ކޮވިޝީލްޑް ވެކްސިން ލިބޭނެކަމުގެ ވަރަށް ބޮޑަށް އުންމީދެއް އެބައޮތް: މިނިސްޓަރ
3 ޖޫން 2021 | ބުރާސްފަތި 02:33ކޮވިޝީލްޑް ވެކްސިން ހޯދުމަށް ފޮރިން މިނިސްޓްރީ އާއި ރައީސް އޮފީސް އަދި ހެލްތު މިނިސްޓްރީންވެސް އަންނަނީ މަސައްކަތްކުރަމުން
ވެކްސިން ޖެހުމުގެ ގައުމީ ކެމްޕޭންގެ ތެރެއިން ޓްރީ ޓޮޕް ހޮސްޕިޓަލުގައި ވެކްސިން ދިނުމުގެ މަސައްކަތް ކުރިއަށް ދަނީ
އިންޑިޔާގެ ސެރަމް އިންސްޓިޓިއުޓުން އުފައްދާފައިވާ ކޮވިޝީލްޑް ވެކްސިން ގެނައުމަށް ވެފައިވާ އެއްބަސްވުމުގެ ދަށުން ރާއްޖެއަށް ލިބެންޖެހޭ އެއް ލައްކަ ޑޯޒް ގެނައުމުގެ މަސައްކަތް ވަރަށް ބޮޑަށް ކުރަމުންދާ ކަމަށް ހެލްތު މިނިސްޓަރ އަހުމަދު ނަސީމް ވިދާޅުވެއްޖެެއެވެ.
ހެލްތު އެމަރޖެންސީ އޮޕަރޭޝަން ސެންޓަރު (އެޗްއީއޯސީ)ން ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެކަމާއި ގުޅޭގޮތުން ވާހަކަދައްކަވަމުން މިނިސްޓަރ ވިދާޅުވީ ކަންދިމާކުރި ގޮތުން އަވަށްޓެރި ގައުމަކުން ލިބެންޖެހޭ އެއް ލައްކަ ޑޯޒް ނުލިބުމުގެ ސަބަބުން ދަތިތައް ކުރިމަތިވެފައިވާކަމަށެވެ. ކޮވިޝީލްޑް ވެކްސިން ގެނައުމަށް ކުރަމުންދާ މަސައްކަތަށް ވަރަށް އަވަހަށް ހައްލެއް ލިބޭނެކަމަށް އުންމީދުކުރައްވާކަމަށް މިނިސްޓަރ ވިދާޅުވިއެވެ.
ފެބްރުއަރީ މަހުގެ 1 ވަނަ ދުވަހު ރާއްޖޭގައި ކޮވިޑް ވެކްސިނޭޝަން ޕްރޮގްރާމް ފެށިއިރު ޖަހަން ފަށާފައިވަނީ ކޮވިޝީލްޑް ވެކްސިނެވެ. ވެކްސިން ޖަހަން ފެށިއިރު ރާއްޖެއަށް ލިބިފައިވަނީ ކޮވިޝީލްޑް ވެކްސިންގެ 1 ލައްކަ ޑޯޒެވެ. އިންޑިޔާއިން ކޮވިޝީލްޑް ވެކްސިންގެ އިތުރު 1 ލައްކަ ޑޯޒް ހަދިޔާކުރީ ފެބްރުއަރީ މަހުގެ 20 ވަނަ ދުވަހުއެވެ.
އިންޑިއާގެ ސިރަމް އިންސިޓިޓިއުޓްއިން ކޮވިޝީލްޑް ވެކްސިންގެ 300،000 ލައްކަ ޑޯޒް ގަތުމަށް ވެފައިވާ އެއްބަސްވުމުގެ ދަށުން ވެކްސިންގެ 100،000 ޑޯޒު ރާއްޖެ ގެނައީ މަރޗް މަހުގެ 29 ވަނަ ދުވަހުއެވެ.
ކޮވިޝީލްޑް ވެކްސިން ލިބުމުގައި ދިމާވި ދަތިތަކުގެ ސަބަބުން މެއި މަހުގެ 2 ވަނަ ދުވަހުން ފެށިގެން މާލޭގައި ކޮވިޝީލްޑް ވެކްސިންގެ ދެވަނަ ޑޯޒް ޖެހުން ވަނީ ވަގުތީ ގޮތުން މެދުކަނޑާލާފައެވެ. ކޮވިޝީލްޑް ވެކްސިން ލިބުމުގައި ދަތިތައް ދިމާވީ އިންޑިޔާއިން މަރޗް މަހުގެ ފަހުކޮޅު އެހެން ގައުމުތަކަށް ވެކްސިން އެކްސްޕޯޓް ކުރުން މެދުކަނޑާލުމާއި ގުޅިގެންނެވެ. އެގައުމުގެ ވެކްސިނޭޝަން ޕްރޮގްރާމްގެ ސްޕީޑް ދަށްވެ ކޭސްތައް އަތްނުފޯރާ ހިސާބަށް ދާންފެށުމުން ވެކްސިން އެހެން ގައުމުތަކަށް އެކްސްޕޯޓްކުރުން މެދުކަނޑާލިއެވެ.
މިކަމުގައި ބައިނަލްއަގްވަމީ މަޝްރަހުން ލިބެމުންދާ ރިޕޯޓްތަކަށް ބަލާލާއިރު ދެ އޮފިޝަލަކާ ހަވާލާދީ ރޮއިޓަރސް އިން ރިޕޯޓްކޮށްފައިވަނީ އިންޑިޔާއަށް އެހެން ގައުމުތަކަށް ވެކްސިން ފޯރުކޮށްދެވޭނެ ތާރީޚެއް ބިނާވާނީ އެގައުމުގައި ކޮވިޑްގެ ހާލަތު ރަނގަޅުވަމުން އަންނަ އަވަސް ލަސްމިނެއްގެ މައްޗަށްކަމަށެވެ. އިންޑިޔާގައި އެންމެފުޅާ ދާއިރާއެއްގައި ވެކްސިން އުފައްދަމުން އަންނަ ސެރަމް އިންސްޓިޓިއުޓްގެ ސްޕޯކްސްމަން ބުނެފައިވަނީ މިހާރު އެންމެ ބޮޑު އިސްކަމެއް ދެނީ އިންޑިޔާއަށް ވެކްސިން ފޯރުކޮށްދިނުމަށް ކަމަށެވެ. އެހެން ގައުމުތަކަށް ވެކްސިން އެންމެ އަވަހަށްވެސް ފޯރުކޮށްދޭން ފެށޭވަރުވާނީ ޖޫން މަހުގައި ކަމަށް ވަނީ ބުނެފައެވެ.
ބެލެވޭ ގޮތުގައި ރާއްޖޭގައި ކޮވިޝީލްޑް ވެކްސިންގެ ދެވަނަ ޑޯޒް ނުޖަހާ ލައްކައެއްހާ މީހުން ތިބޭނެއެވެ. ރާއްޖޭގައި މިވަގުތު ތިން ލައްކައަށްވުރެ ގިނަ މީހުން ފުރަތަމަ ޑޯޒް ޖަހާފައިވާއިރު ދެވަނަ ޑޯޒް ޖަހާފައިވަނީ އެއްލައްކަ ފަސްދޮޅަސް އަށްހާސް މީހުންނެވެ.
