްޑަންޖުބްލީ ސްޓިއަރިންގ ކޮމިޓީ"ގެ އިދާރީ މަސައްކަތްތައް ކުރިއަށް ގެންދިއުމަށް ހަމަޖެހިފައިވަނީ މިނިސްޓްރީ އޮފް ޓޫރިޒަމްއިންނެވެ. އެމިނިސްޓްރީން ވަނީ ޓޫރިޒަމް ގޯލްޑަން ޖުބްލީއަށް ތައްޔާރުވުމަށް ޚާއްޞަ ޓާސްކްފޯރސް އެކުލަވާލާފައެވެ.
