އޮސްޓްރޭލިއާއިން ވެސް ނުރައްކާތެރި ޑެލްޓާ ވޭރިއެންޓް ފެނިއްޖެ
4 ޖޫން 2021 | ހުކުރު 06:26ޑެލްޓާ ވޭރިއެންޓްގެ ކޭސް އޮސްޓްރޭލިއާގެ އެހެން އެއްވެސް ކްލަސްޓާއަކާ ގުޅުމެއް ވާކަމެއް އެނގިފައެއް ނުވޭ
ވިކްޓޯއިރާއިން ޑެލްޓާ ކޮވިޑް 19 ކޭހެއް ފެނުން
މިހާރު ހަލުވި ކަމާއެކު ފެތުރެމުންދާ ކޮވިޑް 19ގެ ޑެލްޓާ ވޭރިއެންޓްގެ ކޭހެއް އޮސްޓްރޭލިއާގެ ވިކްޓޯރިއާ ސްޓޭޓުން ފެނިއްޖެއެވެ.
ޑެލްޓާ ވޭރިއަންޓަކީ އިންޑިއާއިން ފެނިފައިވާ ކޮވިޑް ވޭރިއެންޓެވެ. މި ވޭރިއެންޓަކީ މިހާތަނަށް ފެނިފައިވާ ކޮވިޑްގެ ހަތަރު ވޭރިއެންޓް ތެރެއިން އެންމެ ހަލުވި މިނުގައި ފެތުރޭ ވޭރިއެންޓެވެ. ޑެލްޓާ ވޭރިއެންޓާ މެދު ދުނިޔޭގެ ސިއްހަތު ޖަމުޢިއްޔާ (ޑަބްލިއުއެޗްއޯ) އިން ވެސް ވަނީ ކަންބޮޑުވުން ފާޅުކޮށްފައެވެ.
އޮސްޓްރޭލިއާގެ ކަމާބެހޭ ފަތާތްތަކުން ރިޕޯޓުކޮށްފައި ވާގޮތުން ޑެލްޓާ ވޭރިއެންޓްގެ ކޭސް ފެނިފައިވަނީ ވިކްޓޯރިއާ ސްޓޭޓްގެ ވެރިރަށް މެލްބާން އިންނެވެ. މެލްބާން އަކީ އޮސްޓްރޭލިއާގެ ދެވަނައަށް އެންމެ ބޮޑު ސިޓީއެވެ.
ޑެލްޓާ ވޭރިއެންޓްގެ ކޭސް، އޮސްޓްރޭލިއާގެ އެހެން އެއްވެސް ކްލަސްޓާއަކާ ގުޅުމެއް ވާކަމެއް އެނގިފައެއް ނުވެއެވެ. އަދި ކަރަންޓީން ފެސިލިޓީއަކުން ވެސް މީގެ ކޭސްއެއް ފެނިފައެއް ނުވެއެވެ.
ޑެލްޓާ ވޭރިއެންޓް ފެނިފައިވަނީ މީގެ ދެ ހަފްތާކުރިން ނިއު ސައުތު ވޭލްސްއަށް ދަތުރުކުރި އާއިލާއެއްގެ ދެ މެންބަރެއްގެ ގައިންނެވެ. ބެލެވޭ ގޮތުގައި މި ދެމީހުން ވަނީ ނިއު ސައުތު ވޭލްސް ފަތުރުވެރިންގެ މަގުބޫލު މަންޒިލުތަކަށް ގޮސްފައެވެ.
އެކަމަކު އޮސްޓްރޭލިއާގެ އެންމެ އާބާދީ ބޮޑު ނިއު ސައުތު ވޭލްސް އިން މިހާތަނަށް ޑެލްޓާ ވޭރިއެންޓްގެ ކޭސް އެއް ރިޕޯޓުކޮށްފައެއް ނުވެއެވެ.
ވިކްޓޯރިއާގައި އަލުން ކޮވިޑްގެ ކޭސްތައް އިތުރުވާން ފަށާފައި މިވަނީ މެއި މަހުގެ 24 ވަނަ ދުވަހުން ފެށިގެންނެވެ. އެދުވަހުން ފެށިގެން މިހާތަކަށް 64 ކޭސް ރިޕޯޓުކޮށްފައިވެއެވެ. މެއި މަހުގެ 24 ވަނަ ދުވަހު ކޮވިޑް ކޭސްތައް ފެންނަން ފެށީ, އެ ސްޓޭޓުން ކޮވިޑް ނުފެންނަތާ ތިން މަސްފަހުންނެވެ.
