ކޮވިޑަށް ނެގެޓިވްވެ ދަގަނޑޭއަށް ޓީމާ ގުޅުމުގެ ފުރުސަތު

ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) ކޮވިޑް-19 އަށް އެންމެ ފަހުން ކުރި ޓެސްޓު ނެގެޓިވުމުން، އޭނާއަށް ޓީމާ ގުޅުމުގެ ފުރުސަތު ލިބިއްޖެއެވެ.

ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނުގައި ރާއްޖެ ހިމެނޭ ގްރޫޕް އޭގެ ބާކީ ހުރި މެޗުތައް ދުބާއީގައި ކުޅޭއިރު، ދަގަނޑޭ ވައިރަހަށް ޕޮޒިޓިވްވީ ގައުމީ ޓީމުން ދުބާއީގައި ހަދަމުން އައި ތަމްރީނުތަކުގެ ތެރެއިން މިދިޔަ ހަފުތާގައެވެ. އެއާއެކު 10 ދުވަހަށް ދަގަނޑޭ ކަރަންޓީނުވާން ޖެހުނެވެ.

އެކަމަކު ދާދި ފަހުން ދަގަނޑޭ އަލުން ކޮވިޑަށް ޓެސްޓުކުރިއިރު، އޭނާގެ ނަތީޖާ މިހާރު ވަނީ ނެގެޓިވް ކަމަށް ދައްކާފައެވެ. އެހެންކަމުން ކޮލިފައިންގައި ހުކުރު ދުވަހުގެރޭ ސީރިއާއާ ދެކޮޅަށް ރާއްޖެ ކުޅޭ މެޗަށްފަހު ދަގަނޑޭ ގައުމީ ޓީމުގެ ފަރިތަކުރުންތަކާ ގުޅޭނެއެވެ. ދަގަނޑޭ ކޮވިޑަށް ނެގެޓިވްވިއިރު، އޭނާއާއެކު ޕޮޒިޓިވްވި ޒުވާން ޑިފެންޑަރު އަލީ ޝާމިސް (ތޮއްޕޭ) އަދިވެސް ޕޮޒިޓިވް ކަމަށް މައުލޫމާތު ލިބެއެވެ.

ކޮވިޑަށް ނެގެޓިވްވުމާއެކު ދަގަނޑޭއަށް ޓީމާ ގުޅުމުގެ ފުރުސަތު ލިބުންއިރު، ދާދި ފަހުން އޭއެފްސީން ވަނީ ޝެޑިއުލަށް ބަދަލު ގެނެސްފައެވެ. އެގޮތުން މިހާރު އޮތް ގޮތުން ހުކުރު ދުވަހުގެރޭ ސީރިއާއާ ދެކޮޅަށް ރާއްޖެ ނުކުންނައިރު، މި މަހުގެ 11 ވަނަ ދުވަހު ރާއްޖެ ކުޅޭނީ ޗައިނާއާ ދެކޮޅަށެވެ. އަދި ކޮލިފައިންގައި ރާއްޖެ ކުޅޭ ފަހު މެޗު އޮންނާނީ މި މަހު 15 ވަނަ ދުވަހު ފިިލިޕީންސާ ދެކޮޅަށެވެ. އެހެންކަމުން ޗައިނާ އާއި ފިިލިޕީންސާއާ ދެކޮޅަށް ދަގަނޑޭއަށް ކުޅެވޭނެއެވެ.

އޭޝިއަން ކަޕަށް ކޮލިފައިވުމަށް ރާއްޖެއިން އަމާޒުހިފާފައިވާއިރު، ކޮލިފައިންގައި ރާއްޖެ އޮތީ ހަތަރު މެޗުން ހަ ޕޮއިންޓާއެކު ގްރޫޕުގެ ހަތަރުވަނައިގައެވެ. ގްރޫޕުގެ އެއްވަނައިގައި އޮތީ ފަސް މެޗުން 15 ޕޮއިންޓާއެކު ސީރިއާއެވެ. ފަސް މެޗުން 10 ޕޮއިންޓާއެކު ދެވަނައިގައި ޗައިނާ އޮތްއިރު، ތިންވަނައިގައި އޮތީ ފަސް މެޗުން ހަތް ޕޮއިންޓް ހޯދާފައިވާ ފިލިޕީންސެވެ. އަދި ރާއްޖޭގެ ފަހަތުން ފަސްވަނައިގައި އޮތީ ފަސް މެޗު ކުޅެގެން އަދި ޕޮއިންޓެއް ލިބިފައިނުވާ ގުއާމެވެ.