ގްރީސްއިން ވަރުގަދަ ބެލްޖިއަމް ހިފަހައްޓައިފި

ކުރިއަށް އޮތް ޔޫރޯ ފުޓްބޯޅަ މުބާރާތަށް ތައްޔާރުވުމުގެ ގޮތުން ބުރާސްފަތި ދުވަހުގެރޭ ކުޅުނު ބައިނަލްއަގުވާމީ އެކުވެރިކަމުގެ މެޗުގައި ގްރީސްއިން ދުނިޔޭގެ ރޭންކިންގެ އެއްވަނައިގައި އޮތް ބެލްޖިއަމް ހިފަހައްޓައިފިއެވެ.

ބެލްޖިއަމުގައި ކުޅުނު މި މެޗު އެއްވަރުވީ 1-1 ގެ ނަތީޖާއަކުންނެވެ.

މި މެޗަށް ބެލްޖިއަމް ކުރިމަތިލާފައިވަނީ އަނިޔާގައި ހުރި ތަޖުރިބާކާރު މިޑްފީލްޑަރު ކެވިން ޑި ބްރޭނާ ނުލައެވެ. ދެ ގައުމުގެ ފަރާތުންވެސް ހަމަހަމަ ކުޅުމެއް ފެނިގެންދިޔަ މި މެޗުގައި އެންމެ ފުރަތަމަ ލަނޑު ޖަހާ ލީޑު ނަގާފައިވަނީ ބެލްޖިއަމުންނެވެ. މެޗުގެ 20 ވަނަ މިނެޓުގައި މި ލަނޑު އެ ގައުމަށް ކާމިޔާބުކޮށްދިނީ ތޯގަން ހަޒާޑެވެ.

އޭގެ ފަހުން ގްރީސްއިން ބެލްޖިއަމުގެ ގޯލަށް ނުރައްކާކުރިއިރު، އެ ޓީމުން ނަތީޖާ އެއްވަރުކޮށްފައިވަނީ ދެވަނަ ހާފުގައެވެ. މެޗުގެ 66 ވަނަ މިނެޓުގައި މި ލަނޑު އެ ގައުމަށް ކާމިޔާބުކޮށްދިނީ ޖެއޯޖިއޮސް ޒަވޭލަސްއެވެ. މި މެޗުގައި ގްރީސްއިން ވަރުގަދަ ބެލްޖިއަމާ އެއްވަރުކުރިއިރު، މި ފަހަރުގެ ޔޫރޯއަށް ގްރީސް ކޮލިފައިވެފައެއް ނުވެއެވެ.

މި މަހުގެ 11 ވަނަ ދުވަހު ފަށާ ޔޫރޯއަށް ތައްޔާރުވުމުގެ ގޮތުން ކުޅުނު އެކުވެރިކަމުގެ ފުރަތަމަ މެޗުން ބެލްޖިއަމް އެއްވަރުވިއިރު، މި ފަހަރުގެ ޔޫރޯގައި އެ ގައުމު ހިމެނެނީ ގްރޫޕް ބީ ގައެވެ. އެ ގްރޫޕުގައި ދެން ހިމެނޭ ގައުމުތަކަކީ ޑެންމާކް، ފިންލެންޑް އަދި ރަޝިއާއެވެ.