ޖަރުމަނާއި ނެދަލެންޑްސް އެއްވަރު
2 ޖޫން 2021 | ބުދަ 21:32ނެދަލެންޑްސް އާއި ސްކޮޓްލެންޑް އެއްވަރުވީ 2-2 ގެ ނަތީޖާއަކުން
ޖަރުމަނާއި ޑެންމާކް ބައްދަލުކުރި މެޗުގެ ތެރެއިން: މި މެޗު އެއްވަރުވީ 1-1 ން
ކުރިއަށް އޮތް ޔޫރޯ ފުޓްބޯޅަ މުބާރާތަށް ތައްޔާރުވުމުގެ ގޮތުން ބުދަ ދުވަހުގެރޭ ކުޅުނު ބައިނަލްއަގުވާމީ އެކުވެރިކަމުގެ މެޗުތަކުން ޖަރުމަނާއި ނެދަލެންޑްސްވެސް އެއްވަރުވެއްޖެއެވެ.
އޮސްޓްރިއާގައި ކުޅުނު މެޗުން ޖަރުމަން އެއްވަރުވީ ޑެންމާކާ ބައްދަލުކޮށް 1-1 ގެ ނަތީޖާއަކުންނެވެ.
މި މެޗުގައި ޖަރުމަނުން ވަނީ މެދުކެނޑުމަކަށްފަހު ސްކޮޑުން ފުރުސަތު ދިން ބަޔާން މިއުނިކުގެ ތަޖުރިބާކާރު ފޯވާޑް ތޯމަސް މުލާ އާއި ބޮރޫޝިއާ ޑޯޓްމުންޑުގެ ތަޖުރިބާކާރު ޑިފެންޑަރު މެޓްސް ހަމެލްސް ފުރަތަމަ އެގާރައިގައި ހިމަނާފައެވެ. މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފު ފަށައިގެން ތިންވަނަ މިނެޓުގައި އެ ގައުމުން ވަނީ ލީޑު ނަގާފައެވެ. މި ލަނޑު އެ ގައުމަށް ކާމިޔާބުކޮށްދިނީ ޒުވާން މިޑްފީލްޑަރު ފްލޯރިއަން ނެއުހައުސްއެވެ. އެކަމަކު މެޗުގެ 71 ވަނަ މިނެޓުގައި ޔޫސުފް ޕޯލްސެން ވަނީ ޑެންމާކަށް ނަތީޖާ އެއްވަރުކޮށްދީފައެވެ.
މި މަހުގެ 11 ވަނަ ދުވަހު ފަށާ ޔޫރޯއަށް ތައްޔާރުވުމުގެ ގޮތުން ކުޅުނު އެކުވެރިކަމުގެ ފުރަތަމަ މެޗުން ޖަރުމަން އެއްވަރުވިއިރު، މި ފަހަރުގެ ޔޫރޯގައި އެ ގައުމު ހިމެނެނީ ގްރޫޕް އެފް ގައެވެ. އެ ގްރޫޕުގައި ދެން ހިމެނެނީ ހަންގޭރީ، ޕޯޗުގަލް އަދި ފްރާންސެވެ.
މީގެ އިތުރުން ބުދަ ދުވަހުގެރޭ ކުޅުނު ބައިނަލްއަގުވާމީ އެކުވެރިކަމުގެ މެޗުން ނެދަލެންޑްސް އެއްވަރުވީ ސްކޮޓްލެންޑާ ބައްދަލުކޮށް 2-2 ގެ ނަތީޖާއަކުންނެވެ.
ޕޯޗުގަލުގައި ކުޅުނު މި މެޗުގައި ދެ ގައުމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، މެޗުގައި އެންމެ ފުރަތަމަ ލަނޑު ޖަހާ ލީޑު ނަގާފައިވަނީ ސްކޮޓްލެންޑުންނެވެ. މެޗުގެ 11 ވަނަ މިނެޓުގައި މި ލަނޑު އެ ގައުމަށް ކާމިޔާބުކޮށްދިނީ ޖެކް ހެންޑްރީއެވެ. އެކަމަކު އޭގެ ހަ މިނެޓު ފަހުން މެމްފިސް ޑިޕާއި ވަނީ ލަނޑެއް ޖަހައި، ނެދަލެންޑްސްއަށް ނަތީޖަ އެއްވަރުކޮށްދީފައެވެ.
މި މެޗުގެ 64 ވަނަ މިނެޓުގައި ކެވިން ނިސްބެޓް ޖެހި ލަނޑާއެކު ސްކޮޓްލެންޑް ވަނީ އަލުން ލީޑުނަގާފައެވެ. އެކަމަކު މެޗު ނިމެން މިނެޓަކަށް ވެފައި ވަނިކޮށް ޑިޕާއި ވަނީ ހިލޭ ޖެހުމަކުން އިތުރު ލަނޑެއް ޖަހައި ދެވަނަ ފަހަރަށް ނެދަލެންޑްސްއަށް ނަތީޖާ އެއްވަރުކޮށްދީފައެވެ.
ބުދަ ދުވަހުގެރޭ ކުޅުނު އެކުވެރިކަމުގެ މެޗުން ނެދަލެންޑްސް އެއްވަރުވިއިރު، މި ފަހަރުގެ ޔޫރޯގައި އެ ގައުމު ހިމެނެނީ ގްރޫޕް ސީ ގައެވެ. އެ ގްރޫޕުގައި ދެން ހިމެނެނީ އޮސްޓްރިއާ، ނޯތު މެސެޑޯނިއާ އަދި ޔޫކްރޭނެވެ.
