ތެލުން ޑިއުޓީ ކުޑަކުރާ އިސްލާހު ކޮމިޓީން ފާސްކޮށްފި
ފާސްކޮށްފައިވަނީ ސަރުކާރުން ހުށަހެޅި ގޮތަށް
ތެލުން ޑިއުޓީ ކުޑަކުރާ އިސްލާހު ކޮމިޓީން ފާސްކުރީ ސަރުކާރުން ހުށަހެޅި ގޮތަށް
ރާއްޖެއަށް އެތެރެކުރާ ތެލުން އިމްޕޯޓް ޑިއުޓީގެ ގޮތުގައި ނަގަމުން އަންނަ 10 ޕަސެންޓްގެ ޑިއުޓީ، ފަސް ޕަސެންޓަށް ދަށްކުރުމަށް ސަރުކާރުން ރައްޔިތުންގެ މަޖިލީހަށް ހުށަހެޅި ބިލް ރައްޔިތުންގެ މަޖިލީހުގެ އިޤުތިޞާދީ ކޮމިޓީން ފާސްކޮށްފިއެވެ.
ސަރުކާރުން ހުށަހެލި ގޮތަށް، މި އިސްލާހަށް އެއްވެސް ބަދަލެއް ނުގެނެސް އިޤުތިޞާދީ ކޮމިޓީން މި ބިލް ފާސްކޮށްފައިވަނީ ހޯމަ ދުވަހުގެރޭ ބޭއްވި އެ ކޮމިޓީގެ ބައްދަލުވުމުގައެވެ.
ކޮމިޓީއިން މިގޮތަށް ނިންމިއިރު، އިދިކޮޅު ފަރާތްތަކުން ވަނީ ތެލުން ނަގާ ޑިއުޓީ، ކުރިންވެސް އޮތް ގޮތަށް، އެކުގައި ކަނޑާލުމަށް ހުށަހަޅާފައެވެ. ކިނބިދޫ ދާއިރާގެ މެމްބަރު އަބްދުﷲ ރިޔާޒް ހުށަހެޅުއްވި މި އިސްލާޙަށް ގަމު ދާއިރާގެ މެމްބަރު ފައްޔާޒު އިސްމާއީލް ތާޢީދުވެސް ކުރައްވާފައި ވީނަމަވެސް، އެގޮތަށް އިސްލާހު ބަދަލުކޮށްފައެއް ނުވެއެވެ.
ތެލުގެ ޑިއުޓީ ކުޑަކުރުމަށް ސަރުކާރުން ހުށަހެލި ބިލަށް އިދިކޮޅު ފަރާތްތަކުން މިފަދަ އިސްލާޙެއް ހުށަހަޅާފައިވާއިރު، ރައްޔިތުންގެ މަޖިލީހުގެ ވިލިމާފަންނަނު ދާއިރާގެ މެންބަރުކަން ކުރާއްވާ، މަޖިލީހުގެ މެޖޯރިޓީ ލީޑަރު އަދި ސަރުކާރު ހިންގާ ޕީޕީއެމްގެ ޕާލިމެންޓްރީ ގްރޫޕުގެ ލީޑަރު، އަޙުމަދު ނިހާން ޙުސައިން މަނިކު ވަނީ ޑިއުޓީއެއް އިތުރު ކުރުމަށާއި އުނި ކުރުމަށްވެސް ހުށަހެޅޭނީ ސަރުކާރަށް ކަމަށާ، އެއީ ވަކިވަކި މެންބަރުންނަށް ހުށަހެޅޭ ކަންކަން ނޫން ކަމަށް ވިދާޅުވެފައެވެ.
ހޯމަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ދިވެހިރާއްޖޭގެ އެކްސްޕޯޓް އިމްޕޯޓްގެ ގާނޫނަށް ސަރުކާރުގެ ފަރާތުން، މެންބަރު ނިހާން ހުށަހެޅުއްވި އިސްލާހު ގެނައުމުގެ އެ ބިލް މަޖިލީހަށް ބަލައިގަތުމަށް ފާސްކުރުމަށްފަހު، މަޖިލީހުގެ ހޯމަ ދުވަހުގެ ޖަލްސާ ނިމުމާ އެކު މުޅި މަޖިލީހުގެ ކޮމެޓީން ވަނީ އަންނަ ހޯމަ ދުވަހުގެ ކުރިން އެބިލްގެ މަސައްކަތް ނިންމުމަށް ފާސްކޮށްފައެވެ. ފާސްކޮށްފައި ވަނީ ވޯޓްގައި ބައިވެރިވެވަޑާއިގެންނެވި 37 މެމްބަރުން އަޣުލަބިއްޔަތުންނެވެ.
